Ƀư tĭng rnoh ndơ ƀư mrô 4 mpeh điện tâm ndâk njêng thôn ƀon, ăp năm bah năp, Công ty Điện lực Dak Lak lĕ rgum hun hao trong rse điện n’hanh n’hao uĕh rhŏ an pă điện gay tâm di nău ŭch hun hao nkra njêng n’hanh dŏng bah nuĭh ƀon lan.

Công ty lĕ dŭt n’hâm tâm rgop đah n’gâng kan ƀon lan rgŏ jă nuĭh ƀon lan râng an neh, nar kan, ndoh ndơ gay rhŏ an ndâk ƀư, nkra trong điện hạ áp tĭng trong way ƀư “Ngih dak n’hanh ƀon lan ndrel ƀư”; nkoch trêng n’hao nău wât mât njrăng ndơ điện, trong rse điện, dŏng điện ntêm nkrem, săk rnglăy. Knŭng tâm 3 năm dăch aơ, êng PC Dak Lak lĕ ƀư 263 nău nchrăp ƀư trong điện, đah dĭng lĕ prăk rlău 668 rmen prăk.

Nkre, Tổng Công ty Điện miền Trung lĕ ntuh kơl ndâk ƀư 12 nău nchrăp ƀư trong điện khlay ta Dak Lak, dĭng lĕ prăk 1.322 rmen prăk. Tât aƀaơ, lĕ rngôch ăp xă, phường, nkuăl têh bah n’gor lĕ geh điện, geh 99,54% rnoh rnăk ƀon lan dŏng điện ngih dak n’hanh 148/152 xă geh rnoh ndơ ƀư mpeh điện ndâk njêng thôn ƀon mhe.