Ƀư tĭng nău ntrŭnh ndâk njêng mir ntrong lor, wa Trần Anh Lang, ta thôn Mỹ Sơn, xă Duy Phú, nkuăl Duy Xuyên, n’gor Quảng Nam hăn lor nkra rgâl mir bah rnăk wâl, têh bơi 2 ha gay tăm ăp ntil tơm khlay wăng sa kơt: bưởi, cam, quýt, mbo... Wa Trần Anh Lang an gĭt, bah năp đaơ mir aơ knŭng tăm ăp ntil tơm tăm đêt nar, săk rnglăy wăng sa đêt. Dơi n’gâng kan ƀon lan uănh mĭn, wa Lang lĕ ntơm rgâl mir ntrong lor. Aƀaơ, nkual mir bah wa Trần Anh Lang tơm rlê play n’hanh nsĭt tay nău geh âk. Wa Trần Anh Lang hôm tăm srah ăp ntil tơm đêt nar kơt tuh, bŭnh, biăp kloh uĕh, ntop đah mât ka gay n’hao tay nău geh.

“Uĕh jêng mir ntrong lor, bôk năp an săk rnglăy wăng sa rnăk wâl, nkre nkoch ƀư sa an ăp rnăk êng. Ngih dak ntop kơl an he rnôk ndâk ƀư mir ntrong lor lah 5 rkeh n’hanh nkual mir aơ lĕ nsĭt tay săk rnglăy wăng sa”.

Mô knŭng êng rnăk wa Trần Anh Lang, bah rnôk ƀư tĭng ntrong leo nkual ƀon lan gŭ thôn ƀon mhe ntrong lor, âk rnăk ta xă Duy Phú, nkuăl Duy Xuyên, n’gor Quảng Nam lĕ rgâl nău mĭn, trong ƀư gay nta an âk nkual mir sinh thái đah ntŭk ntô kloh uĕh, rgop ntrôl tuch tăm, hun hao wăng sa n’hao nău geh. Wa Trần Thị Dương, Kruanh UBND xă Duy Phú, nkuăl Duy Xuyên an gĭt: Tât aƀaơ lam xă lĕ nkra, ndâk ƀư 70 nkual mir, dĭng lĕ rnoh 15ha, tâm nĕ, 10 mir ntrong lor tĭnh nău ntrŭnh. Ntrong ƀư mir leo lor dơi nkra lor n’hanh tăm tơm tĭnh dăp rgum, tĭng gưl nsĭt săk rnglăy wăng sa, hao nău geh an nuĭh ƀon lan. Tĭng wa Trần Thị Dương, tât aƀaơ rnoh rnăk ach o bah xă aƀaơ hôm 4,88%, rĭng nău geh nuĭh ƀon lan rlău 47 rkeh prăk du năm.

“Ăp ntrong ƀư mir ntrong leo lĕ n’hao nău wât an nuĭh ƀon lan, tă bah nĕ, ăp rnăk ƀon lan nti ƀư tĭng tâm di neh ntu bah mir gay tăm ăp ntil tơm nsĭt tay săk rnglăy, khlay lơn lah geh ntŭk ntô rêh kloh uĕh. N’gâng kan ƀon lan ntop kơl tơm tăm, tiăr nti nkra njêng khoa học kỹ thuật an nuĭh ƀon lan, kônh wa knŭng pă dăp neh n’hanh mât chăm”.

Rlău ma ntop kơl du rnăk 5 rkeh prăk mbơh ƀư ntrong kan mỉ ntrong lor, nkuăl Duy Xuyên, n’gor Quảng Nam ntrôl dăng trong kan nkoch trêng, rgŏ jă nuĭh ƀon lan n’hao nău wât mât uĕh ntŭk ntô gŭ âm. Nkre, mbơh ntĭm, ndơ̆ ăp ntil tơm tăm mhe geh săk rnglăy âk tâm nkra njêng gay n’hao khlay ndơ lŏ lor mir, hun hao nkual tuch tăm, ƀon lan tĭng trong pâl nđaih sinh thái n’hanh ƀư ngăn. Wa Đặng Hữu Phúc, Groi Kruanh UBND nkuăl Duy Xuyên, n’gor Quảng Nam an gĭt: Ăp năm bah năp, naư kan lŏ mir n’hanh n’gâng kan ƀon lan ntop kơl nuĭh ƀon lan rlău du rmen prăk gay ntuh kơl hun hao ntrong kan mir ntrong lor. Tă bah nĕ, lĕ ƀư rgâl bah nău mĭn tât nău ƀư bvah du hê nuĭh ƀon lan hun hao wăng sa mir ba, nta an ƀon lan uĕh, nău rêh răm m’ak.

“Mpeh săk rnglăy đah mir ntrong lor, rlău ma ƀư uĕh ntŭk ntô gŭ âm uĕh nđĭr, nkre tâm rgop kơl nuĭh ƀon lan kăch rek pĕ lêh bah tơm tăm nĕ, rgâl nău rêh wăng sa bah rnăk wâl. Bah tơm prăk nău rƀŏng ngih dak ndâk njêng thôn ƀon mhe, tâm nĕ geh ntop kơl du đêt ntrong kan an ăp rnăk ƀon lan an rgâl mir mô jêng ndâk njêng ntŭk ntô gŭ âm, nta an nău rêh an ăp rnăk ƀon lan. Tơm prăk aơ lĕ mât uĕh săk rnglăy đah tĭng mir ntrong lor”.

Aƀaơ, n’gor Quảng Nam geh 170 nkual ƀon lan thôn ƀon mhe ntrong lor đah rlău 250 ntrong ƀư mir mhe. Ta ăp mir ntrong lor, ƀon lan kơt dŏng khoa học kỹ thuật nglăp trong tŏ hoch êng, mô lah dŏng ntil mhe an tuch tăm gay geh săk rnglăy wăng sa âk. Rĭng, ăp mir aơ an geh bah 150 tât 200 rkeh prăk du năm. Wa Hồ Quang Bửu, Groi Kruanh UBND n’gor Quảng Nam an gĭt: Nău ndâk njêng nkual ƀon lan thôn ƀon mhe ntrong lor, jêng mir ntrong lor ntơm nsĭt geh săk rnglăy, ƀư lor rƀŏng tât jâng lŏ mir kloh uĕh, lŏ mir hữu cơ, ntơm jêng ntŭk ntô gŭ âm kloh uĕh nâp nâl.