Rƀŭn nchră nsưng rwang kruanh n’gâng kan ndâk njêng ASEAN-Trung Quốc lĕ dơi ƀư ta nkual ƀon têh Nam Ninh, n’gor Quảng Tây, Trung Quốc.  Ta rƀŭn nchră, ăp đại biểu lĕ nkoch âk nău blău ơm, joi trong kan ndrel tâm nău kan ndâk njêng, hun hao nkual ƀon têh n’hanh thôn ƀon bah ăp dak tâm ASEAN n’hanh Trung Quốc, tă bah nĕ rgop ƀư tĭng lôch uĕh Bôk nău kan khlay 2030 mpeh hun hao nâp nâl bah Liên hợp quốc.

Ntoh ngơi ta aơ, Kruanh N’gâng kan ndâk njêng Nguyễn Thanh Nghị an gĭt, Việt Nam tâm rmôt 10 dak bôk nău âk trôk nar lơh, rgâl trôk nar mih sial ta lam ntŭr neh. Kruanh N’gâng kan Nguyễn Thanh Nghị lĕ nkoch ăp nău mĭn êng n’hanh nchrŏng trong hun hao nkual ƀon têh nâp nâl, uĕh nđĭr, mhe, tâm di đah rgâl trôk nar, n’hŭch jăng ndơ djơh, sŏk kon nuĭh ƀư tơm n’hanh mô an jăng bah kơi. Kruanh n’gâng kan nsing nơm, săk rnglăy rƀŭn nchră aơ ndrel đah nău mbơh “Tâm ban ŭch Nam Ninh” mbra rgop khlay ngăn ngên ntrôl kan ndrel lĕ rngôch ASEAN n’hanh Trung Quốc lah nsum, kan ndrel ASEAN n’hanh Trung Quốc tâm nău ndâk njêng lah êng hao du gưl prêh mhe têh dăng lơn, ngăn ngên lơn.