Jao an ndrôm sam ƀŭt, ndơ̆ ndrôm sam ƀŭt tât ăp ƀon lan lah trong ƀư âk ntŭk kan ƀư văn hóa kơt ăp rmôt kan lŏng bôk tôr dôl ƀư ta Dak Lak gay kơl kon se ta nkual jru ngai dơi gĭt n’hanh răk ndrôm sam ƀŭt. Tă bah nĕ rgop rêng hvi nău uĕh răk tât ăp ƀon lan, ntop kơl an kon se uănh mĭn tay, ŭch nău răk ndrôm sam ƀŭt.

Ta bah dâng tơm si tâm nkual ngih sam ƀŭt THCS Tô Vĩnh Diện, nkual têh Buôn Hồ, n’gor Dak Lak, du rmôt kon hŏk gŭ uănh răk ndrôm sam ƀŭt pĭt ndeh pŭt rdêng ndơ đah săk kuăl “Thư viện mùa xuân”. Bôl tâm trôk nar duh r’ôl, nteh yung ye nsiăng, mô lah ăp nău nteh bah âk nău ƀư pâl rlưn kiău ma dôl ƀư, ăp oh hôm e uănh răk tĭng plơk sam ƀŭt.

Mhe jêh răk tập thơ “Em cứ sống một cuộc đời của cỏ”, oh H Sơ Mi Mlô, kon hŏk 7A3 sŏk dâl n’ha rđaih nchih ăp nău mĭn bah nơm mpeh ndrôm sam ƀŭt jêh nĕ djôt tât ntŭk bah nuĭh mât uănh ndơ̆ tay gay sŏk ndơ an. H Sơ Mi Mlô nkoch, oh saơ bôk ndeh thư viện aơ dŭt uĕh, ta nĕ geh dŭt âk ntil ndrôm sam ƀŭt n’hanh n’ăp ndơ pâl uĕh.

Oh dŭt ŭch thư viện aơ yor geh âk nđơn gay răk n’hanh geh âk ntil gay uănh, gay răk. Oh tât ta aơ răk nđơn, uănh âk ntil ndơ uĕh an nău nti nsơm kơt pâl rlưn aih bôk rngok n’hanh uĕh an nuih n’hâm.

Mô knŭng dơi an n’hanh răk ndrôm sam ƀŭt, ăp oh kon hŏk hôm dơi dơn ăp ndơ geh kô̆ n’hanh ƀư ngăn âk nău ƀư uĕh kơt pâl cờ vua, vẽ rup, mon tò he, ƀư ntô ndrôm sam ƀŭt bah n’har rđaih carton... Yuh Phạm Khánh My, ta nkual ƀon têh Buôn Ma Thuột, n’gor Dak Lak, mât uănh ndeh “Thư viện mùa xuân” nkoch: đah mpŏng ŭch geh âk nău ƀư ngăn gay kon se ta ăp ntŭk nkual jêr jŏt, nkual jru ngai ta Tây Nguyên dơi gĭt n’hanh răk ndrôm sam ƀŭt âk lơn, bah năm 2020 Công ty xã hội Bồ Công Anh (ta nkual ƀon têh Buôn Ma Thuột) tâm rgop đah âk nuĭh lŏng bôk tôr mbơh ƀư nău nchrăp kan nsum mpôl đah kuăl lah “Thư viện sĭt ƀon”. Jêh rlău 2 năm, “thư viện” aơ mbrơi mbrơi jêng “ngăch” lơn rnôk geh ndeh rdêng jêt dơi ƀư uĕh, rdêng ăp ntil ndrôm sam ƀŭt, ndơ an, ndơ pâl tât ăp ƀon lan, ntŭk ngih sam ƀŭt nkual jru ngai ta ăp n’gor Dak Lak, Gia Lai, Kon Tum, Dak Nông. Bah aơ, “Thư viện sĭt ƀon” rgâl săk moh mhe lah “Thư viện Mùa xuân”.

Tĭng yuh Phạm Khánh My đŏng, tât aƀaơ, rơh ndeh hăn “Thư viện mùa xuân” lĕ rhŏ an nklăp 50 ntŭk ngih sam ƀŭt ta ăp ntŭk, kơl an rlău 15.00 oh kon se dơi răk n’hanh ƀư ngăn ăp nău kan. Ndrel đah nĕ, mpôl ƀĭt jiet lĕ an rlău 12.000 bôk ndrôm sam ƀŭt an ăp tủ ndrôm sam ƀŭt n’gân ta ăp jrô nti ta ăp ntŭk ngih sam ƀŭt geh ƀư an dŏng:

 Gay ăp oh răk ndrôm sam ƀŭt ƀa ƀơ ta ndeh nchrăp ăp ndơ an đă răk. Rnôk ăp oh jêh răk gĭt saơ gay dơi gĭt ăp oh geh răk đŏng lah mô, he sŏk sam ƀŭt gĭt năl nĕ n’hanh an ndơ ân ăp oh, lah ndrôm sam ƀŭt jêt, mâng nchih mô lah ăp ntil ndơ ta ndeh, n’ăp ndrôm sam ƀŭt he dơi an dâl.

Ta Dak Lak, gay rêng hvi n’hanh hun hao văn hóa răk, bah năm 2017, UBND n’gor lĕ an trong nchrăp, mbơh ƀư bôk naư rgop tâm nchră “Hun hao văn hóa răk tâm ntŭk gŭ rêh tât năm 2020, ta n’gor Dak Lak”. Nău rƀŏng n’gluh an tât năm 2030, nta an nuĭh ƀon lan bên răk n’hanh gĭt tât, dŏng nu nău gĭt blău ta ntŭk gŭ rêh, nti nsơm, pah kan. Bôk nău rgop tâm nchră aơ lĕ dơi n’gor uănh tât mbơh ƀư đah ăp nău ƀư, rgum tâm rlong n’gŭr răm, ngăn ngên. Ăp năm, Nar ndrôm sam ƀŭt n’hanh văn hóa răk dơi ƀư đah nkô̆ nău âk ntil. Wa Ngô Trung Vinh, Kruanh jrô kan Văn hóa Thông tin nkuăl Krông Búk, n’gor Dak Lak an gĭt trong ƀư bah nkuăl.

Tâm rgop đah ăp ngih pah kan, ntŭk kan, lơn lah ăp ngih sam ƀŭt ƀư nar ndrôm sam ƀŭt n’hanh văn hóa răk ta ntŭk kan; ƀư âk nău aơ tĭng nău geh ngăn, nklăp lah dăp ndrôm sam ƀŭt, an ăp oh ƀư ngăn răk ndrôm sam ƀŭt ăp oh mpeh nđơn, văn hóa kơt văn hóa răk.

Tĭng wa Trương Hoài Anh, Giám đốc N’gâng kan Thông tin n’hanh Truyền thông n’gor Dak Lak, đah nău hăn ndrel bah ăp ngih pah kan, ntŭk kan, doanh nghiệp, Nar ndrôm sam ƀŭt n’hanh văn hóa răk ăp năm lŏ geh tay ak ndrôm sam ƀŭt lĕ dơi tât ăp ngih sam ƀŭt, thư viện ta ăp ntŭk nkual jru ngai ngai tâm n’gor, rgop dŭt n’hâm an hun hao văn hóa răk ta ăp thôn, ƀon. Ndrel đah trong răk way ơm, nău kơt dŏng rgâl mrô, mrô tâm hun hao văn hóa răk mbra ntrôl rêng hvi âk lơn ta ƀon lan, ngăn lah kon se, kon hŏk.

Tâm rnôk mhe công nghiệp 4.0 ri mpŏng ăp nuĭh ndrel mât uĕh lơn tay, mô knŭng tâm sam ƀŭt way ơm ma ăp trong mbơh, ăp ntil ndrôm sam ƀŭt gay nuĭh gĭt mbra dơi rêng hvi tâm nău rêh jêng, jêng du nău rêh nti nsơm. Gay đăp mpăn nău aơ n’gor, nkuăl, xă n’hanh lĕ rngôch ăp gưl n’gâng kan Trung ương tât ƀon lan râng ƀư da dê, rêng hvi ngăn ngên nău răk ndrôm sam ƀŭt jêng nău ƀa ƀơ tâm nău rêh jêng kon nuĭh.

Đah trong thư viện bah n’gor tât bah dâng, tủ ndrôm sam ƀŭt pháp luật, tủ ndrôm sam ƀŭt bưu điện-văn hóa xă, tủ ndrôm sam ƀŭt pôih tahen n’har bri, ndrel đah ăp thư viện hăn ăp ntŭk dơi ndơ̆ tât ăp ƀon lan, ngih sam ƀŭt ta Dak Lak, lĕ ntơm dơi mât uĕh tam, rhŏ nău ŭch răk sam ƀŭt bah nuĭh ƀon lan, ngăn lah kon se, kon hŏk ta nkual jru ngai, nkual n’har bri, nkual dŭt jêr jŏt. Tă bah nĕ rgop ƀư an văn hóa răk nar lơ dơi rêng hvi.