VOV4.M’nông: Ƀư tĭng bôk nău kan rƀŏng tĭng lam dak ndâk njêng ƀon lan mhe, âk ƀon, âk lan, xă ta nkual Tây Nguyên lĕ rgâl nanê̆. Nău rêh drăp ndơ, nuih n’hâm bah nuĭh ƀon lan dơi hao âk. Đah xă Cư Sê, nkuăl Cư Mgar, n’gor Dak Lak ri rgâl mhe nĕ lah trong điện, trong hăn, ngih dak si lĕ tât ƀon, tât lan. Kônh wa ăp ƀon lan tâm xă ndrel nuih n’hâm ntrôl dăng nkra njêng, nsrôih hao ƀư sâm ndrŏng.

Si nkao ntŭk ntô kloh uĕh, ngih wâl têh ang, nuĭh ƀon lan rhơn, nĕ lah nău ăp nuĭh saơ kloh rnôk hăn ta ăp trong bê tông njok ăp ƀon Sút Hluốt, xă Cư Sê, nkuăl Cư Mgar, n’gor Dak Lak. Wa H Đan Niê, Kruanh ƀon Ƀon Sút Hluốt ntô̆ n’hao, bah du ƀon ach o, ơm sat, knơm bôk nău kan ndâk njêng ƀon lan mhe, Sut Hluốt lĕ rgâl. Ntung trong uĕh, ndơ lŏ mir, nău rêh bah kônh wa dơi hao. Ndrel đah nĕ dơi nti ren, n’hao nău wât dơi pơk ang đŏng.

“Bah rnôk ƀư tĭng bôk nău kan ƀon lan mhe, ƀon lan bah gâp lĕ geh âk nău rgâl nkôp đah bah năp. Nuĭh ƀon lan wât lơn tâm kơl hun hao wăng sa, mât rong, tuch tăm, nkra njêng cà phê tĭng kỹ thuật mhe. Nău ntĭm nti dơi uănh đŏng, mô hôm geh kon se ntlơi nti, ăp oh nti nsơm tât lôch đại học, cao đẳng, nti phổ thông tĭng di rnoh năm ntrŭnh. Nău ma nsông nsao dơi ƀư tĭng nău way ơm dơh ngăch, mô ƀư khĭt ôm jŏ nar ƀư hoach mông nar, tih nău ntrŭnh njrăng n’gang srê, khuch tât đăp mpăn ƀon lan”.

Bu ur xă Cư Suê mât chăm ăp trong nkao

Tâm ban kơt ƀon Sút Hluốt, lĕ 10 thôn, ƀon bah xă Cư Suê rgâl mhe bah ndâk njêng ƀon lan mhe. Trong hăn nâp uĕh n’hanh trong điện lĕ lam xă, kơl kônh wa dơi ntrôl dăng nkra njêng, văn hóa, dak si, ntĭm nti uănh mĭn ntuh kơl, kơl kônh wa n’hao nău rêh ăp ntil. Rnoh dơi dŏng dak kloh uĕh geh rlău 88%, rnoh dŏng điện đăp mpăn, ƀa ƀơ geh 100%... Wa Y Hoa Niê, nuĭh dơi nsing nơm ƀon Sút Mđưng, xă Cư Suê uănh năl:

“Nkôp đah bah năp đaơ ri nuĭh ƀon lan lĕ wât n’hanh gĭt âk lơn, geh nău rgâl tâm rnôk nkra njêng, tuch tăm lŏ mir, knơm nĕ n’hao săk geh, uĕh kah lơn. Nuĭh ƀon lan gơih nđơr ƀư sa, tĭng di ăp nău ntrŭnh, nău kơl bah ngih dak si, ndâk njêng ƀon lan nar lơ hun hao, mô an ăp nău kơt bah năp đaơ way ngêt sa ndăng, mô ŭch pah kan, Nar aơ ƀon lan geh âk nău rgâl”.

Wa Đặng Văn Hoan, Kruanh UBND xă Cư Suê, nkuăl Cư Mgar an gĭt, bah dŭt năm 2018, xă Cư Suê lĕ tât lor ƀon lan mhe. Tât aƀaơ, Cư Suê nsrôih n’hao tâm ăp rnoh đă ƀư n’hanh rƀŏng tât ndâk njêng ƀon lan mhe hao prêh. Năm 2021 aơ, nău geh rĭng bôk nuĭh bah xă geh 52 rkeh prăk, hao 18 rkeh prăk nkôp đah năm 2019, rnoh rnăk ach o lah nuĭh rnoi mpôl đêt bah nkuăl lĕ hŭch, aƀaơ hôm 3%, rnoh rnăk sâm geh nar lơ hao. Năm tât, Đảng ủy, UBND xă mĭn tay “hun hao gay đăp mpăn, bah nĕ tâm ăp nghị quyết n’gluh an dŭt uănh hun hao wăng sa. Wa Đặng Văn Hoan an gĭt tay:

“Kuăl jă kônh wa an rgâl ntil tơm tăm, ndâk njêng ăp ntrong kan wăng sa rgum kơt ăp hợp tác xã lŏ mir tăch rgâl gay n’hâm ƀư rwăt tăch nkret njêng ăp ndơ bah ƀon lan. Ndâk njêng tay 1 hợp tác xã cà nâp nâl ta ƀon lan gay wăch rgum ƀon lan rnoi mpôl đêt râng tâm hợp tác xã gay m’hâm ƀư nău khlay kơt ndoh ndơ uĕh lơn. Tal 2 ndâk njêng pâl nđaih ntŭk gŭ rêh gay nău plơ̆ tay ach o n’hanh ndâk njêng xă hao mpeh nău wăng sa”.

Đah ăp săk rnglăy lĕ dơi geh, ndrel đah nău nsrôih bah n’gâng kan ƀon lan n’hanh nău wât, nsing nơm nău rêh bah ƀon lan nuĭh Êđê ta xă Cư Suê, nkuăl Cư M’gar, nar lơ hao.

Trong hăn tâm xă ƀon lan mhe Cư Suê, nkuăl Cư Mgar, n’gor Dak Lak

Nău rhơn lah lĕ rngôch nuĭh ƀon lan ta nkuăl Cư Mgar lĕ wât nău tơm khlay jêng dŭt n’hâm râng rgop soan, rgop ndơ an ndâk njêng ƀon lan mhe. Gung trong ta nkuăl tŏng ăp boăt nthoi tât ăp xă, rlău 90% trong nkuăl lĕ dơi tuh chay n’hanh bê tông. Tâm ăp năm bah năp tơm prăk ntuh kơl an bôk nău kan ndâk njêng ƀon lan mhe ta nkuăl geh rlău 1.000 rmen prăk. tâm nĕ, rgŏ jă ƀon lan rgop bơi 56 rmen prăk n’hanh rlău 22.000 nar luh. Lvang 2021-2025, nkuăl Cư Mgar, n’gor Dak Lak n’hao uĕh ăp rnoh ndơ lĕ geh, hun hao jru hvi ăp ndơ rƀŏng tĭng trong dăng bah nkuăl lah văn hóa, pâl nđaih. Nkre, rgum ntuh kơl ntung trong tâm ban, mĭn uănh nău rêh, đăp mpăn rnă njrăng, ntŭk ntô ƀon lan. Nsrôih geh rĭng bôk nuĭh ăp năm hao da dê, rnoh rnăk ach o hôm bah dâng 5%; nsrôih geh “Nkuăl ƀon lan mhe”.

          Nuĭh rblang: Y Sưng Phê Ja