VOV4.M'nông: Xã Đạ Chais, nkuâl Lạc Dương, n'gor Lâm Đồng geh bơi 85% rnoh nuĭh lah nuĭh rnoi mpôl đê̆ K’ho. Nơm geh mât uĕh nuih n'hâm rŏng dak bah nkual gŭ nde cách mạng, bah xã dăng janh tahen ƀon lan, ntop đah nău mât uănh ntuh kơl bah Đảng n'hanh Ngih dak mpeh ăp ntil, Đạ Chais hŏ ngăch rlău dơi jêr jŏt, klaih rlău ach o n'hanh jêng xã di rnoh gưl neh dak mpeh rdâk njêng ƀon lan mhe.  

          Bah nkual ƀon têh Đà Lạt, hăn rlău 60km ta trong quốc lộ 27C rƀŏng let dak lêng Nha Trang lah hăn tât nkual gŭ nde cách mạng Đồng Mang, aƀaơ lah xã Đạ Chais bah nkuâl Lạc Dương (Lâm Đồng)- nkual gŭ nde cách mạng dơi uănh lah mô geh nuĭh dơi lăp lơh, lah ntŭk nsing nâp, mât njrăng đăp mpăn an tahen du bông lơh Mỹ kơl neh dak n'hanh mpôl phŭng rlăng ngụy quân, ngụy quyền, mât nâp trong me khlay nthoi tât ăp n'gor Nam Tây nguyên đah Khánh Hòa, Ninh Thuận.

Tĭng tahen ơm Kơ Dơng Ha Dương, ta thôn Tu Poh, xã Đạ Chais, hŏ geh 17 nuĭh K'ho ta aơ hŏ khĭt n'hanh dơi nchih săk nkah ta ndah rup nkah ndray bah xã n'hanh nkuâl. Khân păng lah nuĭh ntoh lư bah ăp nuĭh kon han săk bah yôk bri Tây Nguyên du rơh hŏ ndrel đah ƀon lan bah he ndrel njêng ntŭk gŭ nde cách mạng dja. aƀaơ, ta aơ hŏ jêng xã ƀon lan mhe, đah âk săk geh n'hanh dơh uĕh gay hun hao tay, di đah săk ntơ xã dăng janh tahen ƀon lan.

          “Ntơm nơh nkual căn cứ cách mạng, way ntrơn hăn âk tơ̆, aƀaơ ri hŏ đăp mpăn gŭ rêh, pah kan jan sa đăp mpăn, nău rêh mô hôm jêr jŏt kơt kăl e nơh đŏng ôh. Nơm geh ngih dak mât ŭanh ndơ̆ rgâl trong tăm cà phê, hồng, bơ, mắc ca… ăp  ntil tơm tăm jêng nău rêh nuĭh ƀon lan hŏ đăp mpăn. Bôk nău kan ƀon lan mhe dơi an ƀư, gung trong, nhih nti, nhih dak si hŏ dơi ntuh kơl têh uĕh, nău rêh hun hao, ăp tŏng, hơm răm hôm". .

          Ntơm bah du xã jêr jŏt, ji ngot mbro đah bơi 50% rnoh nuĭh mpeh săk ach o, nơm geh an ƀư ăp kôp n'hanh geh nău tam  ăp bôk nău kan, trong kơl bah Đảng n'hanh Ngih dak, lơn lah nănh dŏng rgâl mhe khoa học kỹ thuật tâm nău kan tuch tăm, hun hao tơm jong nar...rĭng geh tĭng bôk nuĭh bah Đạ Chais hŏ n'hao 43 rkeh prăk/năm, rnăk ach o aƀaơ hôm rlău 6%. Ăp trong kan ntĭm nti, dak si, văn hóa geh njuat hun hao mbơh oi, rnă njrăng chính trị n'hanh đăp mpăn lam rêh jêng kon nuĭh way dơi mât nâp. Ta năp nău rgâl bah ƀon tơm he nơm, wa Bon Tô Xa Nga, ta thôn Đưng K’Sị, xã Đạ Chais an gĭt mbra rgŏ jă tay kon său nsum ti ndrel đah ƀon lan tĭng ƀư geh nău dơi ăp bôk nău kan tă bah n'gâng kan ta ntŭk rgŏ jă, nsrôih ndơ̆ Đạ Chais hun hao tĭng nar:

          “Rdâk njêng ƀon lan mhe ri ân nsrôih hun  hao wăng sa, n'hao geh wăng sa n'hanh săk ăp nuĭh ƀon lan nơm ân gĭt râng êng. He ân nkoch trêng  rgŏ jă, têk ndrêng rơh mom ndăm bah kơi, ŭch ƀư dơi nău nê ri săk nơm ân dâk chŏl lor leo ƀư".

          Nsing ta ăp nău hŏ dơi geh, xã Đạ Chais dôl nsrôih tât di rnoh rdâk njêng ƀon lan mhe tâm năm 2022. Tĭng wa Liêng Jrang Ha Thuyên, Groi kruanh UBND xã Đạ Chais, tă khuch bah nuh srê Covid-19 jêng nău ƀư tât rnoh kan dja tĭng di trong nchrăp dŭt jêr jŏt. Yơn lah, ta năp ăp nău dơi kloh bah nău bên di đah plơ̆  tay kơt ơm mhe tâm njrăng, n'gang Covid-19 bah Chính phủ, ntop đah nău nsum suan, du nuih n'hâm bah ƀon lan n'hanh lam trong kan chính trị, Đạ Chais mbra nsrôih lĕ n'hâm suan bah he gay tât di rnoh rdâk njêng ƀon lan mhe ntop hao tâm năm aơ.

          “Ntơm bah nău nsum suan, du nuih n'hâm bah kônh wa ƀon lan ri xã hŏ dơi tât lĕ rngôch 19 ntil rnoh nău kan ƀon lan mhe tâm năm 2019. Gay mât uĕh tay ăp nău dơi hŏ geh, đăp mpăn ăp rnoh tât hŏ dơi geh n'hanh hăn tât xã ƀon lan mhe ntop n'hao tâm năm 2022 n'hanh ăp năm bah kơi nê, rlău ma nău mât uănh ntuh kơl bah Đảng n'hanh Ngih dak, ân geh nău nsum ti bah lam trong kan chính trị ndrel lăp kan. Tâm nê, lơn lah ân mât uĕh nău khlay kan bah ăp tahen ơm, ăp nuĭh geh nsing nơm ta ăp ƀon lan gay ntrôl dăng lơn đŏng pah kan nkoch trêng, rgŏ jă ăp nuĭh ƀon lan râng, nsum suan, du nuih n'hâm gay ndrel rdâk njêng ƀư lôch jêh rdâk njêng xã ƀon lan mhe ntop n'hao tay".

          Đạ Chais lah xã dăng janh mpôl tahen rnă njrăng ƀon lan, lah nkual gŭ nde cách mạng rôih dăng đah ăp nuĭh kon mô dơi roh ndâp, rôih dăng tâm lơh tâm su n'hanh gơih nđơr tâm pah kan jan sa. Yor kơt nê̆, mĭn lah nău ŭch tât rnoh rdâk njêng ƀon lan mhe kơi ntop n'hao tay mbra ơm dơi tât geh tâm ôi tay klak, ngăch rdâk njêng Đạ Chais jêng ngoăy tâm ăp  nkual rgum tơm wăng sa geh ndrŏng bah nkuâl Lạc Dương lah êng n'hanh Lâm Đồng lah nsum./.

Nuĭh rblang: Điểu Thân