Rnăk wa Ngô Thị Khải, nuĭh ƀon lan thôn Phú Mỹ, xă Đình Tổ, nkual têh Thuận Thành, n’gor Bắc Ninh lah ngoăy tâm âk rnăk dơi săch ƀư lor mbơh ƀư ntrong kan tâm rlak ndŏk nja ta ntŭk tĭng rnoh ndơ ƀư ndâk njêng thôn ƀon mhe rup gui. Ta rnăk wâl, ndŏk nja dơi pă an 3 thùng êng-thùng an ăp ntil dơi nkra njêng tay, geh gri, ƀoăt ka su, n’ha rđaih, loih... thùng an ndŏk nja vô cơ n’hanh thùng an ndŏk nja hữu cơ. Êng ăp ntil ndŏk nja hữu cơ rnăk wâl mbra mkra êng đah chế phẩm sinh học EMO gay rgâl pơng jêng phân poh an tơm tăm. Wa Ngô Thị Khải nkoch, ntrong ƀư aơ dơi nuĭh ƀon lan kơl yor rgop mât nkual ƀon lan gŭ kloh uĕh, n’hŭch rnoh ndŏk nja luh ntŭk gŭ âm:

Gâp lah du hê Đảng viên hăn lor mpeh trong kan đăp mpăn ntŭk gŭ âm. Lơn lah tâm rnăk wâl, oh nô, nuĭh bên ƀư tĭng tâm rlak ndŏk nja ta rnăk wâl. Gŭ tâm rnăk wâl he rklak ƀư 3 ntil. Ăp dak djiah kơt biăp rsat, piăng dak rmeh he an êng du ntŭk n’hanh he mbra dŏng gay ƀư chế phẩm EMO gay dŏng dak phân nĕ tŏ an biăp mô lah sŏk âk ri he cheh an ba.

Xă Đình Tổ, nkual têh Thuận Thành, n’gor Bắc Ninh lĕ tât lor ndâk njêng thôn ƀon mhe n’hao prêh tâm năm 2021. Mkra ăp nău n’hôl ƀo yor ndŏk nja, dak djiah bah rnăk mât rong, ăp rkum nkra njêng lah trong mkra khlay xă Đình Tổ ƀư tĭng gay mkra nu nău n’hôl ƀô ntŭk ntô gŭ âm mhe ntoh ta ntŭk. Yơn lah, tĭng kôp rnoh ndơ ƀư tâm lvang 2021-2025, rnoh ndơ ƀư mrô 17 mpeh ntŭk ntô gŭ âm n’hanh đăp mpăn ndơ sông sa geh âk nkô̆ nău âk lơn n’hanh jêr ƀư. Ăp jêr jŏt aơ dôl dơi ƀon lan rgum dôh rklaih. Wa Nguyễn Văn Thành, Kruanh UBND xă Đình Tổ nkoch:

Aƀaơ, mpôl hên jêr jŏt ngăn lah mkra dak djah rgum tâm nkual ƀon lan gŭ. Nău tay lah jêr mpeh rnoh ndơ ƀư uĕh kloh ntŭk ntô gŭ âm. Aƀaơ tĭng rnoh ndơ ƀư mhe, an geh rlău 65% rnoh rnăk dơi dŏng dak kloh uĕh tă bah ăp ntŭk pă rgum. Tĭng nău ơm ri knŭng kâp ăp rnăk dŏng dak tâm di kloh uĕh.

Bah năp đaơ, đah rnoh ndơ ƀư ntŭk ntô gŭ âm bah xă thôn ƀon mhe, knŭng nuĭh ƀon lan geh trong mkra, rgum ndŏk nja lah dơi. Yơn tĭng kôp rnoh ndơ ƀư xă thôn ƀon mhe lvang 2021-2025, ntrŭnh đă đêt ngăn 30% rnăk tâm xă an ƀư tĭng tâm rlak ndŏk nja ta tu tơm, rnoh dak djiah ka su dơi rgum, dŏng tay, mkra tĭng nău ntrŭnh an geh 50%. Aơ lah nău mô dơi dơh đah ƀon lan yor nău wât bah nuĭh ƀon lan du đêt ntŭk hôm e đêt. Wa Hoàng Thanh Bình, Groi kruanh UBND xă Cao Đại, nkuăl Vĩnh Tường, n’gor Vĩnh Phúc an gĭt: Gay dôh rklaih an rnoh ndơ ƀư ntŭk ntô gŭ âm tâm ndâk njêng thôn ƀon mhe, Đảng ủy, UBND xă n’hao cán bộ geh nău way kan hăn bah dâng tâm rgop ntĭm, dôh rklaih wăk kol tâm rnôk mbơh ƀư. Nkre, ƀư âk nău kan ngăn hăn ndrel đah nău rgŏ jă “Ndâk njêng rnăk wâl 5 mô, 3 kloh uĕh”-sŏk đảng viên n’hanh nuĭh djôt bôk ăp gưl hội lah nuĭh tơm tâm trong nkoch trêng, hăn lor ƀư tĭng:

Đảng ủy UB mpôl hên jao an ăp rmôt bu ur, rmôt ƀon lan, ăp nuĭh kruanh tổ liên gia, ăp đồng chí Đảng viên tâm chi bộ lah ăp nuĭh ntrong leo hăn lor tâm trong kan nkoch trêng an mpôl hên rlong ƀư lor. Jêh nĕ mpôl hên mư pơk hvi. Tât aƀaơ nuĭh ƀon lan lĕ dơi bên tâm rlak ndŏk nja ta ntŭk ƀư phân compot.

Dơi uănh lah rnoh ndơ ƀư “dơh” mô kâp âk prăk ntuh kơl bah ngih dak, ndrĭ yơn rnoh ndơ ƀư ntŭk ntô gŭ âm lŏ dôl nău mkra jêr đah âk ntŭk. Tĭng wa Phùng Xuân Tiến, groi chánh Văn phòng điều phối bôk nău kan ndâk njêng Thôn ƀon mhe Vĩnh Phúc, gay dơi mkra nău jêr aơ, n’gâng kan ƀon lan an hăn lor, đê̆ đŏng janh ƀư mhe ri ăp nău rƀŏng mư ơm jêh, tât lor. Bah meng nĕ, an rgŏ jă ăp nuĭh, ntrôl dăng kon nuĭh tâm rgop, râng bah ăp ntil wăng sa ntuh kơl an trong kan mât njrăng ntŭk ntô gŭ âm:

Nău wăch rgum tât râng bah nuĭh ƀon lan, doanh nghiệp lah dŭt khlay. Lah he ƀư uĕh trong kan kon nuĭh tâm rgop, rgŏ jă nău rgop bah doanh nghiệp, rmôt kan êng nuĭh; rgŏ jă dơi tât râng bah nuĭh ƀon lan ri ăp rnoh ndơ ƀư mpeh văn hóa, ntŭk ntô gŭ âm, dak kloh uĕh... mbra dơi ƀư săk rnglăy.

Ntuh kơl prăk, n’gluh an rnoh an n’hanh ntĭm na nê̆ ƀư tĭng ndơ ƀư ntŭk ntô gŭ âm tâm ndâk njêng thôn ƀon mhe, aơ lahtrong mkra rơih jêr an ntŭk ntô rêh ta ăp ntŭk thôn ƀon nar lơ dơi rgâl.