Tâm rơh mprơh Mỹ, xã Hà Đông, nkuâl Đak Đoa, n'gor Gia Lai lah nkual căn cứ cách mạng. Mât uĕh nău way ơm dăng janh, ƀon lan xã Hà Đông nsan hao tay rdâk njêng ƀon tơm nar lơn ma hun hao.  

Wa Đinh Đăm – Bu ranh ƀon Kon Sơ Nglok, xã Hà Đông, nkuâl Đak Đoa, n'gor Gia Lai nkoch tay: xã Hà Đông tâm rơh tâm lơh kăl e ach o, krit jêr, nuĭh ƀon lan mô dơi joi geh du ngan piăng sa hơm. Yơn rnôk dơi kuăl jă râng tâm lơh, lĕ dĭng nuĭh du nuih n'hâm nsum suan gay kơl cách mạng tât nar lơh dơi lĕ rngôch. Rnôk nê nơh, ƀon lan ta xã nsrôih ƀư mir ba gay geh phe, geh puăch kơl an tâm lơh. Ăp rnăk rgop du ngan phe, nuĭh geh âk kơl  âk an tahen. Ƀon lan he ji ngot mbra sa  bum sa biăp dơi yơn mô dơi an tahen ji  ngot. Bu ranh Đinh Đăm nkah tay:

"Nuĭh ƀon lan he dơi djăt tĭng cán bộ gŭ mât njrăng ƀư rơh hop, ndrel nchră trong rklaih luh neh dak gay nsĭt tay nău rêh đăp mpăn hơm răm, ri nuĭh ƀon lan joi tât. Nuĭh ƀon lan mô ŭch rêh ta nâm nău bu tŭn jot, lơh dong nuĭh ƀon lan, ŭch rŏng rêh đăp mpăn hơm răm jêng nuĭh ƀon lan tĭng cách mạng, ndrel tâm rnglăp, tâm nkrum nsum, mô tâm nkêh êng. Ntơm nơh, phŭng rlăng krit djơh ngăn joi trong nhŭp krŭng, lơh dong, ntŭng sŭr djăr jêng kônh wa mô ŭch, dŭt nuih ăl ngăn"

Gŭ nklang bri rđŭng jru đah ăp nău jêr jŏt, Hà Đông dơn geh nău rgâl uĕh rnôk dơn geh nău mât uănh khlay bah Đảng n'hanh ngih dak an nuĭh ƀon lan nkual jru ngai nkual rnoi mpôl đê̆ dơm. Nơm geh kơt nê, gung trong bah xã Đak Sơ Mei tât xã Hà Đông tâm năm 2015 lah ngoăy tâm ăp mâng rđăt an Hà Đông hung jong. Đah aƀaơ rlău 2 năm dơm, bah ăp trong kơl bah ngih dak, ntung yŭng tâm ƀon hŏ dơi rgâl ma ntung bê tông jong 100 mét, hvi 3 mét, nthoi 5 ƀon nsum. Nô Đinh Nhưc, ta ƀon  Ma Har, xã Hà Đông rhơn nđơr, nkoch:

"Ntơm nơh, ntung, trong mô geh rsong hăn dŭt jêr jŏt. Aƀaơ hŏ geh ntung mhe, nău rsong hăn, rdeng tuh mbo bah kônh wa, dơh an hăn ƀư mir ba, rsong hăn bah kônh wa. Ăp kon se jê̆ tâm ƀon hăn nti mô ir roh âk mông nar, gung trong kloh uĕh, lah uĕh Đảng n'hanh Ngih dak hŏ mât ŭanh tât ntŭk  hôm âk jêr jŏt"

Ntơm nơh, nuĭh ƀon lan ta xã Hà Đông dơn gĭt ƀư ba mir săk geh đêt dơm. Aƀaơ, kônh wa hŏ gĭt tăm ba lŏ 2 tơ̆. Ndrel đah nê, nuĭh ƀon lan tâm xã hŏ tât dơi đah ăp ntil tơm tăm mhe kơt bời lời, cà phê, dŏng rgâl mhe khoa học kỹ thuật tâm nău kan tuch tăm, mât rong gay hun hao wăng sa rnăk wâl. Aƀaơ, nkah tât "nuĭh geh ndrŏng Ba Na Đinh Hùng ta ƀon Kon Sơ Nglok, kônh wa tâm ƀon rnê da dê yor nô hôm ndăm ma wăng sa jăp blău way kơl ăp nuĭh. Aƀaơ, Đinh Hùng dôl geh 4ha cà phê an klêh play, 5ha keo, 3 ha tơm lha bầu an nsĭt geh rlău 300 rkeh prăk ăp năm. Ntơm bah rnăk hôm ach o, tât năm 2019, Đinh Hùng jêng găr ntil ƀư wăng sa jăp blău ta ntŭk. Nô Đinh Hùng nkoch:

"Ntơm nơh kônh wa dơn gĭt ƀư mir ngăn dơm yơn jêh aơ nơh dơi kơt nti trong tăm tơm keo, tăm rơ̆ jêng âk cà phê dŏng khoa học. Êng tơm lha bầu he dơi Đảng ủy xã n'hanh n'gâng kan xã uănh khlay đă hăn nti nău tă ơm gĭt tăm ta xã Đak SơMei. Lôch rnôk tăm ntil tơm dja saơ đăp mpăn n'hanh he ntĭm nti an kônh wa tâm ƀon hun hao trong leo kan dja".

Uănh saơ ăp nău rgâl bah xã Hà Đông rlău ăp năm, wa Hoàng Cam, Bí thư Đảng ủy xã Hà Đông nkoch: Nău rêh bah nuĭh Ba Na ta xã Hà Đông tât aƀaơ bol hôm âk jêr jŏt yơn hŏ geh dŭt âk rgâl mhe rđĭl đah ntơm nơh. Dơi geh nău mât uănh bah ăp gưl, n'gâng kan, điện trong nhih dak si hŏ ăp tŏng an nău geh tơm bah kônh wa. Ntoh bah xã dŭt jêr jŏt jêng tĭng ƀư Bôk nău kan gưl neh dak mpeh rdâk njêng ƀon lan mhe, xã Hà Đông aƀaơ dơn geh 9/19 rnoh tât kan. Rĭng geh tĭng bôk nuĭh tâm năm 2022 rlău 11 rkeh prăk. Let năp tay, gay kơl Hà Đông hun hao lơn, gưl ủy, n'gâng kan xã n'hanh nkuâl Đak Đoa n'gluh âk rnoh tât kan, trong rƀŏng gay ndơ̆ Hà Đông hun hao.

"Xã dôl rgum đăng ký gay an ƀư bôk nău kan gưl neh dak mpeh hun hao wăng sa rêh jêng kon nuĭh nkual rnoi mpôl đê̆ tâm ban kơt bôk nău kan gưl neh dak hŭch ach o. aƀaơ geh trong nchrăp kan dăp rgum đăp mpăn ntŭk gŭ jŏ jong, ntoch an ƀon lan gŭ 5 thôn, ƀon, tâm pă nkual ƀon lan gŭ mhe. Tâm nê ri geh ntuh kơl điện, trong, dak dŏng gay ƀon lan mbra ntoch hvi ntŭk gŭ rơh kon său bah kơi tay mbra rơ̆ jêng hăn tât gŭ ta nê. Njêng suan ntrôl hun hao an n'gâng kan ta ntŭk dŭt têh, nău rêh nuĭh ƀon lan dơi n'hao prêh, jut jăng ji ngot, kơl kônh wa hun hao"

Tât Hà Đông nar aơ, mbra saơ dơi nău rgâl ta nkual căn cứ cách mạng dja đah ăp jay mhe, dâng sre nđĭr ŭeh lâng hvi, ăp mir cà phê nđĭr uĕh. Ndrel đah nău mât uănh bah Đảng n'hanh Ngih dak ma ăp bôk nău  kan gưl neh dak mpeh n'hŭch ach o, kônh wa nuĭh ƀon lan ta nkual neh dăng janh mât uĕh tay nău way ơm, n'hao têh jong săk he tâm rơh mhe n'hanh nar lơn ma hun hao./.

Hoàng Qui/Nuĭh rblang: Điểu Thân