ảnh

VOV4.M’nông: Xă Đăk Sơ Mei (nkuăl Đak Đoa, Gia Lai) lah nkual căn cứ cách mạng tâm 2 rơh tâm lơh tâm su mprơh Pháp n’hanh Mỹ, lah ƀon tơm bah anh hùng Wừu. Jêh 47 năm ndâk njêng, Đăk Sơ Mei du rơh bom min aƀaơ lĕ rgâl mhe đah âk trong hăn bê tông tâm mir cà phê uĕh nđĭr, tơm sa play n’hanh ăp lôk bri tăm, ăp thôn ƀon đah âk jay têh mhe.

Bu ranh ƀon Đinh Nhếp (thôn Tul Doa) tă ƀư du hê dân quân rnôk tâm lơh mprơh Mỹ. Tâm jay nhih uănh tâm mir cà phê dôl dang nkao, wa nkoch mpeh ăp nar rlăng lơh, lĕ ƀon hăn du tâm yôk; nkoch mpeh anh hùng Wừu, nuĭh kon bah Đăk Sơ Mei âk tơ̆ geh rlăng nhŭp, lơh mbram n’gul khĭt n’gul rêh yơn du nuih n’hâm ndrel đah Cách mạng; leo rlăng lăp tâm ntŭk kâp ndrap gay nkhĭt lơh rlăng, hôm wa khĭt tâm n’gâr phao rlăng. Wa nkoch đah ăp năm khay ƀon lan sa bum bri, sa klĕ, ntêm rgop ndơ sa, phe ba mât tahen, tât nar lơh dăng lĕ rngôch. Bu ranh ƀon Đinh Nhếp hoch dak măt nkoch:

“Bah năp đaơ ăp jay geh 50 sah phe ri an cách mạng 25 sah, he sŏk 25 sah, ƀư geh đêt ri an đêt, geh âk ri an âk. Nuĭh ƀon lan ngêt sa dŭt njê yor bôh mô geh, ƀŏt ngŏt n’hanh dak mắm mô geh đŏng, knŭng sa biăp bri dơm, rnôk nĕ njê ngăn yơn hôm e tĭng Đảng, tĭng Wa Hồ, tĭng Đảng n’hanh cách mạng dơm, jêr jŏt ndâk âk tĭng đŏng”.

\

Bu ranh ƀon Đinh Nhếp (ta n’gul) nuĭh tă râng tâm lơh tâm su mprơh Mỹ

Bâr ngơi bu ranh ƀon Đinh Nhếp răm ngăn rnôk nkoch đah ƀon Tul Doa ndrel lĕ xă Đak Sơ Mei nar aơ rnôk gung trong lĕ jêh, hăn nsong dơh. Rơh druh ndăm âk oh hăn nti lĕ jrô 12, geh oh nti tât đại học. Kônh wa tâm ƀon lĕ gĭt tăm cà phê tĭng tâm di uĕh kah lam ntŭr neh. Neh sop ri kônh ưtăm bri, neh uĕh ri tăm tay play đŭr, play jrang, sầu riêng..,. khlay wăng sa âk.

Wa Chrêng, Bí thư Đảng ủy xă Đăk Sơ Mei an gĭt: mât uĕh nău way ơm bah xă anh hùng, n’ăp trong chính trị rgŏ jă  nuĭh ƀon lan rgum hun hao wăng sa, jŭt jăng ach o ji ngot. Nău rgâl ntil tơm tăm bah tuch tăm ba mir an tăm tơm jŏ năm, tơm sa play... lĕ kơl nău rêh bah nuĭh ƀon lan rgâl ngăch.

“Du xă dŭt jêr jŏt bah nkuăl, nkual 3, dơi an lah ngăch hun hao di trong, nău rêh wăng sa bah kônh wa ntơm hao, rnoh rnăk ach o nar lơ hŭch, nău rêh bah nuĭh ƀon lan ntơm dơi hao. Bôk năp knơm nău uănh mĭnh bah Đảng n’hanh Ngih dak, bah gưl ủy n’hanh lĕ trong chính trị ta ntŭk n’hanh nău nsrôih bah nuĭh ƀon lan gay hun hao wăng sa, jŭt n’hŭch ach o”.

Kônh wa nuĭh Ba Na ta Đăk Sơ Mei lĕ ntơm rlet rlău jêr jŏt hao jêng rnăk sâm geh, dơi ndâk ƀư jay têh uĕh.

Tâm ăp nău rgâl lĕ rngôch dôl geh ta Đăk Sơ Mei, rgâl nău mĭn, trong ƀư, trong rêh bah nuĭh ƀon lan, geh nkô̆ khlay. Tĭng nô A Lanh Đinh Yôn, 37 năm (thôn Tul Doa), kônh wa Ba Na aƀaơ mô knŭng gĭt khoa học kỹ thuật ma hôm gĭt mĭn ntuh kơl, gĭt dŏng prăk mhâm an uĕh. Kơt rnăk nô, bah geh dâk âk dŏng dâng nĕ, aƀaơ lĕ ntêm nkrem tâm di đah nău geh rlău 200 rkeh prăk du năm. Nô A Lanh Đinh Yôn nkoch:

“Lor rnôk ntơm ƀư gâp mô geh naư blău ơm, yơn bah kơi aơ geh jrô tiăr nti, xă ƀư tiăr nti gay nkoch ntĭm khoa học kỹ thuật ri gâp râng n’hanh nti. Jêh nĕ gâp nti ăp nuĭh kiău ma, ăp mir tâm êp bu lĕ blău ri he ôp nti tay. Lah nsum gâp mô hŏ blău ngăn yơn geh nău blău ơm đŏng, nuĭh ŭch nti ri gâp trêng ntĭm đŏng”.

Ta ƀon tơm anh hùng Wừu, nuĭh ƀon lan ntŭk aơ way nkah mro an lah ăp nău roh hoach nting soan bah u che bah năp đaơ n’glơi an nău rêh hơm răm nar aơ. Nuĭh Ba Na ta nkual neh aơ dôl nchih tay ăp nău uĕh, tâm rnglăp ndrel ty ndâk njêng ƀon tơm nar lơ hun hao./.

          Nuĭh rblang: Y Sưng Phê Ja