Tâm ăp năm aơ, ăp trong leo tâm rlong rŏng dak n’hanh ăp rơh rgŏ jă bah Mặt trận tổ quốc ăp gưl ta nkuâl Châu Thành, n’gor Sóc Trăng n’hanh ăp mpôl kan nsum rgŏ jă, an ƀư  way ntik n’hao nău tam kan n’hanh  ring lam jru hvi tâm  nsum mpôl lam ƀon lan.  Lơn lah, nău ntrôl dăng tĭng ƀư rơh rgŏ jă “Lam ƀon  lan tâm rnglăp rdâk njêng ƀon lan mhe, nkual ƀon têh rsang rnglăy” đah trong rƀŏng “Sŏk suan nuĭh ƀon lan mât nău rêh an nuĭh ƀon lan” hŏ rgop ƀư jêng “rgâl săk, lhut ntô” muh măt ƀon lan n’hanh nkual gŭ rgum ta ntŭk; nău rêh drăp ndơ n’hanh nuih n’hâm, săk geh nău rêh bah nuĭh ƀon lan geh nău rgâl kloh.

Sĭt ăp nkual ƀon lan bah nkuâl Châu Thành, n’gor Sóc Trăng tâm ăp  nar khay 6 dja, mpôl hên năl saơ dơi nău “rgâl săk lhut ntô” bah nkual  ƀon lan ntơm nơh ơm dŭt geh jêr jŏt. Mpôl hên mâp wa Danh Mô Ry ta ấp Giồng Chùa A, xã An Hiệp rnôk  păng dôl jik pih, mât chăm kao si njok 2 ding trong, păng lah, trong dja pơk hvi hŏ âk năm aơ hôm, mbluh đah âk ntŭk tâm nkuâl, kơt xã An Hiệp, Thuận Hòa, thị trấn Châu Thành… nkra dŭt uĕh an nkô̆ nău rsong hăn, nchuăn rdeng an kônh wa. N’hanh păng nchŏng  mpeh ăp mbor kao, tơm kiểng mhe lôch tŏ dak, n’gâng mpoh ang, nkre nkoch, aƀaơ  kônh wa nsum ti jik kuaih kloh uĕh gung trong mbra njêng dơi rup  uĕh, kloh rsang ta Phum Sóc bah he. Wa Danh Mô Ry, lah:

Aƀaơ gung trong nar lơn ma ƀư têh uĕh, srăch se hôm yơn đah nuĭh ƀon  lan he ri ân nsum ti, rgop suan mât chăm mbor kao tăm 2 ding trong, kơt jik pih, tŏ dak mbro gay an kao si luh jêng uĕh, njêng an rup uĕh phum sóc he ntơr uĕh lơn.

Gay dơi tât nău dja, ngoăy tâm ăp nău nsrôih bah nkuâl Châu Thành lah mặt trận tổ quốc ăp gưl hŏ ntrôl dăng tĭng ƀư lôch jêh rơh rgŏ jă “Lam ƀon lan tâm rnglăp rdâk njêng ƀon lan mhe, nkual ƀon têh kloh rsang” đah trong rƀŏng “Sŏk suan nuĭh ƀon lan mât chăm nău rêh an nuĭh ƀon lan”. Tĭng nê,  tâm 5 năm aơ, mặt trận tổ quốc ăp gưl tâm nkuâl hŏ ƀư  tơm, kan nsum an ƀư, pơk hvi trong ntĭt leo nău kan geh nău tam kơt: Rmôt ƀon lan  mât njrăng êng ndŏk mbrâm”, “rmôt ƀon lan njrăng n’gang nuĭh tih djơh, nău khuch lam rêh jêng kon nuĭh, nuĭh tih ma túy”, “Mpông mpêr ƀon lan mât njrăng êng”,  “Camera mât rnă njrăng” “Nklĕ khóa rnă njrăng”,“Mboh ang trong ƀon, rdâk njêng njăr trong ntĭt leo lor, cờ neh dak, tăm kao kiểng… Lơn lah, kan nsum rgŏ jă ƀon lan rgop tơm ndơ, rong neh, rong an mông nar rdâk njêng ntŭk ntô, hun hao wăng sa, hŭch bah ach  o jŏ jong, rdâk njêng nău rêh văn hóa, mât njrăng ntŭk gŭ rêh. Bah nê, hŏ rgŏ jă  ƀon lan rong an 15.000 m2 neh, rgop rlău 1,5 rmen prăk n’hanh rlău 19.000 nar luh  kan rdâk njêng ƀon lan mhe. Kơp tât kêng dŭt năm 2023, lam nkuâl geh 25.300 rnăk di săk rnăk văn hóa, âk rlău 98% n’hanh 100% nkual ƀon lan gŭ di săk ntơ nkual ƀon lan văn hóa. Wa Lâm Hiệp, ta xã Phú Tân ngoăy tâm ăp nuĭh ƀon lan geh âk nău rgop tâm rdâk  njêng ƀon lan nkoch:  

Rdâk njêng gung kơt nê nuĭh ƀon lan dŭt rhơn nđơr, Đảng, ngih  dak rvê an ƀon lan kơt nê lĕ dĭng nuĭh rhơn da dê. Mpeh  bah ri gâp rgop suan ƀư săp lŭ ta kơh n’hong dak gay nuĭh ƀon lan hăn luh lŏ sre đŏng, he nsrôih gay mhâm ƀư nuĭh ƀon lan dơi hăn. Bah ri ncho ndeh dơi n’hanh mpeh bah ri ncho ndeh dơi đŏng, mpeh bah  aơ lah ndeh puăn jâng, hôm mpeh bah ri lah ndeh 2 jâng.  

Wa Lê Hoàng Nuôi, Kruanh Uỷ ban MTTQ Việt Nam nkuâl Châu Thành an gĭt, nkuâl Châu Thành geh rlău 50% ƀon lan rnoi mpôl đê̆ gŭ rêh, tâm nê, dŭt âk lah ƀon lan Khmer. An ƀư ăp trong nchrăp, trong kơl bah đảng,  ăp bôk nău kan, trong nchrăp kan,  trong kơl ƀon lan rnoi mpôl đê̆ hŏ n’hao nău rêh, drăp ndơ nuih n’hâm bah  kônh wa  săk  ntơr lơn, bol ma kơt nê̆, nha hôm rnăk ƀon lan nuih ăl mpeh jay gŭ, nău rêh nha hôm jêr jŏt đŏng. Bol ma kơt nê̆, pah kan rgŏ jă ƀư  prăk nkrem  an “nuĭh ach o” dơi nkuâl an ƀư tay jru hvi. Ntơm bah năm 2019 tât aƀaơ, nkuâl hŏ rgŏ jă n’hanh dơi gưl n’gor ndơ̆ rgâl bơi 29 rmen prăk, ndrel đah ăp xã, thị trấn rgŏ jă geh 1 rmen 670 rkeh prăk, nkuâl hŏ an ƀư rdâk njêng geh 358 mblâm jay n’hanh nkra 12 mblâm jay tâm rnglăp. Rlău ma nê, ntop kơl săm ji, rvăt bảo hiểm y tế an 390 tơ̆ nuĭh, lĕ rngôch rnoh prăk rlău 18 rmen prăk, bah nê, rgop ndrel n’gâng kan  ta ntŭk n’hŭch rnoh rnăk ach o jŭr hôm 2,45%. Wa Lê Hoàng Nuôi an gĭt tay:

Mặt trận tổ quốc nkuâl hŏ nsrôih rgâl mhe nkô̆, trong kan đah nău ŭch lah dăch dêh  ƀon lan n’hanh geh nău dơn kan đah ƀon lan, mât njrăng nău geh tâm di bah nuĭh ƀon lan. Nkre mặt trận hŏ an ƀư ăp kôp ăp trong nkra tĭng ƀư pah kan nkah gĭt n’hâm suan, jut jăng ji ngot n’hŭch ach o, râng pah kan rdâk njêng n’gâng kan ta ntŭk, rgop rdâk njêng đảng kloh uĕh nâp dăng. Aơ  lah du nău dơn kan bah mặt trận tổ quốc rgŏ jă đah trong leo ƀư rdâk njêng ƀon lan mhe nkre đah ntŭk gŭ rêh kloh rsang tâm bah ri aơ nơh.

Ma rơh rgŏ jă hŏ ndop dơi âk nkô̆ ngăn ngăn, rdâk dăng tay  nuih n’hâm tâm rnglăp, dơi ƀon lan tâm ban ŭch  kơt tĭng ƀư, rgop suan ndrel đah Đảng, Ngih dak, n’gâng kan ta ntŭk rlău dơi jêr jŏt ntul rlong, đăp mpăn lam rêh jêng kon nuĭh, rdâk tay nău nsing nơm, nkô̆ tâm ƀon lan rgop tĭng ƀư geh nău dơi  nău dơn kan chính trị, wăng sa, văn hóa-rêh jêng kon nuĭh.