Ntơm bah ôi ơm, hang rhiăng nuĭh ƀon lan ta xă n’har bri Ia Rvê lĕ rgum tât ngih pah kan bah xă râng bôk nău kan “Puh wai n’har bri răm nuih n’hâm ƀon lan” đah âk nău ƀư geh nkô̆ kơt: “nar rgum ƀănh chưng nđir”, “ƀư but uănh ji, pă dak si an dơm, mât uănh săk soan an nuĭh ƀon lan”, “ndrơng ndơ mô sŏk prăk” n’hanh ăp nău pâl rlưn way ơm tĭng nău way ta ntŭk. Tât râng bôk nău kan n’hanh dơi but uănh săm ji n’hanh pă dak si an dơm, wa Trần Kế Toán, ta thôn 11, xă Ia Rvê rhơn an gĭt, bôk nău kan lĕ ƀư uĕh tâm rnglăp tahen ƀon lan n’har bri. Nkre ntrŭt nsôr nuih n’hâm an kônh wa răm wơt tết, nsrôih lơn tay tâm hun hao wăng  sa-rêh jêng, ndâk njêng nkual n’har bri nâp nâl tay:

“Ƀư bôk nău kan “Puh wai n’har bri răm nuih n’hâm ƀon lan” aơ lah dŭt khlay, geh nău uănh bah Đảng, Ngih dak, ăp gưl n’hanh aơ dơi hăn ndrel đah tahen n’hanh ƀon lan. Lĕ rngôch ăp nuĭh ƀon lan ta aơ rhơn da dê, ntrŭt nsôr ƀon lan mkra ăp nău jêr jŏt, nsrôih hun hao wăng sa rêh jêng, jŭt n’hŭch ach o”.

Bôk nău kan nklâm 2.800 mlâm ƀănh chưng an kônh wa xă n’har bri Ia Rvê

Đại tá Phạm Hữu Chiến, Bí thư Đảng ủy, Chính ủy Tahen n’har bri n’gor Dak Lak an gĭt, Bôk nău kan “Puh wai n’har bri răm nuih n’hâm ƀon lan” dơi ƀư ăp năm gay tâm pă ăp nău jêr jŏt, kơl ƀon lan ăp rnoi nuĭh ta nkual n’har bri geh Tết răm m’ak. Năm aơ, ƀư an 3 mlâm jay “Mât răm n’har bri”; nklâm 2.800 mlâm ƀănh chưng nđir; an 220 nklâm ndơ an ăp rnăk dơi kơl, rnăk geh nău rêh jêr jŏt; nkre an ndơ an 57 mon kon hŏk dôl dơi N’gâng kan tahen n’har bri ntop kơl tâm bôk nău kơl “Ndơ̆ oh tât ngih samƀŭt” n’hanh “kon mât pôih tahen n’har bri”; but uănh săm ji, mbơh ntĭm săk soan, an dak si an dơm nklăp 300 nuĭh. Đại tá Phạm Hữu Chiến mĭn lah, bôk nău kan nkre tâm pă nkre nkah gĭt bah Tahen n’har bri đah kônh wa n’har bri:

“Bôk nău kan “Puh wai n’har bri răm nuih nuĭh ƀon lan” hôm lah nkah gĭt ƀon lan ăp rnoi nuĭh nkual n’har bri tâm nău kan ndâk njêng, mât uănh, njrăng n’gang ƀư tơn neh ntu, rnă njrăng n’har bri neh dak tâm năm bah năp. Bôk nău kan dơi ƀư ta xă Ia Rvê nar aơ lah lah nău ƀư bôk năp, ntơm ƀư nău kan bah cán bộ, tahen Pôih tahen n’har bri n’gor ta 4 xă n’har bri, ndrel ty yor du yan puh wai hơm răm, du nău Tết rgum răm an ƀon lan ăp rnoi mpôl đêt ta n’har bri”.

But uănh ji, mbơh ntĭm săk soan, pă dak si an dơm nklăp 300 nuĭh ta xă n’har bri.

Răm rhơn rnôk tât râng bôk nău kan “Puh wai n’har bri răm nuih n’hâm ƀon lan” ndrel đah cán bộ, tahen grăt pŭt n’hanh kônh wa ƀon lan xă Ia Rvê, wa Y Biêr Niê, Groi Bí thư n’gor ủy Dak Lak an gĭt, bôk nău kan ngăn ngên nar rgum bah ƀon lan ăp rnoi nuĭh ta n’har bri; nta an nău ƀư văn hóa khlay, nău uĕh văn hóa rnoi nuĭh, nsĭt tay nău răm, mông nar răm rhơn an kônh wa rnôk yan puh tât. Wa Y Biêr Niê rnê ăp cán bộ, tahen n’har bri n’gor lĕ dơi mĭn ƀư tơm bah tahen tâm lơh, tahen pah kan, tahen pah kan nkra njêng, ntŭk ŭch geh tahen, moh nău jêr geh tahen. Tahen n’har bri n’gor mhe jêh lôch uĕh nău kan mât uănh, njrăng n’gang ƀư tơm neh ntu, rnă njrăng n’har bri ngih dak, nkre lah rmôt hăn lor râng jŭt n’hŭch ach o, mât uănh săk soan nuĭh ƀon lan, hun hao wăng sa rêh jêng ta n’har bri hôm e âk jêr jŏt:

Bôk nău kan an âk nklâm ndơ khlay an kônh wa ta n’har bri.

“Nău khlay ngăn ma bôk nău kan “Khay puh wai n’har bri răm nuih n’hanh ƀon lan” djôt lĕ nău kan, nău rŏng, nău nkah gĭt bah ăp tahen n’har bri đah ƀon lan dôl nar măng ndrel Tahen mât njrăng n’har bri, ƀư n’gâng rêh” ntŭk n’har bri; mĭn lah nău tâm rnglăp tahen ƀon lan ndrel, ntop tay n’hâm soan dăng, nsing nơm, nuih n’hâm têh nsum mât njrăng nâp nâl ƀư tơm n’har bah neh dak”.