Tâm ăp năm dăch aơ, Tahen n’har bri n’gor Dak Lak lĕ mbơh ƀư âk nău kan, nău ƀư kơl nuĭh ƀon lan săk rnglăy n’hanh geh nkô̆ nău. Ngoăy tâm du đêt nĕ lah nău ăp tahen grat pŭt mbơh ƀư ăp nău kan ƀư trong hăn, mpoh ang an ăp ƀon lan, kơl kônh wa hăn nsong, gŭ âm tâm ăp măng dơh lơn, đăp mpăn lơn. Mô knŭng kơl an muh măt ƀon lan n’har bri rgâl mhe, ăp ndơ ƀư nĕ hôm kơl nău tâm rnglăp tahen đah ƀon lan nar lơ dăch dêh, nău mât uănh, mât njrăng n’har bri lơ geh săk rnglăy lơn.

Ăp nar dŭt năm, kônh wa thôn Chiêng n’hanh thôn Đừng Nhạp, xă n’har bri Ia Lốp, nkyăl Ea Súp, n’gor Dak Lakg dŭt rhơn rnôk tât 6 mông măng, ndơ ƀư điện mhe dơi tahen n’har bri n glăp ƀư ang lam thôn. Wa Lang Văn Tuyển, Bí thư chi bộ thôn Chiềng an gĭt, ŭnh ang điện trong hăn lĕ roh nău măng ngo, pah kan sĭt jay ăp nuĭh gĭt jay nĕ bah nar bâh năp. Ndơn ma nĕ, geh điện trong, măng kônh wa hăn trong, tâm nchră, ngơi gơm n’gŭr răm ngăn, nău tâm rnglăp ƀon lan lơ tâm êp, nău hăn nsong đăp mpăn đŏng.

Tahen n’har bri n’gor Dak Lak lĕ ƀư rlău 10 trong rse điện ta 2 nkuăl Ea Súp n’hanh Buôn Đôn.

“Dơi geh ŭnh ang ta ăp trong hăn ri n’hŭch nău prah tâm tom ndeh, trong hăn aơ nar ƀư lĕ jŏ hôm, jêng aƀaơ lĕ jŭr djơh dŭt âk, aƀaơ geh ndơ mpoh ang aơ ri hăn nsong dơh lơn. Tal 2 lah nău đăp mpăn rnă njrăng dơi uĕh lơn. Ndơ ƀư aơ dŭt geh nkô̆ nău n’hanh kônh wa ƀon lan dŭt mpŏng kâp”.

Thiếu tá Vũ Văn Dương, Chính trị viên groi Pôih tahen n’har bri Ea Hleo an gĭt, ndơ ƀư “Mpoh ang nkual n’har bri” ta thôn Chiềng n’hanh thôn Đừng Nhạp lah ndơ ƀư tal 4 tă bah Pôih tahen n’har bri Ea H’leo ƀĭt joet mbơh ƀư ta lam xă Ia Lốp. Du ndơ ƀư geh trong rse loih n’hanh ăp ŭnh mpoh ang 200w, dŏng điện măt nar, dơi nglăp pơk ang tĭng nar an. Aƀaơ hin ntŭk kan dôl kuăl jă ăp doanh nghiệp, nuĭh lŏng bôk tôr ndrel soan mbơh ƀư tay ăp ndơ ƀư mpŏng ang nkual n’har bri, rgop ntrôl hun hao wăng sa rêh jêng, đăp mpăn rnă njrăng ta ntŭk:

“Tâm năm tât, ntŭk kan ƀư tĭng tay nău ntĭm rđău bah Đảng ủy, N’gâng kan ntĭm rđău tahen n’gor lĕ tâm rgop đah ăp nău kan nsum mpôl, ƀon lan gay kuăl jă ăp rmôt kan, nuĭh lŏng bôk tôr ndơ̆ an m’hâm ƀư lơ âk lơ uĕh ăp nău kan mpoh ang nkual n’har bri. Yor trong hăn ta ntŭk nar lơ jŭr djơh, gay đăp mpăn rnă njrăng, rgop đăp mpăn ta ntŭk ri mpôl hên mbra tâm rgop an ndâk njêng ndơ ƀư mpoh ang nkual n’har bri”.

 Hăn ndrel đah tahen n’har bri Dak Lak mbơh ƀư ăp ndơ mpoh ang nkual n’har bri năm bah năp geh dŭt âk rmôt kan, êng nuĭh n’hanh ăp rmôt thiện nguyện. Yuh Bùi Thị Nữ ntoh măt bah rmôt thiện nguyện NDG, bah nkual ƀon têh Hồ Chí Minh hăn tât xă n’har bri Ia Lốp an gĭt, saơ nău njê bah nuĭh ƀon lan n’hanh nău njê bah ăp các bộ, tahen grat pŭt, rmôt lĕ n’hanh dôl nsrôih rgŏ jă gay ntop kơl tay âk ndơ ƀư geh nkô̆ nău khlay:

“Gâp saơ Tahen n’har bri ri dŭt yô̆ n’hanh na nao hăn ndrel đah nuĭh ƀon lan. Nuĭh ƀon lan n’har bri dŭt jêr jŏt, bu rêh ta nkual jêr jŏt dơi lap kơt he ta nkual ƀon têh jêng gâp săch nkual n’har bri gay kơl an kônh wa dơh oi du gưl jêr jŏt. N’hanh rmôt săch Tahen n’har bri yor ăp nô dŭt n’hâm kơl kônh wa. Rlău ma bôk nău kan mpoh ang mbra geh âk bôk nău kan êng ri rmôt gâp mbra dăp mông nar gay hăn uănh tay”.

Ndơ ƀư “Mpoh ang nkual n’har bri” ta xă Ia Lốp, nkuăl Ea Súp.

Rlău 3 năm mbơh ƀư bôk nău kan “mpoh ang nkual n’har bri” tât aƀaơ, Tahen n’har bri n’gor Dak Lak lĕ dơi ƀư 10 trong rse điện an ăp thôn, ƀon ta 4 xă n’har bri bah 2 nkuăl Ea Súp n’hanh Buôn Đôn, đah rnoh prăk hang rhiăng rkeh. Đại tá Đỗ Quang Thấm, Groi Chính ủy Tahen n’har bri n’gor Dak Lak an gĭt, bôk nău kan dôl geh nău rêng hvi têh dăng, ndrel đah ndơ ƀư bah ăp tahen grat pŭt ri âk rmôt kan, êng nuĭh lĕ n’hanh dôl rgop ndơ̆ ăp ndơ điện trong hăn tât đah ăp thôn, ƀon. Ăp ndơ ƀư nĕ dôl rgop ƀư rgâl muh măt thôn, ƀon, ndâk njêng ƀon lan mhe ta n’har bri. Tă bah nĕ, kơl trong kan mât uănh, mât njrăng nău ƀư tơm neh ntu, rnă njrăng n’har bri neh dơi uĕh lơn:

“Ƀư tĭng bôk nău kan ndâk njêng ƀon lan mhe, ri mpôl hên tâm rgop đah ƀon lan mbơh ƀư ntrong kan mpoh ang nkual n’har bri. Aƀaơ mpôl hên lĕ mbơh ƀư du đêt ntrong kan ta ăp xă n’har bri, rgop ƀư uĕh ăp rnoh ndơ ƀư ndâk njêng ƀon lan mhe. Tă bah nĕ, ƀư uĕh trong kan rgŏ jă, nkoch trêng ƀon lan ƀư tĭng uĕh trong hăn, nău ntrŭnh, nău kơl bah Đảng, pháp luật bah neh dak, lơn lah mât uănh nău tơm bah nuĭh ƀon lan đah nău kan ndâk njêng, mât uănh, njrăng n’gang ƀư tơm, rnă njrăng n’har bri neh dak”.

Ăp ndơ ƀư mpoh ang nkual n’har bri bah tahen pôih tahen n’har bri dôl djôt tât nău răm an kônh wa ta n’har bri n’gor Dak Lak. Mô knŭng kơl an muh măt ƀon lan n’har bri rgâl mhe, ăp ndơ ƀư nĕ hôm kơl nău tâm rnglăp tahen đah ƀon lan lơ dăch dêh ngăn ngên, nău mât uănh, njrăng n’gang n’gang bri lơ geh săk rnglăy lơn./.