- Nău rêh bah druh ndăm lah êng, kônh wa nuĭh Bunong lah nsum ta xă Thuận An lĕ rgâl mhâm tâm ăp năm dăch aơ mêh nô?

Y A Rôn: Nău rêh kônh wa, druh ndăm ƀon Bu Dak n’hanh ƀon Sarpa ta xă Thuận An, aƀaơ lĕ rgâl tâm pah kan jan sa gay hun hao wăng sa, aƀaơ druh ndăm lĕ gĭt dŏng công nghệ điện thoại thông minh gay nău rêh nar lơ hun hao lơn, tĭng nău way bah nuĭh Bunong knŭng ƀư ba mir, aƀaơ khân pơng lĕ gĭt kơt dŏng khoa học kỹ thuật gay nău rêh rnăk wâl tŏng ăp, hơm răm, uĕh.

-Tâm trong hun hao ri druh ndăm lĕ wât mhâm mêh gay hun hao nău rêh, tuch tăm hơi nô?

Y A Rôn: Tâm nău rêh aƀaơ nar lơ hao n’hanh hun hao lơn, druh ndăm lah êng, khân pơng lĕ wât kơt dŏng khoa học kỹ thuật gay hun hao pah kan nkra njêng tâm rnăk wâl, n’hanh druh ndăm lĕ gĭt dŏng điện thoại gay tăch ndơ online, dŏng blău ăp ndơ, kơt dŏng koa học kỹ thuật mhe mô hôm dŏng trong pah kan jan sa kăl e, n’hanh aƀaơ druh ndăm dơi manh prăk bah Đoàn druh ndăm n’gor Dak Nông, gay ntuh kơl nkra njêng nar lơ hun hao.

- Ndrel đah hun hao wăng sa ri nău mât ndrăy ăp nău khlay văn hóa way ơm ri dơi uănh tât, nău aơ dơi druh ndăm nuĭh Bunong ta xă Thuận An wât m’hâm n’hanh săk rnglăy aƀaơ mhâm mêh?

Y A Rôn: Druh ndăm mô chuêl mât ndrăy, ƀư uĕh nău khlay văn hóa way ơm bah nuĭh Bunong lah êng, druh ndăm tâm ƀon mât ndrăy văn hóa rnoi mpôl nơm kăl e kơt, njroh, mpât mprơ, tŭr chĭng, cheh tanh... n’hanh rgum druh ndăm đă ăp nghệ nhân ranh trêng ntĭm nău kan văn hóa way ơm gay druh ndăm mât ndrăy ăp nău khlay văn hóa way ơm mô an roh.

- Tât tâm năm mhe 2024 ri druh ndăm ta Thuận An geh nău nchrăp mêh gay geh du năm bah kơi lôch uĕh?  

Y A Rôn: Tâm năm mhe 2024, druh ndăm xă Thuận an lah nsum n’hanh druh ndăm 2 ƀon lah êng, mpŏng ŭch nar lơ hun hao n’hanh mât uĕh lơnm tay gay druh ndăm mât nău khlay văn hóa bah rnoi mpôl nơm n’hanh nkoch tâm ƀon kơt tâm n’gor gĭt tât nău hóa hóa bah nơm, mô êng ta ƀon n’hanh ăp ntŭk êng gĭt tât, gâp mpŏng tâm, năm tât druh ndăm dơi tâm nđủ nti âk lơn tay.

- Nkhêp di năm mhe Giáp Thìn 2024 nô geh nău mbah rhơn njuăl tât ăp băn druh ndăm ta ƀon tơm nơm?

Y A Rôn: Gâp dăn mbah rhơn tâm năm mhe 2024 geh âk săk soan, ƀư sa hun hao, nău rêh hơm răm, uĕh lăng lĕ rngôch kônh wa tâm ƀon lah nsum n’hanh druh ndăm lah êng, rhơn an kônh wa nar lơ ngăch dăng n’hanh tĭng Đảng, Ngih dak gay nău rêh tŏng ăp, đăp mpăn lơn tay.

Dăn lah uĕh nô, rhơn an nô n’hanh ăp băl đoàn viên, druh ndăm xă Thuận An du năm mhe lôch uĕh.