Yuh H’Dốk Êban ta ƀon Ea Mấp, nkuăl têh Ea Pôk, nkuăl Cư M’gar mhe lôch rek ba. Âk jêt ƀao ba mhe geh dăp êp mir ngih. Yuh H’Dôk mbơh, rnăk yuh ndrel ƀon lan rnôk aơ mô hôm rvê ndơ sa tay ôh. Nau kan tăm ba geh rgâl, n’hao nau geh ba ntơm 4 tât 6 tấn/ha, đăp mpăn âk rnăl mô knŭng tŏng sa ma hôm tăch gay ma n’hao nau geh đŏng. Tĭng yuh H’Dôk, geh nau rgâl aơ rnơm tâm rmôt kan tâm njêng, lah Ban tuyên giáo n’gor ủy Dak Lak ndrel Công ty Cổ phần văn hóa n’gor hŏ ndrel ma cán bộ mbơh ntĭm nau kan tuch tăm hŏ ntĭm an:

Rnơm geh nau kơl an ntĭm mbơh ri ma gâp kơt tĭng, ba mhe tâm 200m2 ri geh 2 ƀao, hôm ba ntil rluk mhe kŏ tăm 200m2 neh nê ri geh 4 ƀao, ba ƀô kah ri geh ntil âk lơn, geh ntil mô lăng geh âk ôh, geh ntil mhe păng geh âk ngăn, ma ba ntil mhe ri nơm tăch kŏ khlay oi đŏng. Rnôk mhe srih ri poh phân Sunfat, tât nrôk tơm ba hao prêh ri gâp lŏ poh tay 2 tŏ phân NPK lah dơi hôm”.

Wa Y Tha Mlô, Bí thư Chi bộ ƀon Ea Mấp mbơh, lam nkuăl rnôk aơ geh 535 rnăk ndrel knŭng hôm 24 rnăk ach o. Rnoh rnăk ach o kŏ dôl ma hŭch ngăch đŏng yor lah âk năm êp aơ ndơ tăm vay geh rnoh. Ndrel ma nau rgâl mpeh nau geh dơi bah ƀon lan, nau kan hun hao đảng viên tâm ƀon kŏ geh nau ueh đŏng. Ntơm bah nau mô geh nŭih đảng viên tâm năm 2004, tât rnôk aơ, ƀon hŏ geh du Chi bộ, đah 17 đảng viên. Ăp nau tă geh dơi nê ân saơ nau rgop têh ngăn bah lam ntrong kan chính trị tâm dâng ndrel nau nkah ngăn bah nau kan bonh đă ma ngăn lah nau tă dơi bah nau tâm njêng đah ăp ntŭk kan, rmôt kan ma ƀon lan. Wa Y Tha Mlô nkoch nau:

“Tâm ăp năm ăp đồng chí tâm rmôt kan tâm njêng ri ăp đồng chí kŏ nkoch nau, mbơh kơl an ntrong kan bah ƀon lan, ân geh trong hăn mhe. Ngăn lah mpeh nau hun hao văng sa rêh jêng, bol ma rmôt kan tâm njêng ri mô geh prăk kăk, ngăn lah mpeh nuih n’hâm ndrel nau ntiưm nti bah khân păng, jêh nê, thôn ƀon tâm jêh ri cán bộ geh gĭt nau kan jêh ri nkoch trêng bonh đă ƀon lan ƀư ăp ntrong kan nê mpeh hun hao văng sa, rêh jêng jêh ri đăp mpăn rnă njrăng neh dak tâm lam ƀon”.

Tĭng wa Huỳnh Chiến Thắng, Tỉnh ủy viên, Groi Kruanh ban Tuyên giáo n’gor ủy Dak Lak, lah du ntŭk tâm njêng ma ƀon Ea Mâp, nau dơi bah nau kan rgâl nau mĭn tâm nau pah kan jan sa nê lah nau geh tâm dăch ndrel ma gĭt ƀon lan lơn. Ndri ma, jêh rnôk tâm njêng, rmôt kan hŏ ndâk rnâng kan rđau kan, mêt uănh nau kan ngăn tâm ƀon gay ma ndâk nau kan, nau nchrăp kơl an ân tâm di. Đah ăp nau jêrr mô geh neh tuch tăm ri rmôt kan ma bonh đă nau rgop kơl an gay ma kơl an kon ntill mpa rong, tâm nthoi ma ăp ntŭk kan gay ma mbơh kan pah. Ăp rnăk ƀon lan geh neh tuch tăm yơn nau geh dơi mô âk, rmôt kan jă nŭih ntĭm mbơh nau kan tuch tăm gay ma tât ntĭm. Ăp khay kŏ đă đảng viên tât rgum rƀŭn nsum ma chi bộ ƀon gay ma năn gĭt ăp nau mĭn, nau ŭch ndrel doh rklaih ăp nau jêr bah kônh wa:

“Ƀư tĭng nau ntrŭnh ndâk njêng chi bộ 4 ueh bah n’gor ủy, Ban tuyên giáo uănh khlay nau kan ƀư ăp nau rƀŭn rgum nsum ma chi bộ bah ƀon tâm ăp khay ri kŏ geh đă đảng viên lăp rƀŭn rgum nsum gay ma kơl an nau kan chi bộ ndâk ăp nau ntrŭnh kŏ kơt lah rklaih ăp nau kan mpeh tâm dâng. Bah nê, kŏ gĭt kloh ăp nau kan gay ma ndâk ƀon lan ân ueh lơn”.

20 năm rlau aơ, n’gor hŏ geh 1.780 ntŭk kan, rmôt kan, ntŭk ƀư nau kan tăch rgâl tâm njêng ma 556 ƀon lan rnoi mpôl đê̆. Tĭng n’gor ủy Dak Lak, nau geh dơi bah nau kan tâm njêng tâm rơh rlau aơ lah du nau ntrŭnh tâm di, tâm di nuih n’hâm ƀon lan, geh nau khlay chính rị, nau geh dơi jru. Gay n’hao ăp ntil nau săk tam bah nau kan ndrel nau khlay bah nau kan aơ, Dak Lak mra lŏ geh nau rgâl mhe mpeh nkô̆ nau ndrel nau kan ân tâm di ma nau ŭch, nau mĭn bah ƀon lan. Wa Nguyễn Đình Trung, Ủy viên Trung ương Đảng, Bí thư n’gor ủy Đắk Lắk ân lah, nau tâm njêng mô knŭng lah nau nkoch đah ăp ntŭk kan, rmôt kan tăch rgâl ma kônh wa ăp ƀon ma hôm ân geh nau râng bah ăp gưl ủy, n’gâng kan tâm n’gor:

“Ăp ntŭk kan, rmôt kan ân geh n’hao lơn tay nau tâm boh nau kan đah gưl ủy, n’gâng kan bah nkuăl gay ma năn gĭt ăp nau mĭn kan, nau rêh ƀon lan tâm njêng, tă bah nê nchrăp luh ăp nau kan gay ma tâm kơl, kơl an nau ngăn, tâm dăch ma nau ŭch geh ndrel nau đă nau kan tâm rnôk mhe. Nkre lah, nchrăp mbơh nchră lơi ăp nau jêr, nau nkol tâm rnôk ntrŭnh ƀư nau kan tâm njêng”.

Nau tâm njêng dơi geh uănh kơt lah du rnôk gay ma tâm nthoi nau kan, tâm dăch, tâm rnglăp ma ƀon lan, jêng du nau ueh tâm nau rêh nuih n’hâm bah ƀon lan ăp rnoi mpôl Việt Nam. 20 năm rlau aơ, nau ueh nê hŏ geh ndăn kơt ngăn tâm du nau ntrŭnh têh bah n’gor ủy Dak Lak, bgeh ƀư ngăn đah ăp nau tâm njêng bah ăp ntŭk kan, rmôt kan đah ăp ƀon lan bah nŭih rnoi mpôl đê̆, bah nê ƀư ueh lơn tay nau tâm rnglăp lam rnoi mpôl, rgop nau ƀư nâp nâl lơn tay nau rnă njrăng chính trị, đăp mpăn nau rêh ƀon lan, hun hao nau rêh, drăp ndơ, nuih n’hâm bah kônh wa ăp rnoi mpôl đê̆./.