Trau pai rnih mbo bah nuĭh Bunong ta Buôn Đôn dơi nkret gâm bah ăp ndơ geh ơm. Gay gâm trau pai kah, mô knŭng lah nchrăp tŏng ăp ndơ kah, ma hôm geh nău blău êng bah ăp nuĭh. Ndơ nchrăp geh: Ƀăng srat, jăm tăp, mbo kro, rnih phe n’hanh ăp ndơ kơt bôh, ƀŏt ngot. Ƀăng dơi ndum srat lor, rnih phe lah ndơ mô dơi mô geh gâm trau pai.

Bôk năp, bu trăm rnih tâm dak bah 30 mnĭt tât 1 mông. Rnôk phe lĕ bak tuh dak, an tâm mbăl juh rnih. Aƀaơ dơi sŏk phe kĭt jêng rnih, yơn lah an juh rnih mư kah. Yuh H’Nụ Budam, Buôn Ea Rông, xă Krông Na, nkuăl Buôn Đôn, n’gor Dak Lak an gĭt, nău blău khlay ngăn rnôk gâm trau aơ lah nău tuh dak rnih tâm glah an wâr tâm ban gay mô kŏt trau n’hanh an tâm di ŭnh gay trau sĭn tâm ban.

“Trau pai nkre kah nkre dơh ƀư lah trau kah ngăn ta ƀon mpôl hên, yor dơi gâm bah ƀăng, rnih mbo, jăm tăp dơi nchrăp lor. Trau aơ nkret gâm ndrel đah rnih mbo lor, jêh nĕ trăm rnih tuh sŏk dak rnih mư gâm sĭn an tay bôh ƀot ngot an tâm di lĕ du rnăk sa, nuĭh ranh, kon se, u che, tŏng ăp ndơ kah tâm di mbung tâm rnăk wâl”.

Rnôk sa tăng ƀô kah n’hanh lăp mbung. Trau aơ dơi sa rgâl piăng mô lah sa đah piăng. Âk nuĭh ŭch trau aơ yor njŭng, ƀô kah bah rnih mbo, bô srat bah ƀăng ntop đah piăng rbân. Trau aơ kah n’hanh dơh lêk jêng nuĭh ranh, kon se ŭch da dê.

Âk nuĭh Bunong gĭt gâm n’hanh uănh aơ lah ngoăy tâm âk ndơ kah bah rnoi nuĭh nơm. Aơ lah du trau sa mô dơi mô geh ăp năm răm, nsông nsao, khĭt ôm tâm ƀon lan, dơi kônh wa gâm tâm ăp rơh lễ hội wơt năch ƀon ngai gĭt tât ndơ sa kah bah nuĭh Bunong. Yuh H’Nụ Budam, Ƀon Ea Rong, xă Krông Na, nkuăl Buôn Đôn, n’gor Dak Lak nkoch:

Ta aơ mpôl hên dŏng ăp nar trau aơ mô lah geh nău, ntĭt nsa kơt tâm nsông, rnăk wâl geh khĭt ôm ri trau pai lah gâm âk ngăn bah nuĭh Bunong. Trau pai aơ dơi dŏng ăp nar tâm rnăk wâl n’hanh dơi gâm gay an năch sa”.

Aƀaơ, nău rêh bah nuĭh Bunong lĕ sâm geh lơn yơn trau pai rnih mbo way ơm mô dơi mô geh tâm ăp nar sa. Du trau sa mô nkret gâm jêr yơn nsĭt tay nău kah, dăch dêh an ăp nuĭh tât đah ndơ sa Bunong ta Buôn Đôn mbra ntop tay nău uĕh kah n’hanh kon nuĭh ta aơ.