Tât măng, du rmôt kơl kan ta Gia Lai mô ru đah nău kan mbuh bŭl trong. Nô Lê Tuấn Thành, kruanh rmôt kơl kan nkoch, lor rnôk mbuh bŭl ăp ntŭk trong djơh, rmôt lĕ hăn uănh n’hanh dăn n’gâng kan ƀon lan, rgŏ jă dăn prăk nkra. Nău nkra trong ƀư ta măng gay dêr nking n’gang gung trong.

Ƀư du ntil nău uĕh an kon nuĭh gay rêng hvi ăp nău geh nkô̆ tât đah ăp nuĭh, lơn lah nuĭh mom. Ƀư tĭng n’hanh mbơh ƀư “Trong đăp mpăn” lah nklân ntă trong ntu, lvang trong jêt lĕ djơh gay ntop kơl nuĭh ƀon lan hăn nsong dơi dơh lơn.

Rnôk rmôt kơl kan ntơm lăp nău kan, nuĭh ƀon lan lĕ dŭt n’hâm kơl đah ndrăng rse điện ang, bơm dak rhŏ an pot xi măng, n’hanh an dak ngêt, ndơ sa an ăp nuĭh tâm rnôk rlu. Wa Nguyễn Văn Thuyết, Kruanh rmôt tổ dân phố 10, phường Ia Kring lah:

 Kônh wa ta nkuqal aơ geh rluh nduh ndăp, dŭt jêr hăn, nar aơ druh ndăm kơl kan tât gay kơl kônh wa ntă tay ăp nduh ndăp kônh wa dŭt rhơn. Mpŏng druh ndăm mât uĕh tay ntop kơl an kônh wa hăn nsong đăp mpăn lơn.

Mô knŭng nkra trong ta Pleiku, rmôt druh ndăm hôm ƀư ta âk trong ta ăp nkuăl bah n’gor Gia Lai. Răm rhơn yor trong dơi nkra lâng, nô Trần Trọng Trung, nuĭh ƀon lan ta xă Ia Yok, nkual Ia Grai an gĭt:

Trong jŭr djơh dŭt âk, dŭt jêr hăn, geh rơh geh nuĭh chôt tâm rbông. Rmôt kơl kan hăn ƀư kônh wa dŭt lah uĕh, n’hanh kơl an oh nô.

Bôk nău kan “Trong hăn đăp mpăn” dơi ƀư bah khay 9/2023, tât aƀaơ lĕ ƀư 19 rơh ntă trong thôn ƀon đah dĭng lĕ jong 30 km ta ăp nkuăl Ia Grai, Đăk Đoa n’hanh nkual ƀon têh Pleiku, n’gor Gia. Bôk naư kan lĕ wăch rgum hiăng nuĭh kơl kan râng. Wa Lê Kiều Thị Minh Thư (ta xă Tân Sơn, nkual ƀpn têh Pleiku) nuĭh rmôt kơl kan, lah:

Gâp ndrel đah kon bu klô bah gâp hăn kơl “Trong hăn đăp mpăn” kơl ƀư uĕh ăp trong gay ăp nuĭh hăn nsong dơh lơn, kơl rêng hvi ăp nău kan uĕh đah nsum mpôl, đah nuih n’hâm nsơr an n’hanh rhŏ tay.

Bôl geh rnôk nău ntă trong lĕ jêh ta ôi ơm, ăp nuĭl kan saơ răm n’hanh uĕh lăng. Bôk nău kan “Trong đăp mpăn” mô knŭng rgop ƀư uĕh ăp trong hăn thôn ƀon, đăp mpăn gung trong, ma hôm trêng mbơh nău rêh uĕh, rgop ndâk njêng du nsum mpôl hăn ndrel.