Năm 1993, jêh rnôk jêh hăn kahân sĭt ƀon, wa Y Tuyên Buôn Krông ta ƀon Drai H’ling, xă Hòa Xuân, nkual ƀon têh Buôn Ma Thuột, n’gor Dak Lak lĕ nsrôih râng ăp nău ƀư kan rêh jêng kon nuĭh tâm rmôt Mpôl druh ndăm, Rmôt kan tahen ơm ta ntŭk. Tât năm 2015, wa dơi nsing nơm săch ƀư Groi bí thư Chi bộ, kruanh ƀon Drai H’Ling.

Tâm 30 năm pah kan nău rêh jêng kon nuĭh, wa Y Tuyên Buôn Krông jêng ntung nthoi ndơ̆ nău ntrŭnh, trong hăn bah Đảng, nău kơl pháp luật bah Ngih dak tât êp lơn đah nuĭh Êđê ta xă Hòa Xuân lah nsum n’hanh ƀon Drai H’Ling lah êng. Bôl ta ntŭk nău kan, wa mô klach jêr jŏt, hăn tĭng ăp trong, mpông jay gay nkoch trêng, rgŏ jă kônh wa ƀư tĭng uĕh nău ntrŭnh nău kơl bah Đảng n’hanh Ngih dak. Wa Y Tuyên Buôn Krông nkoch:

Ta ƀon Drai H’Ling rnoh nuĭh dŭt âk lah nuĭh Êđê geh rlău 93%, nti nsơm mô tam ban. Đah lĕ nuih n’hâm, gâp ntrŭt nsôr kônh wa ƀon lan tâm ƀon ƀư tĭng trong hăn n’hanh nău kơl bah Đảng n’hanh ngih dak n’gluh an. Tâm năm mhe rlău, kônh wa ƀon lan tĭng uĕh nkôp đah ăp năm bah năp jêng gâp saơ dŭt rhơn”.

Wa Y Tuyên Buôn Krông an gĭt, bah năp đaơ nuĭh ƀon lan tâm ƀon hôm e mât nău way ơm rlŭk mâl, nău nsông nsao, khĭt ôm way ƀư âk nar, ƀư hoăch prăk, hôm nău rlong nsông, sŏk âk tâm ôp ndrôi ur sai... Wa way tât ăp rnăk gay nkoch bri, gĭt nău ŭch, nău mpŏng  gay n’hao wât, jăng lơi ăp nău rlŭk mâl luh tâm nău rêh nsum mpôl. Ndrel đah nĕ, wa Y Tuyên Buôn Krông nsrôih nkoch trêng kơl kônh wa rgâl nău mĭn nkra njêng lŏ mir, janh ntuh kơl hun hao wăng sa. Wa H’I Buôn Yă (way kuăl lah Amĭ Bảo)-nuĭh ƀon lan tâm ƀon nkoch, wa ŭch rŏng mro n’hanh ôp ƀư tĭng wa Y Tuyên Buôn Krông yor nuih n’hâm dŭt têh đah ƀon lan.

Ama Hà ƀư kruanh ƀon bah mpôl hên jŏ ngăn hôm. Rnôk geh ăp nău ntrŭnh bah Đảng n’hanh Ngih dak n’gluh an ri pơng mbơh rblang dâl an kônh wa; rnôk geh nău ntrŭnh rgâl pă ntil tơm tăm pơng mbơh kônh wa nti n’hanh sŏk ntil. Kônh wa hên ŭch rŏng, yô̆ ngăn kruanh ƀon”.

Wa Y Niwa Buôn Yă, Groi kruanh UBND xă Hòa Xuân, nkual ƀon têh Buôn Ma Thuột, n’gor Dak Lak an gĭt Y Tuyên Buôn Krông lah du đảng viên ntrong leo. Đah nău ƀư lah Bí thư Chi bộ nkre ƀư Kruanh ƀon Drai H’Ling, Y Tuyên Buôn Krông hăn lor tâm ăp ntrong leo. Bah năm 2016 tât aƀaơ, ndrel đah chi bộ lĕ rgŏ jă kônh wa tâm ƀon rgop tay rlău 200 rkeh prăk n’hanh hang rbăn nar pah kan gay rgâl mê tông rlău 2 km trong tâm ƀon. Tât aƀaơ, rlău 85% rnoh rnăk tâm ƀon geh rnăk wâl văn hóa, nău rnăk wâl deh kon tal 3 n’hŭch âk, nău rêh drăp ndơ, nuih n’hâm kônh wa nar lơ hao. Wa Y Niwa Buôn Yă, Groi UBND xă Hoà Xuân uănh lah wa Y Tuyên Buôn Krông geh âk nău ƀư mhe, mĭn joi, rgâl mhe trong kan gay ndơ̆ nău ntĭm đă, nghị quyết bah Đảng lăp ngăn tâm nău rêh:

Đồng chí Y Tuyên Buôn Krông đah nău blău ơm 15 năm ƀư kruanh ƀon nkre groi bí thư chi bộ bah ƀon Drai H’Ling n’hanh lah nuĭh dơi ƀon lan săch lah nuĭh dơi nsing nơm lĕ 10 năm aơ. Đah nău ƀư lah kruanh ƀon, nkre ƀư groi bí thư chi bộ bah ƀon, đồng chí lĕ mô rlu ntrong leo hăn lor ndâk njêng thôn ƀon mhe, nkre nkoch trêng, rgŏ jă ƀon lan an neh gay sŏk neh, ƀư trong hăn, đồng chí mĭn mro nơm lah ntung nthoi khlay đah n’gâng kan ta ntŭk n’hanh ƀon lan.

Wa Y Tuyên Buôn Krông lah du hê đảng viên dŭt nsing nơm, geh nău blău n’hanh nuih n’hâm đah nău kan. Nău nsrôih, dŭt n’hâm bah wa lĕ rgop ndâk njêng nău tâm rnglăp rnoi nuĭh, ƀư tĭng ăp ntrong leo tâm rlong rŏng dak, ntrôl nău hun hao ăp ntil bah ƀon Drai H’Ling. Đah ăp nău nsrôih tâm trong kan, wa Y Tuyên Buôn Krông lah đảng viên lôch uĕh ngăn nău kan, lah nuĭh nsing nơm ntoh lư tâm ƀon lan rnoi mpôl đêt./.