VOV4.Mnông – Nar nđaơ (23/3), Rƀŭn nchră Kruanh nchră nău NATO ntơm ƀư ta Brussell, Bỉ đah âk nău lam ntŭr neh ntoh lư dơi ndơ̆ an tâm nchră. Bah meng nău mĭn mhe NATO 2030 kơt klach rvê mpeh Trung Quốc n’hanh Nga, tâm rgŏ năp bah NATO ta Áp-ga-ni-xtan lah du nău jêr an dơi mkra ta rƀŭn nchră aơ, tâm rnôk n’glĕ dŭt rhoăt luh tahen Áp-ga-ni-xtan dôl êp tât. Nău ŭch rhoăt lĕ rngôch tahen luh Áp-ga-ni-xtan tâm khay 5 tĭng tâm ton ma Mỹ lĕ dơi geh đah Taliban tâm rnôk n’gâng kan Tổng thống Donald Trump. Yơn lah, Mỹ dôl tâm nău jêr jŏt rnôk nar n’glĕ dŭt dôl tât êp yơn Taliban mô geh nău lôch tâm lơh. Tổng thống Mỹ Joe Biden dăch aơ djôt dơn Mỹ ntlơi nar n’glĕ dŭt aơ, tâm rnôk Kruanh n’gâng kan mât njrăng bri dak Mỹ Lloyd Austin mĭn lah tâm ton rhoăt tahen dơi ƀư rnôk nu nău tâm lơh hŭch ta Áp-ga-ni-xtan.

Nuĭh rblang: Y Sưng Phê Ja