VOV4.M’nông:   Gay ntop kơl an ndruh ndăm tă geh nău tih dơi plơ̆ sĭt uĕh tay, tâm rnglăp ndrel ntŭk gŭ rêh, Nkuăl đoàn Mdrắk, n’gor Dak lak lĕ ƀư âk nău kan tâm mâp, ntrŭt nsôr, kơl druh ndăm gĭt ăp tơm prăk manh an. Knơm nĕ, lĕ kơl an âk ndruh ndăm rlet rlău ăp nău đit prêng, nsrôih hao jêng.

Kŭnh muh kŭnh măt mât chăm mir quýt mhe tăm năm tal 2, nô Nguyễn Thanh Tĩnh (28 năm deh), ta thôn 5, xă Cư Prao, nkuăl Mdrắk, n’gor Dak Lak nkoch, bah năp đaơ, yor săk mom, geh băl mhĭk tâm jă jêng rnôk dôl nti nău kan ta nkual ƀon têh Buôn Ma Thuột, nô lĕ tih hăn ntŭng drăp ndơ n’hanh geh rmal 3 năm n’gul gŭ ndrung. Năm 2019, jêh rnôk lôch năm krŭng, nô plơ̆ sĭt ƀon lan đah nău mĭn đit, prêng. Dơi rnăk wâl n’hanh n’gâng kan ntrŭt nsôr, nô mbrơi mbrơi rgâl trong mĭn, nsrôih ƀư tay nău rêh. Nô đă mê̆ bơ̆ hăn manh prăk gay tăm 5 sao quýt tăm srah cam xoan n’hanh play dŭr thái, tŭng tay 3 ntu ka đah dĭng lĕ rnoh neh bơi 1ha. Nô dơi nkuăl đoàn Mdrắk ntop kơl du kôp bê ntil gay hun hao mât rong, ntop nău geh sa. Nô Nguyễn Thanh Tĩnh nkoch:

“Gâp saơ mât bê ta aơ dŭt uĕh, geh âk ndơ sa an bê n’hanh gâp ndâk ƀư ndrung wang. Aƀaơ nkuăl đoàn lĕ ntop kơl 1 kôp sĭt gâp mât ntuh kơl tay prăk gay rwăt tay đêt kôp gay gâp mât gay hun hao wăng sa, dơi ntop tay nău geh an săk nơm, an ăp băl êng boăt nthoi, ăp druh ndăm êng ndrel nău rêh kơt gâp ƀư tĭng”.

An tơm play nhãn ntil an ăp druh ndăm plơ̆ sĭt nău rêh uĕh ta nkuăl Mdrắk

          Nchrăp dŏng 1ha neh ơm geh gay hun hao mir tơm tăm n’hanh mât rong, nô Hồ Văn Hoàng, ta thôn 20, xă Ea Riêng, nkuăl Mdrắk an gĭt, nô mhe jêh gŭ ndrung n’hanh sĭt bah năm e. Rlet rlău ăp nău mĭn mô uĕh n’hanh nsing nơm nău prêng, nô nsrôih mbra hun hao wăng sa, ƀư ndrŏng tâm di. Aƀaơ, nô lĕ tăm geh bơi 300 tơm vải thiều srah tâm tơm sầu riêng n’hanh nhãn. Nô tŭng ntu hvi bơi 3 sào gay mât ka, rgâl nău geh an nơm. Nău jêr jŏt aƀaơ bah nô Hoàng lah mô tŏng prăk ntuh kơl. Gĭt nău ŭch bah nô, nkuăl đoàn Mdrắk lĕ ntop kơl nô manh 20 rkeh prăk mô sŏk prăk kon bah tơm prăk manh druh ndăm ndâk njêng nău kan, mbơh ntĭm hun hao wăng sa tâm di gay sŏk đêt mât jong. Nô Hồ Văn Hoàng nkoch:

          “Jêh ăp nău tih bah gâp ri gâp plơ̆ sĭt tâm rnglăp ndrel ntŭk gŭ rêh, hun hao wăng sa, ƀư sa, rlet rlău nău rêh nsrôih hao lôch uĕh tâm nău rêh bah nơm. Gâp nchrăp dŏng prăk ntuh kơl an ntrong kan tăm tơm sa play n’hanh mât rong sŭt.

Nguyễn Thanh Tĩnh n’hanh Hồ Văn Hoàng lah 2 tâm 4 druh ndăm lôch uĕh plơ̆ sĭt tay dơi nkuăl đoàn Mdrắk ntop kơl tâm năm aơ. Tĭng nô Lê Tuấn Anh, Groi bí thư nkuăl đoàn, Kruanh Hội Liên hiệp druh ndăm Việt Nam nkuăl Mdrắk, bah năm 2014 tât aƀaơ, nkuăl Mdrắk lĕ ntop kơl an 50 druh ndăm lôch uĕh plơ̆ sĭt tâm rnglăp ntŭk gŭ rêh, đah ăp trong ƀư kơt an manh prăk mô sŏk prăk kon mô lah gĭt tơm prăk manh an, ntop kơl ntil tơm tăm, mpa rong. Ƀư ăp nar rgum nchră, tâm rgâl tâm pă nău blău ơm nkra njêng tuch tăm, mât rong gay druh ndăm tâm nđŭr, tâm nti. Tă bah nĕ ntrŭt nsôr ăp druh ndăm tă geh nău tih rlet rlău đit prêng n’hanh ăp nău nchrăp rêh jêng gay hun hao, ƀư ndrŏng.

An prăk ntơm ndâk njêng nău kan gay nta an druh ndăm plơ̆ sĭt nău rêh ngăn, tâm rnglăp ndrel ntŭk gŭ rêh.

“Bôk năp lah kơl ăp băl gay ăp băl mô hôm đit pring, tâm rnglăp ndrel ntŭk gŭ rêh. Tal 2 tă bah ăp băl gay ƀư nkoch trêng ntĭm nti tay rơh druh ndăm mô hôm hăn tĭng trong ơm ma ăp băl lĕ rlău. Tâm năm tât Hội Liên hiệp druh ndăm Việt Nam nkuăl ƀư ăp nău kan rgum nchră, tâm rgâl nău blău ơm ndrel đah ăp băl. Ndâk njêng du rmôt kan ndrel hun hao wăng sa đah ăp băl druh ndăm, tâm rgop ăp băl druh ndăm plơ̆ sĭt tay nău rêh ngăn lăp ƀư gay ndrel ăp rmôt ƀư uĕh ăp nău kan bah đoàn tâm năm tât”.

Tĭng uănh lah bah Nkuăl đoàn Mdrắk, bah ăp nău ƀư ntop kơl, âk druh ndăm plơ̆ sĭt tay nău rêh ngăn ta ƀon lan lĕ nsrôih hao, nsrôih râng tâm rmôt kan đoàn, hội n’hanh nsrôih tiăr nti, jêng ăp nuĭh wăng sa ntoh lư. Du đêt druh ndăm plơ̆ sĭt nău rêh ngăn jêh âk năm khay tiăr nti n’hanh nsrôih dơi dâk tâm rmôt bah Đảng, jêng ăp nuĭh ntrong leo đah nău nsrôih n’hanh hao an âk druh ndăm êng nsrôih hao, rlet rlău nău tih gay ƀư jêng tay nău rêh.

          Nuĭh rblang: Y Sưng Phê Ja