VOV4. M’nông: Ƀư njêng, pă an n'hanh mât dŏng thẻ căn cước công dân (CCCD) lah trong nchrăp bah Chính phủ. Tĭng ƀư nău rđău đă bah Bộ công an, mpôl kan dơi kan công an n'gor Dak Lak dôl ndăn âk mông nar, n'hao âk nuĭh kan rnoh ngăch kan gay dơn si ƀŭt nchih mbơh pă an thẻ căn cước công dân ntrŭp chip điện tử an nuĭh ƀon lan đăp mpăn nâp uĕh n'hanh di trong nchrăp ndơ̆ luh.  

Ntŭk rgum rhŏ ƀư si ƀŭt nsum n'gor Dak Lak lah 1 tâm 18 ntŭk ƀư si ƀŭt pă an thẻ căn cước công dân ntrŭp chĭp điện tử tâm lam n'gor. Đah 3 rmôt pah kan, tâm pă jêng 3 tơ̆ tâm pleh kan: ôi- kêng măng- măng, ntơm bah 7h ôi tât 10h măng, ăp nar dơn geh nklăp 600 hồ sơ bah nuĭh ƀon lan tât ƀư thẻ căn cước công dân. Pah kan jŏ tât 15h/nar rgâl bah hôm 8h/nar kơt ntơm nơh hŏ nta trong dơh an nuĭh ƀon lan tât nchih mbơh pă an thẻ. Wa Y Dhêc Kbuôr, du hê nuĭh ƀon lan ta Buôn Ako Dhông, phường Tân Lợi, nkual ƀon têh Buôn Ma Thuột hăn tât ƀư tâm n'gul nar an gĭt:

             “Ăp oh nô pah kan dŭt rah rơch gay năn đah mông nar ŭch geh ƀư lôch jêh, rnoh ngăch pă an thẻ thẻ căn cước công dân an nuĭh ƀon lan. Đah nuih n'hâm dơn kan âk kơt nê̆ mpôl hên an saơ nuih n'hâm pah kan rđĭl đah nău kan lah dŭt âk hôm".

            Wa Kiều Văn Trầm, Groi kruanh Phòng Cảnh sát mât kan si ƀŭt mpeh đăp mpăn lam rêh jêng kon nuĭh Công an n'gor Dak Lak an gĭt, ndrel đah nău n'hao lĕ bar tơ̆ mông pah kan ăp nar n'hanh ƀư tâm 7 nar ndrong, n'gâng kan Công an hôm đă cán bộ geh chuyên môn nghiệp uĕh, geh nău tă ơm gĭt kan jŭr tâm dâng ntop kơl nuĭh ƀon lan ƀư pă an thẻ căn cước công dân. Yơn lah tă bah ntŭk gŭ hvi ƀon lan rêh nchah nchrai, rnoh âk ndơ rvăt năp ntrŭp dŏng hôm đêt jêng pah kan pă an thẻ thẻ căn cước công dân hôm mâp jêr jŏt âk. Ta năp nău ŭch geh bah nău kan, Công an n'gor Dak Lak dăn đă n'hao âk jong mông pah kan hao tât 19 mông/nar n'hanh njêng tay ăp rmôt pah kan hăn tât xã nkual jru ngai:

“Gay dơh an kônh wa ta nkual jru ngai tât ƀư thẻ căn cước công dân, mpôl hên hŏ njŭr an mpôl kan tâm ăp xã, phường mpeh ăp nkuâl, thị xã, nkual ƀon têh. Nuĭh ƀon lan ta ntŭk nê ri hăn tât ntŭk dơn si ƀŭt ƀư an dăch. Nkre geh nchih tih nău lư ri công an xã, phường uănh năl, kơi ntop nchih dĭl gay kônh wa dơh ƀư. Tâl 2, aƀaơ trong nchrăp bah mpôl hên lah rgum ƀư ta ăp ntŭk âk nuĭh ƀon lan ri ƀư lor, nar hăn ƀư ta ntŭk ngai, măng ƀư ntŭk dăch. Ntơm bah aơ tât 30/6 lĕ rngôch nuĭh ƀon lan dơi ƀư thẻ căn cước công dân ta ntŭk he nơm da dê".

Tĭng nchih rgum, n'gor Dak Lak geh nklăp 1,5 rkeh nuĭh ƀon lan tŏng rnoh di pă an thẻ căn cước công dân. Tât rnôk dja, Công an n'gor hŏ dơn geh 70.000 si ƀŭt njuăl tât Bộ Công an nkra pă rgâl tay. Tĭng trong nchrăp tât nar 30/6 Công an Dak Lak ƀư lôch jêh bơi 1,2 rkeh thẻ căn cước công dân (tĭng nău ŭch dŭt đêt geh tât 70% ma Bộ đă). Ndrĭ, rĭng ăp nar ân dơn geh nklăp 9.600 si ƀŭt. Đah nuih n'hâm dơn kan âk bah mpôl công an, nuĭh ƀon lan tâm n'gor nsĭng nơm nău pă an thẻ căn cước công dân mbra ăp nar lơn ma dơh n'hanh ƀư lôch jêh di rnoh ngăch ndơ̆ luh.

Thượng tá Tô Anh Dũng, Groi Cục trưởng Cục Cảnh sát Mât uănh ƀư si ƀŭt n'hanh đăp mpăn lam rêh jêng kon nuĭh, Bộ Công an an gĭt: Lôch rnôk Luật Căn cước công dân dơi Quốc hội uănh an dŏng, Bộ Công an hŏ ƀư rgâl di, pă an tay, rgum gĭt nău lư lam rêng ƀư njêng, pă an n'hanh mât uănh chứng minh nhân dân rgâl jêng căn cước công dân. Trong ƀư căn cước công dân dơi buăt nthoi, tâm pă, mât dŏng, rhŏ dŏng geh nău tam pah kan mât uănh ngih dak, ŭch geh nghiệp vụ bah n'gâng kan công an.

“Ntơm nơh ƀư mpeh pă an chứng minh nhân dân lah geh nghiệp vụ mpeh pah kan sŏk wăch wêl lău ti lĭp rlă rgâl an wăch wêl lău ti plat lưn. Jêng mpôl hên hŏ nchrăp an nău kơi năp nti đah 63 n'gor ta Đại học Bách khoa n'hanh C06 mbra lor nchrăp geh si ƀŭt njuăl tât công an ăp ntŭk gay ăp oh nô nchih săk cán bộ, tahen gay mpôl hên geh trong nchrăp ntĭm nti”

Nău ƀư njêng, pă an n'hanh mât uănh chứng minh nhân dân rgâl căn cước công dân lah trong nchrăp bah Chính phủ. Bộ Tài chính hŏ an dŏng thông tư mpeh nău n'hŭch rnoh prăk nkhôm an nuĭh ƀư thẻ căn cước công dân. Tĭng nê, lĕ rngôch ăp nuĭh ƀon lan Việt Nam tŏng 14 năm deh let lơ rnôk ƀư si ƀŭt rgâl, pă an tay thẻ căn cước công dân, rgâl bah Chứng minh nhân dân 9 mbrô, 12 mbrô rgâl jêng thẻ căn cước công dân dơi n'hŭch 50% rnoh sŏk prăk nkhôm rđĭl đah quy định ntơm nơh đŏng. Aƀaơ, n'gâng kan Công an ăp nkuâl an ƀư ndăn ngăch gay ban trong nchrăp ƀư njêng, pă an n'hanh mât uănh căn cước công dân./.

                                                            VOV Tây Nguyên- Nuĭh rblang: Điểu Thân