VOV4.M’nông: Pe khay bôk năm 2021, nsĭt geh tăch n'gluh bah Dak Lak dơn geh 95 rkeh đôlar dơm, geh 14,6% trong nchrăp năm n'hanh hŭch rlău 20% rđĭl đah ndrel khay dja năm e nơh. Ngoăy tâm ăp nkô̆ ƀư jêng ndơ tăch n'gluh bah Dak Lak hŭch âk lah tât khuch bah nuh srê covd-19 ta lam ntŭr neh, ăp bôk duk mô tŏng container soih gay jao an nuĭh tăch n'gluh tâl ndơ.

Lah ngoăy tâm ăp doanh nghiệp dôl tâm rdâng đah ăp jêr jŏt mô dơi tăch n'gluh, wa Nguyễn Xuân Lợi, Tổng Giám đốc Công ty Cổ phần Đầu tư n'hanh hun hao An Thái an gĭt: aƀaơ, âk si ƀŭt dăn rvăt ndơ hŏ tât nar ton jao an năch yơn ân kâp tât duk dăp rdeng. Mô tŏng Container ntrôl rnoh khlay prăk rdeng hao âk đŏng. Na nê̆: ăp bôk duk rdeng hăn Mỹ, hăn Châu Âu hao khlay rlău 3 tơ̆ rđĭl đah ntơm nơh, prăk rdeng hăn ăp dak mpeh nkual Đông Nam Á hao rlău 25-40%.

“Rnôk mô geh tŏng Container soih ri nău nchuăn rdeng dŭt jêr jŏt ri mbra ntoh tay âk ntil prăk. Bôk năp lah mông nar manh an prăp ta kho hao rlău bar tơ̆ đŏng nar kâp duk tât  jŏ lơn đŏng, nar manh nuĭh kan jŏ lơn đŏng, jêng tât rnoh prăk rdeng păng hao khlay. Jêng năm aơ Doanh nghiệp nsĭt geh wăng sa nklăp hŭch âk n'hanh mbra kơi trok tay prăk roh"

Tâm ban kơt nê đŏng, wa Lê Đức Huy, Groi Tổng Giám đốc Công ty TNHH MTV tăch n'gluh n'glăp 2-9 Đắk Lắk an gĭt, quý I năm aơ, 2 ntil ndơ tăch n'gluh tơm bah Công ty lah play tiêu n'hanh cà phê hŭch âk da dê, hŭch tât 60% rđĭl đah năm e nơh. Doanh nghiệp pha lah dun âk si ƀŭt ton dăn rvăt tât bah Châu Âu yor mô dơi joi geh duk rdeng ndơ. Mô dơn nê ăp nău tâm ton hŏ ký bah ơm ri aƀaơ hôm gŭ kâp ta ndrâm dak lêng kâp tât săk ndơ he n'hao kalơ duk đŏng.

          “Ntơm bah kêng dŭt năm 2020 bôk năm 2021 n'hanh an tât aƀaơ lah rnoh Container soih dơm păng mô geh ta ăp dak Châu Á jêng tât prăk rdeng hăn tă bah ăp dak Châu Á tât ntŭk tăch rgâl Mỹ mô lah Châu Âu ri hao khlay dŭt đêt lah 4 tơ̆, âk lah tât 6 tơ̆. Ndơ ơm geh, nuĭh rvăt dŭt ŭch geh ndơ rvăt, yơn rnôk uănh prăk rdeng khlay ir ri bar ding tâm ban ŭch n'gluh mbrơi tay, lah mô gâl dja păng roh âk ngăn, mô dơi tom ôh, geh ăp si ƀŭt ton dăn rvăt păng ntruch tay ntơm bah quý I tât III.”

Wa Huỳnh Ngọc Dương, Groi Giám đốc Sở Công thương n'gor Dak Lak an gĭt, n'gor dja aƀaơ geh 21 doanh nghiệp doanh nghiệp tăch n'gluh. Tâm quý I năm aơ, nsĭt geh tăch n'gluh bah n'gor dơn tĭng ƀư 95 rkeh đôlar dơm, geh 14,6% trong nchrăp năm n'hanh hŭch rlău 20% rđĭl đah ndrel khay dja năm 2020. Tă bah tăch n'gluh hăn tĭng trong dak lêng mâp jêr jŏt, gay ntop kơl doanh nghiệp, Sở Công thương n'gor Dak Lak dôl nsrôih ntrôl dăng ăp nău kan buăt nthoi, joi âk geh ntŭk tăch, rgum dŏng công nghệ thông tin tăch rgâl điện tử an doanh nghiệp. Nkre, pah kan đah Cục Xuất nhập khẩu (Bộ Công thương) ƀư bôk nău kan ntrŭt ntrôl ngăch tăch rgâl gay ăp doanh nghiệp tăch n'gluh bah n'gor tât dơi ăp nuĭh tâm nchră tăch rgâl dak bah dih tâm ban kơt ăp bôk tơm rvăt n'glăp gay ndrel joi trong hăn tâm di:

“Mpôl hên hŏ pah kan đah lĕ rngôch ăp Sở Công thương njok tĭng n'har bri mpeh bah lơ nsing kalơ nê ri khân păng mbra mbơh nău lư, nô nău rvăt n'glăp ta n'har bri năn ngăch gay lor nchrăp geh tơm ndơ tăch tâm aơ. Măt êng đŏng lah, aƀaơ mpôl hên hŏ tâm ôp dơi du đêt ăp nuĭh doanh nghiệp ta ăp mpông n'har bri gay khân păng nchrăp ntop kơl an doanh nghiệp Dak Lak manh kho, ntop kơl tung mbăk n'hanh lah geh nău bưm kol tâm rnôk jao ndơ tăch geh ta mpông n'har bri"./.

            Nuĭh rblang: Điểu Thân