VOV4.M’nông – Du pơh bah kơi “nău ndrăt” geh Australia jăng lơi tâm ton rwăt tàu mŭr, Hội đồng Quốc phòng Pháp nar 22/9 lĕ rƀŭn, mbơh dự luật prăk kaih năm 2022, tâm nĕ kơl lor n’hao tơm prăk an nău kan mât njrăng bri dak năm 2022 hao 40,9 rmen euro, rnoh dŏng âk ngăn bah sa ơm tât aƀaơ bah Pháp. Ntoh ngơi tâm rơh rƀŭn mbơh, Nuĭh ntoh ngơi N’gâng kan Tahen Pháp an gĭt, nchrăp dŏng an tơm prăk mât njrăng bri dak bah Pháp năm 2022 lah 40,9 rmen euro, hao 1,7 rmen euro nkôp đah năm 2021. Kơp tâm 5 năm plơ̆ ma aơ, tơm prăk mât njrăng bri dak bah Pháp lĕ hao rlău 9 rmen euro, tâm ban 25% n’hanh nău kan dơi ntuh kơl âk ngăn aƀaơ. Lah kơp dĭng lĕ ăp nău dŏng ntop tay an n’ăp tahen n’hanh mât njrăng bri dak ri hao tât 26 rmen euro. Năm 2022, tahen Pháp nchrăp săch tay rlău 26 rbăn nuĭh kan, tâm nĕ geh 22 rbăn tahen.

            Nŭih rblang: Y Sưng Phê Ja