VOV4.M’nông – Ôi 22/4, UBND n’gor Thái Nguyên ƀư rgum nchră kan ndrel hun hao pâl nđaih 6 n’gor Việt Bắc: Hà Giang, Tuyên Quang, Bắc Kạn, Cao Bằng, Thái Nguyên, Lạng Sơn. Rlău 10 năm tâm rgop pâl nđaih đah 6 n’gor Việt Bắc tâm nuih n’hâm “ŭch êng-tâm ban-săk rnglăy-ndrel geh” lĕ dơi geh âk săk rnglăy na nê̆; trong hăn pâl nđaih dơi tâm rgop, rnoh năch pâl nđaih hao mô rlu tă bah ăp năm đah rnoh hao rĭng geh 16%.

Nkoch ndơ n’hanh nău geh pâl nđaih ăp ntŭk

Nar rgum nchră geh âk nău rgop bah kruanh, nuĭh mât uănh, doanh nghiệp pâl nđaih gay ntrôl hun hao tâm rgop pâl nđaih nkual, geh ndơ pâl nđaih nar lơ uĕh, tâm di nău ŭch bah năch. Hiệp hội pâl nđaih ăp n’gor Việt Bắc lĕ ký sam ƀŭt tâm ton kan ndrel hun hao pâl nđaih đah Hiệp hội pâl nđaih nsum mpôl. Ăp doanh nghiệp 6 n’gor Việt Bắc ký kan ndrel đah ăp doanh nghiệp lữ hành Hà Nội, nkual ƀon têh HCM.

Nuĭh rblang: Y Sưng Phê Ja