VOV4.M’nông: Bah năp nau tât jêr rdâng bah srê Covid-19, mrôt tahen Biên phòng Kon Tum mhe geh n’hao tay rmôt gay ma njrăng rdâng ăp nŭih lăp trong n’har bri tih dôih tâm 2 nkuăl tâm dăch ma Lào ndrel Campuchia. Tĭng nê, geh 8 Đồn biên phòng bah n’gor Kon Tum geh n’hao leo bơi tât 100 nŭih tahen tâm N’gâng kan rđau kan tahen n’gor. Jêh rnôk ndơn nŭih tât n’hao nau kan, Rnâng kan rđau kan tahen biên phòng Kon Tum hŏ geh mbơh ntĭm mpeh nau kan bah nkuăl n’har bri, nau tât bah srê Covid-19 ta Lào ndrel Campuchia.

Nkre ƀư rjăp nau kan, nau dơi bah cán bộ, tahen N’gâng kan rđau kan n’gor tâm nau n’hao ân 8 Đồn biên phòng. Tahen Biên phòng Kon Tum mbơh, cán bộ, tahen nkuăl n’har bri jong rlau 292km tâm dăch ma Lào ndrel Campuchia kŏ mro ndơn geh nau kơl an, bonh đă mpeh nuih n’hâm ndrel drăp ndơ tâm rnôk ƀư nau kan nkre mât njrăng nkuăl n’har bri ndrel njrăng rdâng srê Covid-19./.

Nŭih rblang: H’Thi