VOV4.M’nông: Tâm rnôk 72 năm, rgâl ma gŭ nsum ma kon sau, tahen ơm Phùng Văn Toàn, ta Phường Nghĩa Tân, nkuăl ƀon têh Gia Nghĩa, n’gor Dak Nông lŏ săch ân nơm nau răk môch tahen hen. Bơi tât 10 năm ma aơ, wa rgâl ma rnăk vâl bah nŭih tahen khĭt gay ma moh kthup, mât răk ân rlau 500 môch tahen tâm ntŭk tâp bah n’gor gay ma nkah tahen. Nau nchih “Tahen ranh mât nau hăk bĭch ân tahen nơm” bah Tuấn Anh-Phóng viên Radio Việt Nam tâm nkuăl Tây Nguyên nkoch tât wa.

            Ăp nar aơ tâm nkuăl ƀon têh Gia Nghĩa, n’gor Dak Nông dôl ƀư nau tâm nkhah srang tĭng nau ntrŭnh mrô 16 bah Thủ tướng Chính phủ gay ma njrăng, rdâng srê Covid-19. Yơn lah, ta ntŭk môch tahen n’gor Dak Nông ăp môch tahen hôm geh nchrăp nau nkah ăp tahen khĭt tâm lơ 27/7. Wa Phùng Văn Toàn nŭih mât môch tahen n’gor Dak Nông nkoch, năm aơ srê ntoh hô ri ma âk rnăk mô dơi hăn mpoh khtup. Ur sai gâp nsôih nchrăp ndơ ôp brah, rep kloh ăp môch kơl an ăp rnăk tahen ân khân păng bah rvê:

            ‘Gâp geh rêh ri gâp lŏ mĭn ân ăp rnôk mâp nau jêr ngăn geh ăp đồng chí, tahen bah nơm gay ma tât rnôk geh rêh ri ăp đồng chí, tahen mô hôm ôh. Ăp nŭih ri du năm, 5 tât 7 năm mô geh băl mpôl tât mpoh kthup yơn gâp mra leo mpoh kthup ndơn ma băl mpôl rnăk vâl nŭih tahen hŏ roh săk nơm, bĭch ta aơ, bonh đă ân ăp ndrâu phan, ân ueh tay môch ndah”.

Wa Toàn nkoch, năm 1970, wa lăp hăn tahen rdâng lơh mprơ Mỹ kơl an neh dak pah kan tâm mpeh ba dâng ân tât rnôk nar đăp mpăn neh dak. Tât năm 1979, rnôk nau tâm lơh tâm nkuăl n’har bri mpeh ba lơ, păng hăn kơl an neh dak. Năm 1992, wa ndrel ma rnăk vâl tă bah ƀon tơm Vĩnh Phúc lăp Dak Nông ndâk nau kan. Gay nkah ăp đồng chí hŏ roh, wa ŭch ƀư răk môch, ăp nar mpoh kthup ân tahen geh tâp bah n’gor Dak Nông. Đah wa, mât răk môch mô êng lah nau kan, ma nê lah nau dơi, nau ŭch bah tahen đah nŭih lĕ roh.

Nô Trương Văn Bình, Groi Bí thư Đoàn n’gor Dak Nông mbơh, ăp nau kan bah wa Toàn hŏ ntop tay nau ŭch rŏng neh dak ân mom ndăm Dak Nông. Tâm ăp nar tết mô lah nar têh bah neh dak ri đoàn viên druh ndăm bah n’gor lŏ tât nsum n’hâm ndrel wa mâp răk ăp môch tahen:

‘Wa gơih ngăn tâm nau ntĭm nti, ntĭm tâm ntŭk mpoh khtup ân ăp đoàn viên tât chop. Âk ngăn bôk nau kan ƀư rnôk bri mih, sial, ma wa mô geh nau dun ôh, păng hăn nsum ma ăp đoàn, đah druh ndăm gay ƀư nau kan kơt lah nau kan mpoh kthup nkah. Ntơm bah nau ueh bah wa Toàn, druh ndăm nchră tât kơl an wa du đê̆ nau kan mpih, rep, chŭt kao, nkra ân nâp ueh mro. Wa Toàn hôm lah nŭih geh phung hên ntoh nuih n’hâm kan ân mom ndăm, nau ƀư ngêt dak nkah gĭt tu”.

Rnôk aơ, môch tahen N’gor Dak Nông lah ntŭk tâp rlau 500 môch tahen khĭt kăl e, tâm nê geh rlau 20 môch ê geh năl moh săk, ƀon lan. Wa Nguyễn Thị Hương, Groi Giám đốc Sở Lạo động-thương binh ndrel xã hội n’gor Dak Nông mbơh, bơi tât 10 năm tâm dăch ma nau kan mât răk môch, wa Toàn kŏ tât mpih rep ăp nar, mât chăm rtơm si, rao jủ môch, mpoh kthup mpoh ŭnh ang ân ăp môch:

‘Đồng chí saơ lah aơ lah nau kan geh nau khlay kơt lah bu ranh bu ƀư nau kan gay ma geh nau rêh ân ueh, ƀư nau kơl an kơl an gay ma saơ geh nau răm tâm săk jăn. N’ăp ma ur păng ndri đŏng, ăp năm ăp nar lễ, tết kŏ rgop n’hâm ƀư leo ndơ ôp brah ân ăp môch tahen. Ăp năm phung hên geh nau kơl an ân păng mhâm ƀư đăp mpăn ân ueh nau rêh rêh tâm nau răk môch, kŏ kơt lah păng geh nau rêh ân ueh, ân m’ak”.

Đah ăp nau rgop tâm nau mât chăm, răk môch tahen n’gor Dak Nông, năm 2020, wa Toàn lah 1 tâm 3 nŭih bah n’gor Dak Nông geh Bộ Lao động-Thương binh-xã hội rnê nkhôm “nau geh nau kan ueh ang yor ƀon lan”. Aơ kŏ lah nau rhơn kŏ lah nau kan bah wa Toàn tam dăch dơh tâm nau mât ân nau hăk bich bah ăp đồng đội ndrel kâp băl mpôl khân păng leo nsĭt./.

Nŭih rblang: H’Thi