VOV4.M’nông – Nar 12/3 mhe rlău, nuĭh ƀon lan ăp thôn 9, 10 n’hanh 11 xă Cư San, nkuăl M’Đrăk, n’gor Dak Lak, ntưm nchrăp ƀư dak bât 4.400 rmen prăk Krông Pách thượng, ntơm bah sĭt ntŭk gŭ mhe. Aơ lah nău ma lĕ nuĭh ƀon lan nkual n’glău bât, n’gâng kan ƀon lan ăp gưl n’gor Dak Lak kâp tâm 12 năm bah năp. Rlet rlău ăp jêr jŏt, n’ăp wăk kol, nău nchrăp ƀư ntơm dôh rklaih jêr jŏt sŏk neh lâng. Aơ lah nău khlay gay dak bât rbăn rmen prăk ơm jêh, rgop mkra nău tu dak, tŏ an ăp ƀon lan têh ndrŏng, lah nkô̆ nău têh ngăn bah ngoay tâm âk dak bât dơi Chính phủ, Quốc hội uănh an mbơh ƀư ta Tây Nguyên.

Ntơm ôi ơm, rnăk wâl 6 nuĭh jay wa Liều Văn Sùng, thôn 9, xă Cư San, nkuăl M’Đrăk lĕ dâk, ntơm mpêh dăp ndoh ndơ nchrăp trơn jay an nkual ntŭk gŭ mhe tă nĕ rlău 30km, ta xă Cư Elang, nkuăl Ea Kar. Jêh rlău 20 năm gŭ rêh ta aơ, wa Sùng geh nău rvê ntŭk aơ yơn dŭt răm hăn trơn. Yor nkual ntŭk gŭ lĕ dơi ngih dak pă dŭt uĕh đah 1000m2 neh gŭ n’hanh 1ha neh tuch tăm, gŭ êp n’glău dak bât, rbông dak tât ta ntŭk, tu dak lir lar. ntŭk gŭ mhe hôm e gŭ êp xă, điện, trong hăn, ngih sam ƀŭt, ngih dak si dơi ntuh kơl uĕh, ton kơl rnăk wâl wa Sùng geh nău rêh uĕh lăng lơn:

“Gâp mĭn lah bah năp bah kơi an hăn, lơ hăn ơm lơ uĕh gay geh nău rêh mhe. Hôm gŭ ta ntŭk ơm ri dŭt njê, mô ŭch ƀư du ntil ndơ, duh ri nsuk, mih ri bŏk mbir, nkôp đah nkual ntŭk gŭ mhe ri nkual ntŭk gŭ aơ dơh rêh lơn”.

Ăp rmôt kơl nuĭh ƀon lan Krông pách thượng rơih jay

Gay ntop kơl nuĭh ƀon lan hăn trơn, lĕ 2 nkuăl M’Đrăk n’hanh Ea Kar đă rmôt kan hang rhiăng nuĭh, geh dân quân tự vệ, cán bộ, đảng viên druh ndăm tât kơl ƀon lan. Ndeh rdêng ndoh ndơ, ngih wâl kơl nuĭh ƀon lan nchrăp, mông nar rgum răm, răm kơt nar hội. Râng rơh n’hanh trơn jay, nô Y Ten Niê, Bí thư đoàn druh ndăm nkuăl têh M’Đrăk, nkuăl M’Đrăk, an gĭt, ăp băl druh ndăm lĕ tâm pă nău kan, gay đăp mpăn nuih n’hâm n’hanh săk soan an rơh kơl nuĭh ƀon lan lĕ nar:

“Nău trơn ƀon lan aơ dŭt n’hâm, jăch ndăn. Mpôl druh ndăm n’hanh ăp ntŭk kan tâm rgop dŭt n’hâm ntop kơl nuĭh ƀon lan gay khân pơng ơm đăp mpăn nău rêh. Tâm pă tĭng rmôt, nar aơ rmôt aơ n’hanh nar bah kơi rmôt êng lăp ntop kơl mbra tŏng ăp săk soan an oh nô n’hanh nchrăp ƀư nău kan mro”.

Ndeh rdêng ndoh ndơ, ngih wâl kơl nuĭh ƀon lan an dơm

Nkre đah ntŭk trơn, ta ntŭk tât lah nkual ntŭk gŭ mrô 1, xă Cư Elang, nkuăl Ea Kar, ăp rmôt nchrăp gay ntop kơl nuĭh ƀon lan ƀư jay đăp mpăn nău rêh. Wa Trần Văn Thanh, Kruanh UBND xă Cư Elang an gĭt, ta nkual ntŭk gŭ mhe bah xă lĕ nchrăp an 230 rnăk, 1.150 nuĭh nkual klŭng n’glău dak bât Krông Pách thượng tât gŭ rêh. Ta aơ, ăp ndơ dŏng kơt dak kloh uĕh, dak tuch tăm, điện, trong, ngih sam ƀŭt, ngih dak si, neh gŭ n’hanh neh tuch tăm lĕ dơi ntuh kơl, pă dăp uĕh. N’gâng kan xă mbra nsrôih dŭt n’hâm an nuĭh ƀon lan ngăch tâm rnglăp đah ntŭk gŭ mhe.

“Ƀon lan lĕ ndâk ƀư trong kan, trong nchrăp tâm rgop đah ăp jrô kan bah nkuăl, mpôl hên lĕ lĕ nchrăp rmôt kơt ăp rmôt kâp gay wơt kônh wa. Đăp mpăn ơm ngăn đah nău rêh. Mpôl hên mbra nsôih dŭt n’hâm gay ndâk ƀư ngih wâl an kônh wa, m’hâm ƀư 1-2 nar lah đăp mpăn. Ăp mon hăn ri ri mpôl hên ton knŭng tâm 2 nar”.

Râng trong kan ntĭm rđau kơl nuĭh ƀon lan trơn tât nkual ntŭk gŭ mhe, wa Nguyễn Đình Thìn, Groi kruanh Ban mât uănh nău nchrăp ƀư ntuh kơl ndâk ơư ndơ ntung trong n’hanh lŏ mir n’gor Dak Lak an gĭt, geh rlău 700 rnăk nkual klŭng n’glău dak bât Krông Pách thượng mpôl dơi trơn gay rhŏ an nău nchrăp ƀư. Jêh 12 Năm, tât aƀaơ lĕ ƀư tĭng nău trơn nuĭh ƀon lan gay sŏk neh lah nău dơi rhơn. Yơn lah, nău trơn dơi lĕ rngôch ăp rnăk lah dŭt âk, joi đă nău nsrôih dŭt têh bah ăp gưl n’gâng kan bah xă tât n’gor, lơn lah an geh nău wât, tâm ban ŭch bah nuĭh ƀon lan:

Ntŭk gŭ mhe dơi ntuh kơl uĕh đah tŏng ăp ndoh ndơ ngih wâl ntung trong

“An lah đŏng, ta aơ an geh nău nsrôih bah nuĭh ƀon lan. Đah rmôt kan ri mpôl hên tŏng ăp lah nuĭh ƀon lan nsrôih, nău trơn dơi ƀư jêh bah năp 30/4, mbrơi ngăn lah 30/6. Yơn lah, gâp mĭn lah nuĭh ƀon lan nkô̆ nău khlay. Nuĭh ƀon lan tâm ban ŭch âk tay, ntop kơl êng, nuĭh hăn lor kơl nuĭh hăn bah kơi, ƀon lan tâm kơl ndrel  nău kan mbra ơm jêh”.

Kơt nĕ, jêh 12 năm mpŏng kâp, nuĭh ƀon lan ta nkual n’glău dak bât Krông Pách thượng lĕ ntơm trơn tât nkual ntŭk gŭ mhe n’hanh ton geh du nău rêh mhe uĕh lơn. Nău nchrăp ƀư lĕ nsrŭng, đê̆ đŏng geh tâm nău wăk kol. Tâm rnôk khay 9/2020, hôm e âk tâm rlăch hô, ăp ding geh tât tâm ntôn tih đah nău mbrơi. Yơn rlău lĕ rngôch, đah nău lăp dŭt n’hâm bah N’gâng kan tuch tăm mât rong n’hanh hun hao ƀon lan n’gor Dak Lak ndrel chính trị ta gưl xă, nkuăl n’hanh lah nău rgâl gĭt wât bah nuĭh ƀon lan, nău nchrăp ƀư dak bât rbăn rmen aơ dôl ntơm dôh rklaih ăp nău wăk kol. Lah lap, nău nchrăp ƀư dơi jêh n’hanh ndơ̆ an dŏng tĭng trong nchrăp ma Chính phủ, Quốc hội lĕ nkra rgâl lah năm dŭt 2021.

Nuĭh rblang: Y Sưng Phê Ja