VOV4.M’nông – Cục kiểm lâm (N’gâng kan tuch tăm mât rong n’hanh hun hao ƀon lan) mbơh njrăng ŭnh sa bri ta nkual Tây Nguyên dôl ta rnoh hô. Cục kiểm lâm đă nuĭh ƀon lan mô dơi dŏng ŭnh tâm bri n’hanh êp n’har bri yor mô lap jêt ƀư geh ŭnh sa bri. Ta năp nu nău nĕ, nău kan dơi kan ăp ntŭk tâm nkual lĕ ƀư trong kan njrăng n’gang ŭnh sa bri.

Mât uănh njrăng n’gang rlău 13 rbăn ha bri, ăp tŏ lăp tâm yan wai, Mpôl mât uănh bri njrăng n’gang sial Hra, nkuăl Mang Yang, n’gor Gia Lai lŏ tâm rgop đah nuĭh ƀon lan koaih nja rpăi an bri. Wa Nguyễn Văn Chín, Kruanh ban mât uănh an gĭt, yan wai năm aơ, 1.000 ha bri geh ŭnh sa hô ngăn, lĕ dơi mkra nja rpăi đăp mpăn. Ban ndrel ăp rnăk dơn uănh bri lĕ muih koaih 13 km trong n’har nking n’gang ŭnh, nkre n’hao trong kan uănh nđôi rchăng n’gang ŭnh sa.

Gia Lai ƀư muih koaih nja rpăi ăp ntŭk geh ŭnh sa âk

“Mpôl hên nkoch trêng rgŏ jă n’hanh ký ton đah ăp rnăk ƀon lan rêh êp bri ƀư ăp ntrong kan rchăng n’gang ŭnh sa bri đăp mpăn di nău đă kỹ thuật. Ƀư hăn uănh nđôi kâp ta ăp nkual geh hô n’hanh trong way ƀư njrăng dŭt uĕh, puh nset ŭnh sa an ngăch”.

Nkuăl Mang Yang aƀaơ geh rlău 53 rbăn ha bri, tâm nĕ geh bơi 6 ha ta ăp nkual geh hô ŭnh sa nĕ lah: A Yun, H’Ra, Đê Ar, Đắc Trôi, Đă Djăng. Wa Trần Tất Đắc, Groi Hạt trưởng hạt kiểm lâm nkuăl Mang Yang, an gĭt: Gay njrăng n’gang ŭnh sa bri, nkuăl Mang Yang lĕ uănh tay Ban ntĭm rđau njrăng n’gang puh nset ŭnh sa gưl xă, ndâk ƀư trong kan 4 ta ntŭk, nkre ndâk njêng ăp rmôt, mpôl njrăng n’gang ŭnh sa bri đah rmôt nuĭh hao tât hăng rhiăng nuĭh, tơm khlay lah nuĭh ƀon lan ta ntŭk gay njrăng n’gang ŭnh sa bah bôk năp dâl:

“Mât njrăng bri lah nău kan khlay n’hanh lơn lah nău njrăng n’gang n’gang ŭnh sa bri an njrăng n’gang ƀư khlay. Rnôk geh ŭnh sa bri ri dơi dŏng âk ntil ndơ, n’ăp ndeh rklư mhe kơt ăp dak mhe yơn kơl lor nău njrăng n’gang ŭnh an dơi an lor bôk năp”.

Nkoch trêng an nuĭh ƀon lan n’hao wât mât njrăng bri

Ta Lâm Đồng, bah lor tết nguyên đán tât aƀaơ, nkual bri n’ho dơh ŭnh sa njok QL 27C hăn rlău ăp xă Đạ Sar, Đạ Nhim, Đạ Chais bah nkuăl Lạc Dương dơi Mpôl mât uănh bri njrăng n’gang phŭt sial Đạ Nhim n’hanh ăp rnăk dơn mât uănh njrăng n’gang pă nuĭh kâp ta ăp ntŭk kâp njrăng, ƀư hăn uănh nđôi ƀa ƀơ gay saơ ơm lah geh ŭnh sa. Wa Ha Dinh, rnoi K’ho, rnăk dơn mât uănh njrăng n’gang bri ta xă Đạ Sar an gĭt:

“Trạm geh trong nchrăp lah ƀư rmôt gay tâm pă ăp nuĭh hăn kâp njrăng. Lah rnôk saơ geh ŭnh sa ri mpôl hên sĭt mbơh an trạm dâl, trạm mbra ngăch mbơh an Ban gay rgum rmôt nuĭh puh nset ŭnh ngăch”.

Wa Nguyễn Khanh Thiện, Chi cục trưởng Chi cục Kiểm lâm n’gor Lâm Đồng an gĭt, đah trong ƀư mô thơ tha, jêng ăp trong ƀư njrăng n’gang ŭnh sa bri lĕ dơi ăp ntŭk kan ƀư bah bôk yan wai.

“Mpôl hên lĕ n’hao ntĭm rđau ăp Hạt Kiểm lâm, Rmôt kiểm lâm cơ động, ăp jrô way kan, ăp nuĭh tơm bri ntrôl dăng trong kan mât uănh njrăng n’gang bri, njrăng n’gang ŭnh sa. Tâm nĕ uănh khlay trong kan nkoch trêng, rgum tâm ăp ntŭk hô gay đăp mpăn săk rnglăy trong kan njrăng n’gang n’gang ŭnh sa bri âk”.

Lâm Đồng ƀư nti njrăng n’gang ŭnh sa bri

Ta ăp ntŭk hô dơh geh ŭnh sa bri ta Kon Tum, kơt: nkuăl Đăk Tô, Kon Rẫy, Ngọc Hồi, Ia H’Drai, Bri ngih dak Chư Mom Ray... ăp ntŭk tơm bri, nău kan lâm nghiệp n’hanh n’gâng kan ăp ntŭk lĕ rgŏ jă dŭt n’hâm đă nuĭh kâp njrăng măng nar. Lah nkuăl n’har bri geh rlău 88 rbăn ha bri n’hanh neh lâm nghiệp, lĕ rngôch rnoh neh dôl ta nchroh mbơh ŭnh sa bri dŭt hô, wa Nguyễn Quấn Tuấn, Hạt trưởng Hạt kiểm lâm nkuăl Ia H’Drai, an gĭt:

“Duh phang jŏ jong, yan wai hô geh ŭnh sa bri âk. Mpôl hên m^n đŏng ăp nkual geh ŭnh sa bri ma đă kâp njrăng măng nar. Ăp tơm bri geh rmôt way kan mât njrăng bri. Rmôt nĕ nkre mât njrăng bri n’hanh tâm trong kan njrăng ŭnh sa bri. Bah meng nĕ trong ƀư tâm rgop đah ăp ntŭk kan, đah Ủy ban xă jêh nĕ ăp ntŭk kan gŭ ta ntŭk. Uănh nđôi ăp nuĭh tơm bri an ƀư tĭng di trong mkra lĕ dơi uănh an tĭng trong 4 ta ntŭk gay nchrăp rnôk geh ŭnh sa bri”.

Gay nchrăp njrăng n’gang ŭnh sa an rlău 610 rbăn ha bri, ăp ntŭk kan tơm bri ta Kon Tum lĕ ƀư hăn rbăn km trong rgăn n’gang, trong nking nchăng ŭnh; ƀư hăng rhiăng ntŭk kâp, gay mât uănh nĭh luh lăp tâm bri; koaih, su nja rpăi ndơ ŭnh sa gay nking n’gang ŭnh sa bri; ƀư ton đah tĭng rnăk ƀơn lan gay uănh nđôi nău muih koaih su mir dêr ŭnh sa rêng tâm bri.

Nuĭh rblang: Y Sưng Phê Ja