VOV4.Mnông-Nău tâm boh kan đah Australia n’hanh Pháp dôl duh jêr lôch rnôk Australia nklơi nău tâm ton kan 90 rmen AUD rvăt 12 duk mŭr nchoăt ma diesel bâh Pháp n’hanh ndơn đah nău rvăt duk mŭr nchoăt ma hạt nhân an Mỹ n’hanh Anh tâm rgop nkra ƀư. Bol ma Australia ŭch rgâl mhe ueh nău tâm boh kan đah Pháp lôch nău aơ yơn Thủ tướng Australia an lah, hôm nha ê hŏ di rơh gay ma tâm mâp Tổng thống Pháp ta bah dih rơh rƀŭn nchră bâh Đại hội đồng LHQ. Mpeh nău khuch tât bâh nău mô hôm rvăt duk mŭr bâh Pháp tât nău tâm nchră nău tâm ton tăch rgâl đăp mpăn dôl geh ƀư đah Australia n’hanh âk dak châu âu kan ndrel, Thủ tướng Australia an lah bar nău aơ an geh nglah na nê̆, tâm ban kơt nău mĭn bâh nuĭh mât nău kan nchră nău đah dak bah dih bâh âk dak châu âu kan ndrel. Nar 21/9, Thủ tướng Australia Scott Morrison geh tâm mâp đah ăp nuĭh leo kan âk dak châu âu kan ndrel gay ma tâm nchră mpeh nău ntêt nkri rnă njrăng ta Ấn Độ DươngThái Bình Dương.

Nuĭh rblang: Thị Đoắt