VOV4.Mnông – Măng 24/3, Thủ tướng Nguyễn Xuân Phúc lĕ geh rơh tâm nchră đah Tổng thống dak Cộng hòa Chile Sebastian Pinera gay tâm nchră ăp trong n’hanh mkra na nê̆ gay n’hao tâm boh kan ndrel lĕ rngôch Việt Nam-Chile. Thủ tướng Nguyễn Xuân Phúc uănh lah tâm boh Việt Nam-Chile lĕ geh trong hun hao têh dăng jêh 50 năm n’hanh mĭn lah Việt Nam ŭch ƀư jru tay nău tâm boh đah 2 dak, ngăn lah đah wăng sa, tăch rgâl n’hanh ntuh kơl.

Thủ tướng Nguyễn Xuân Phúc kuăl tâm nchră đah Tổng thống Chile

Tổng thống Sebastian Pinera nkoch, Chile uănh khlay tâm boh way ơm đah Việt Nam, uănh lah prêh ăp nău nsrôih mhe rlău bah Chính phủ Việt Nam tâm nău njrăng đah srê Covid-19 n’hanh mât uĕh jâng nsan hao jêng wăng sa. 2 hê kruanh lĕ tâm ban ŭch du đêt ăp trong n’hao tâm boh dăch dêh way ơm n’hanh kan ndrel lĕ rngôch đah 2 dak năm tât, geh nău mât uĕh tâm rgâl gưl prêh, mbơh ƀư săk rnglăy n’hanh ƀa ƀơ ăp trong kan ndrel, tâm rgop ntrôl ăp rơh kan ndrel tăch rgâl ăp ding n’hanh nkual tâm rnôk wăng sa n’hanh tăch rgâl lam ntŭr neh dôl rdâng hô đah srê Covid-19.

Nuĭh rblang: Y Sưng Phê Ja