VOV4. M’nông: Nkhêp geh rnôk Tết way ơm Chôl Chnăm Thmây năm 2021 bah ƀon lan Khmer, Thủ tướng Chính phủ Phạm Minh Chính hŏ njuăl si ƀŭt mbah rhơn tât ƀon lan, băl ndrel n'hanh ăp nuĭh chư tăng rnoi Khmer. Ntơh măt kruanh rđău kan Đảng n'hanh Ngih dak,  Thủ tướng njuăl nău ôp khâl, mbah rhơn n'hanh mpŏng ăp nău uĕh lăng tât đah kônh wa ƀon lan, băl ndrel n'hanh ăp nuĭh chư tăng rnoi Khmer. Tâm rnôk nuh srê Covid-19 tât krit nji, Thủ tướng mĭn lah đah nău nsrôih bah ăp gưl, ăp n'gâng kan n'hanh ƀon lan rnoi nuĭh Khmer mbra wơt Tết way ơm Chôl Chnăm Thmây đăp mpăn đah ăp tŏng nkô̆ hôr văn hóa, mât uĕh ăp săk tơm, nău way ơm uĕh lăng bah he. Nkre, mât uĕh tay nău way ơm rŏng dak, tâm rnglăp, nsrôih kơt nti, tiăr nti, n'hao dăng săk suan n'hanh bôk rngok gĭt blău, jăp gơih pah kan jan sa, nsrôih geh âk nău dơi têh kuâng, rgop ndrel lam dak tĭng ƀư geh nău dơi ăp rnoh tât kan, nău kan hun hao wăng sa- rêh jêng kon nuĭh hŏ ndơ̆ luh./.

Nuĭh rblang: Điểu Thân