VOV4.M’nông: Nar lam ntur neh pah kan 1/5 ntơm bôk ta ưbah nkuăl ƀon têh pah kan công nghiệp têh Chicago, Mỹ. Nê lah năm 1886, ta nkuăl ƀon têh Công nghiệp têh Chicago, Đại hội Liên đoàn Lao động Mỹ nchră nau ntrŭnh lah kloh: “Ntơm lơ 1/5/1886, nar pah kan bah ăp công nhân mra lah 8 mông”. Nau geh săch 1/5 geh dŏng kan nê lah nau ntơm ƀư hợp đồng mhe đah nŭih pah kan ndrel ma tơm nŭih manh kan geh ký. Nŭih ntơ tư bản mra dơi gĭt lor nau ntrŭnh bah công nhân ma mô dơi joi nau mô ndơn. Yơn lah, lơ 1/5/1886 yor nau đă bah công nhân mô geh ndơn du trong tŏng ăp, nŭih công nhân tâm lam dak Mỹ hŏ râng ƀư nau mô hôm ŭch pah kan, nchâp đă nŭih manh nŭih pah kan ân kơt tĭng nau ŭch bah nơm. Bôk năp lah nau mô hôm ŭch kan ta nkuăl ƀon têh Chicago. Nklăp 40 rbăn nŭih mô hăn tât ngih máy. Khân păng ƀư rƀŭn, ƀư nau rŭng răng tâm nkuăl ƀon têh đah nau ŭch “Ntơm bah nar aơ mô geh nŭih thợ ŭch pah kan rlau 8 mông du nar. Ân geh ƀư nau kan 8 mông pah kan, 8 mông rlu rlau, 8 mông pâl m’ak”. Nau joi đă mpeh nau kan aơ lơn nar lơn rgum âk nŭih râng ƀư.

Nar 1/5 dơi uănh lah nar rhơn nău dơi hŏ tă geh, nkoch nău nsrôih ƀư wat jêh nău kan mhe n'hanh mpơl nău tâm rnglăp đah ăp nuĭh kan ăp dak êng ƀa ƀă. Nar 1/5 lah nar mpư rnê ăp mpôl nuĭh kan, rlăch ndăng an bah tâm lơh tâm su, đăp mpăn, geh nău tâm ban lam rêh jêng kon nuĭh. Aƀaơ, Nar Pah kan lam ntŭr neh 1/5 lah nar bah rơh kơn công nhân n'hanh ƀon lan nuĭh kan dak he, nar tâm rnglăp gưl công nhân n'hanh ăp rnoi nuĭh geh tŭn jot dŏng prơ lam ntŭr neh tâm rơh rlăch ndăng yor ma đăp mpăn, bah tâm lơh tâm su, joi geh nău tâm ban n'hanh rgâl mhe nău rêh jêng kon nuĭh./.

Nuĭh rblang: Điểu Thân n'hanh H'Thi