VOV4. M’nông: Ôi ntri (31/3), Quốc hội hŏ ƀư lôch jêh rêng sơch Kruanh Quốc hội khoá XIV, Kruanh Hội đồng Bầu cử gưl neh dak rgâl an wa Nguyễn Thị Kim Ngân- nuĭh hŏ dơi Quốc hội an rlu lĕ năm kan. Đah rnoh phiếu ŭch âk, wa Vương Đình Huệ - Ủy viên Bộ Chính trị, Bí thư Thành ủy Hà Nội, Kruanh Mpôl đại biểu Quốc hội nkual ƀon têh Hà Nội hŏ dơi Quốc hội sơch ƀư Kruanh Quốc hội khoá XIV, Kruanh Hội đồng Bầu cử gưl neh dak.

Nghị quyết mpeh nău sơch wa Vương Đình Huệ ƀư kruanh dơi ăp đại biểu Quốc hội n'hơr ti ŭch an đah 473/473 đại biểu râng n'hơr ti ŭch (âk 98,54% lĕ rngôch rnoh đại biểu Quốc hội). Lah lôch rnôk dơn kan, Kruanh Quốc hội mhe Vương Đình Huệ mbra ndjôt lĕ n'hâm suan he, ndrel nsum mpôl Ủy ban Thường vụ Quốc hội, ăp nhih pah kan bah Quốc hội n'hanh ăp ntŭk kan đại biểu Quốc hội ndơn ƀư, mât uĕh nău way ơm uĕh lăng n'hanh geh nău dơi têh kuâng bah Quốc hội rlău ăp rơh, rgâl mhe tay trong kan, n'hao săk blău tam nău kan, nsĭt geh nău tam kan bah Quốc hội yor ma nău ŭch têh rhŏ dŏng an nău geh bah neh dak, bah rnoi nuĭh, yor ma đăp mpăn rhơn răm bah ƀon lan./.

Nuĭh rblang: Điểu Thân