VOV4.M'nông: Nhih pah kan dak si lam ntŭr neh an gĭt, nklăp 3 rkeh 200 rbăn kon se geh brêt rgay ndal ta Afghanistan tâm kêng dŭt năm aơ, đah 1 rkeh kon se geh ma nău khĭt ji ngot. Nuĭh ntơh ngơi nhih pah kan dak si lam ntŭr neh an gĭt, aơ lah du rơh rdâng lơh jêr jŏt rnôk nău ji ngot nkrum lam neh dak Tây Nam Á dja. Lam ntŭr neh mô ndôn kơi đah Afghanistan. Tĭng nău mbơh bah Nhih pah kan ndơ ngêt sa n'hanh Tuch tăm Liên hợp quốc (FAO), djăt ma 2 hê nuĭh ƀon lan Afghanistan geh 1 hê tâm rdâng đah duh jêr rơh 3 mô lah nô nău mô tŏng ndơ sa ndal gưl 4. Gưl 4 lah rơh dăch kêng ji ngot n'hanh Afghanistan dôl tâm rdâng đah khay sial puh dŭt kri nji tâm rach năm aơ. Ăp nhih pah kan Liên hợp quốc mbơh njrăng lor trong nchrăp kơl nuĭh bah khân păng dơn đăp mpăn tŏng kơl geh 1/3 nău ŭch khlay aƀaơ ta Afghanistan dơm./.

Nuĭh rblang: Điểu Thân