Đắc Lắc: Bax phax tar moz kror ndâux têk tơư

         Txix hâur shôngk shông txos nhiv no, tỉnh Đắc Lắc tưz muôx 48 lênhx nhuôs trâul moz kror ndâux têk tơư. Ngênhx y tế hux jos đros ngênhx zoz zux tưz bax uô lơưr têx tsưr ziv phax tir thêir moz; iz chas co sir jos yax kriê, gra siêz tsưr ziv jênhv pâuz trâu côngv thôngx; tsưr tsix cơưv shâuv cxaz têx tsưr ziv yuôr trâul, hux jos đros cxuô luz tsêr cơưv, lar heik zos chor tsêr cơưv cxênhx nhuôs zâu kriê shux xênhz tsưr ziv phax tir thêir moz. Cưk kriê Lê Thị Giang-uô hâux lưv hâur tsêr cơưv cxênhx nhuôs zâu Thắng Lợi, TP Buôn Ma Thuột heik pâuz: “Cưk kriê hâur pêz tsêr cơưv tsi so kriê têx nhuôs nzuôr têk trơưk li cui tinhv thiêz nzuôr têk hur si uô ntêx tâhuv zuôr nox mor lok sik đhâu tơưv trôngx tas. Iz chas cưk kriê thiêz têx nhuôs tsi so nzuôr, so têx chuôz zênhx uô si, câuv tuv, qơư trâu chor nhuôs chuôz zênhx uô si, qơư nhoz cơưv ntơưr; kaz ciêz mak cưk kriê muôz cuô đêx yuôx nzuôr têx nhuôs chor chuôz zênhx uô si, tưx têik uz no…chiê phax tir thêir moz. Iz chas ntơư, pêz cux tsi so sik thav đros têx nhuôs shux xênhz li niêv txir cov chiê chor nhuôv nox siêr, hâuk bâu, tsơưs chox têx nhuôs muk trâu qơư muôx chôngz nênhs thiêz ndo njôngr chox ntâuz bos kror ndâux”.

       Bác sĩ Trần thúy Minh-Tsar khoa kho moz nhuôs zâu, tsêr kho moz Đa khoa Tây Nguyên heik, moz kror ndâux têk tơư khênhr muôx ntâu tus moz trâul thâuv ntu txix hli 3-11 niêx shông. Moz tsi yuô huôv xênhz phiv liv thiêz jông jux juk đhâu 5-10 hnuz. Taz sik, iz cxiê lênhx nênhs cux trâul moz lox, moz hnhar, muôx têx uô tsi jông txos txox siêr zos tsi tâu qênhz pov, kho moz zênhx max. Bác sĩ Trần Thúy Minh heik: “Xuz thơưx zos chiê têx nhuôs muôx đas jos truôx tuk, nox cxix cxuô têx jâuz mor, li phax tir thêir tâu têx caz moz, hâur co muôx moz kror ndâux têk tơư. Tiv 2, thâuv njuôk xav mê nhuôv trâul muôx moz mak tsuv chiê lênhx nhuôv co nưk nhoz nưk iz kro tsi chiê nhoz đros têx nhuôs txơưr đuô li tsi siz cik tâu moz. Tiv 3, thâuv tâu xav tiêk tus nhuôs ntơư trâul moz kror ndâux têk tơư, muôx yưv têx li: Uô cuz uô no, hnôngk, tơưv têx luz poz hlưr đêx ntơưv xiz têk xiz tơư, kror ndâux mak tsuv zênhx max chox muk chuôs cưk yuôx chiê tâu seiz njuôk shuôs moz, txar jav tsi chiê uô moz lox”.

         Nhiv no, moz kror ndâux têk tơư tsi tâu tâu muôx yuôx vắc xin kho thiêz tsi tâu muôx yuôx lok kho jông. Tsưr ziv phax tir thêir jông tiv zix cux zos vêv xênhz iz chêr cov hur si, qêz suô têx qơư nox nhoz đu lus, muôz cxix cxuô têx jâuz mor trâu nhuôv nox, gra siêz đas jos phax tir thêir moz xưz./.

(VOVTN-Riê Lâux cxeik, nhênhv)