Kinh têr kôngz nuv hlôngr yiêz tox siêz Sơn La 15/1     

           Nhoz thax tsav jos Hưng Hà, xã Chiềng Khương, tỉnh Sơn La, hâur tix lâuk Nguyễn Văn Hưng li vax txir thênhx caz đar 3 hecta tsênhv txos ntu sâu đê, txir siêr đax jông. Muôx tsi ntâu lênhx nênhs pâuz tiêk, thâuv ntêx mênhv chêx no muôx ntu chuôz zis chos txir lưs jôngr kinh têr sâu tâu tsơưs.

          Taz sik, hâur 3 shông tror lok no, tix lâuk chiv chir nriêr pâuz, cơưv shâuv đhâu ntâuz ntơưr, internet thiêz têx trâur nuv uô tsênhv tsênhz, hlôngr tas nro mênhv chêx chiê chos txir thênhx caz sâuv ar têz nxaz. Đhâu tsoz phưz, tix lâuk tsov cưv uô ar, zôngv kỹ thuật zưs đêx cxênhx txuôk, zuôv qir huv đros, phax tuô caz hmoz lơưr tsưr ziv taz por sinh học. Njiê vax txir thênhx caz đhâu 3 shông sir jos tsoz phưz, tix lâuk Hưng lok six shir phaz pheiz kênh, txos nhiv no tưz qir sâuv đêx tâu txir, njuôs xav tax 80 tênhr, tâu tuz luôv tuôx zuôr ciês ntơưv vax, tsi xav nhiêx txiêx tưz yưv mak sâu liv tâu zuôr xar 1 tỷ đeiv: “ Seiz chor txir sâu đê tâu thiêz tsơưr lươngv txir mak cur chuôz zis lok six tso siêz tror yưv pênhr chos cxaz, viv no zos shông xuz thơưx sâu đê, qiv hơưv, ar têz, tsơưr lươngv zuk tsi tâu pâuz tâu tas, zos đhâu 2,3 shông thiêz muôx tâu chênhz zênhv mak zuôr sâu tâu siêz đuô thiêz”.

          Yuôr tix lâuk Nguyễn Văn Tuyền nhoz jos Thống Nhất, xã Chiềng Khương, thâuv ntux tix lâuk zos lênhx nênhs cxiv uô tsêr, côngz tsinhx... txos shông 2021, đros siêz sir jos uô bluô nux txix kôngz nuv, tix lâuk Tuyền tror lok kuz têz qơưk, yưv pênhr tu zus 5 cxênhz tul keiz hâur qơư tu zus đar muôx nhos 400 yiv ndis. Tâu cxiv uô cov tu zus huv đros, zôngv công nghệ sinh học chiê yưr lir, vâuv qir, taz por vêv xênhz tênhx qơư.

          Tix lâuk Tuyền puz pâuz, khov uô lơưr KHKT, keiz hloz lox jông, ntês kê jông, iz shông chox lok trâu chuôz zis phênhv liv txix 200-400 tsov đeiv: “Nhoz no cán bộ xã, Đảng, têz qơưk paz cur chuôz zis lok six ntâu hâur cxuô vênhv thix, txix kỹ thuật thú y, txos qơư sâu zuôr xiv huv. Zaoz thôngz nhiv no huôv tsar, muk lok zôngx ziv đuô, uô hâux lưv tul tsi cux zôngx ziv, tsi khưr li thâuv ntêx thiêz”.

          Chiềng Khương zos xã thax tsav tox siêz tỉnh Sơn La, muôx 25 cei cêr ntâu ntus đriv buôk têz qơưk Lào. Têx shôngk đhâu, khov cấp ủy, chính quyênx tiv phaz li sik côngv đros tsôngv px li chuv tôngv, xar tơưv jông, têx xiv huv kôngz nuv li txir lưv tsiz sôngz, txir trâuv nhux, txir thênhx caz... tsi so huôv tsar jông lok tsơưr lươngv thiêz sâu tâu ntâu. Ntâu xiv huv tâu muôs tơưv trâu Trung Quốc thiêz iz cxiê têz qơưk Châu Âu.

          Xã nhiv no muôx zuôr xar 3 cxênhz 900 ziv chuôz zis tsôngv px, hâur co chor ziv chuôz zis pluôk tsuôk yuôr muôx nhos 4%, chuôz zis zuôr xar pluôk zos 2% ntâu, tsôngv px tso siêz uô lox tôngv xênhz yar, yênhx trus uô bluô nux txix ciês sâuv zuk têz qơưk.

          Lơưr zơưv Nguyễn Công Viên, Chủ tịch UB xã Chiềng Khương, tỉnh Sơn La, tsiv uô kôngz nuv tror tâu xav tênhv zos tiv phaz li kinh têr tsênhv: “Ntu zuôr txos cấp ủy, chính quyênx xã tror uô jông TƯ, tỉnh li chủ trương lok huôv tsar kôngz nuv, chox KHKT lok paz têx ziv chuôz zis nôngx mênhx, HTX chiê tsiv uô lơưr saz jông đuô; chêx chôngk huôv tsar têx thax tsav chos muôx mã thax tsav, têx HTX muôx côngz jênhv VietGap, GlobaGap chiê ndar txos muôs tơưv trâu saz đrâuv têz qơưk. Tiv oz zos tsoz phưz jông têx mênhv chêx txir lưv tsiz sôngz lơưr saz chox KHKT lok uô chiê muôx chêx cuk đuô, txu grês nôngs mênhx li đas jos uô hâux lưv”./.

Trấn Long-Txâur Vax cxeik, nhênhv