Bôv đôiv Pênhz phax paz trâu pêx xênhv nhoz thax tsav Lai Châu muôx cêr sor siêz hâur shông yiêz

             “Cur pov lok shir phaz, viv zos jiês xuz thơưx ciês tâu cxaz chuôz tsiêz đros chor bôv đôiv pênhz phax. Cxaz chuôz li no mak xưk li zuk tâu muk txos ntâu qơư đuô, chiê zuk pâuz tiêk zuk huôv tsar đuô. Thiêz hnuz no cur lok six shir phaz thiêz jông siêz thâuv tâu cxaz chuôz hêik gâux, uô si đros pox nhuôs sơưr đơưk thiêz chor bôv đôiv”.

              Co zos niêv tix Lù Hà Lu-nhoz jok Thò Ma, xar Pa Vệ Sủ, huyện Mường tè, tỉnh Lai Châu li hêik pâuz thâuv tâu cxaz chuôz tsaz yênhx “Bôv đôiv Pênhz phax paz trâu pêx xênhv nhoz thax tsav Lai Châu muôx cêr sor siêz hâur shông yiêz.

              Iz chas niêv tix Lu, chôngz pox nhuôs hâur jok lênhx tưs cux shir phaz, thâuv tâu đros chor bôv đôiv Pênhz phax krưr nduôr txâuv puôz chiê muôz paz trâu chor ziv chuôz zis pluôs; tâu đros nthuôr uô cêr lov jêv, sênhr chêr; sik tưr truz hluô, sik lâuz pak; lok sik muk trâu têx qơư muôs huv tsik tas nhiêx chiê zuôr têx hax huv, tsôngk yo bax trâu têx hnuz Tsiêz…

                Pa Vệ Sủ muôx ntus đriv ntêr 31 cêik cêr ntâu buôs ti đros têz qơưk Trung Quốc, muôx 3 mênhx cxưx sik đros uô nênhx nhoz, hâur co mênhx cxưx La Hủ tsav muôx 90% ntâu. No zos mênhx cxưx lok six tsơưs nênhs, luz nênhx tsênhv txov nhêv. Xưk jok Thò Ma nhiv no muôx 60 ziv chuôz zis mak muôx txos 42 ziv chuôz zis zos chuôz zis pluôs.

                   Đại tá Nguyễn Văn Hưng, Chinhr ủy Bôv đôiv Pênhz phax tỉnh Lai Châu puz pâuz, Tsaz yênhx “Ntux yiêz pênhz phax paz trâu pêx xênhv sor siêz” muôx tsiv gri lok six zov chênhr thâuv sir jos tsoz phưz trâu chor chuôz zis tâu tsênhv chêi têz qơưk paz, chuôz zis pluôs shir phaz tok tsiêz, lov jêv, tsâu sor; đros co, zos hêik tơưv tâu chor canr bôv, chiến sĩ bôv đôiv Pênhz phax; cấp ủy, chinhr quyền, chor ban, nganhx, đoanx thêv ntơưv thax tsav qơư  li cêr siz hluz, siz paz thiêz muôx txơưx jênhv paz trâu tsôngv box nhoz thax tsav ntus đriv; paz gra siêz luz nênhx, cxuô zav trâu pêx xênhv, paz uô tâu jông sik côngv siêz nhoz quân thiêz pêx xênhv; paz trâu chor bôv đôiv lâul Hôx tâu sơưr đơưk njênhs đuô hâur ntu nênhx yiêz nhiv no:

                “Đhâu jiês tsưr tsix tsaz yênhx no, pêz zuôr chox kriê chor zênhx Pênhz phax sik côngv đros cấp ủy, chinhr quyền thax tsav qơư, chor ban, nganhx, đoanx thêv tsưr tsix ntơưv 43 kror qơư txơưr huv zos lơưr tsaz yênhx, tsưr ziv thiêz uô muôx tsơưr lươngv, truôx jông. Đhâu co, paz trâu pox nhuôs nhoz thax tsav ntus đriv tok tsiêz ngaz tuk, cxênhx txuôs thiêz sir jos por vêv truôx jông tsưr qênhx têz qơưk, ngaz tuk ntus đriv têz qơưk hâur cxuô qênhx shênhx”.

                 Têx shông đhâu, đrâuv uô jông côngz xưv tâu choz, bôv đôiv pênhz phax Lai Châu tưz kriz uô ntâu tsaz yênhx paz trâu pêx xênhv huôv tsar kinh têr, jux juk txo grêk yêiz pluôs truôx đrênhk; txo grêk têx phongx cxưx pôngz kaz, cxiv tsa luz nênhx vênhx huôv yiêz.

                Hâux lưv tsưr tsix tsaz yênhx “Bôv đôiv Pênh phax uô tsiêz paz trâu pêx xênhv sor siêz” tưz tsik zos paz trâu pox nhuôs tok tsiêz lov jêv, sor siêz; mak đhâu co tsênhv paz uô truôx jông đuô sik côngv siêz quân thiêz pêx xênhv ntơưv thax tsav ntus đriv; hêik tsôngv box cxuô mênhx cxưx, canr bôv, chiến sĩ thax tsav ntus đriv tror sik côngv siêz, côngv jos uô jông jênhv vưv por vêv tsưr qênhx têz qơưk./.

Khắc Kiên-Lik Thox cxêik nhênhv

Chor nênhs siêz jông paz tsôngk tril yo sor trâu têx nhuôs zâu tox siêz Sùng Đô

             Ntux lok nas thiêz no njiv, taz sik chor cưk kriê ntơưr, nhuôs shux xênhz tsêr cơưv cxênhx nhuôs zâu Sùng Đô, huyện Văn Chấn (Yên Bái) tưz tuôx tsêr cơưv thâuv lok six nzor chiê tok chor nênhs siêz jông; têx nhuôs shux xênhz lênhx tưs cux shir phaz thâuv zuôr tâu đoanx côngz xưv nhoz đrôngs Hà Nội gra têx huv tuôx puz.

            Cưk kriê Phạm Thị Yến, thơưx seiz car tsêr cơưv cxênhx iz JEAN PIAGET heik pâuz, đoanx têx huv muôz puz co lok six muôx liv trâu chor nhuôs zâu tox siêz, ntơư zos: 100 đeiv pav sor, 170 chêr tril yo sor, 70 luz têik trâu mor trâu shux xênhz, 150 luz thôngz trâu đêx, 02 luz lâux câuz lox uô mor tênhv, đros trâu nduôr thax thiêz têx chuôz zênhx uô si.....

             “Xar gra mak lok six ntâu, taz sik tsuv xeir têx zav zov chênhr thiêz zuôr trâul txos, huv đros xưz, đoanx tưz sir jos gra ntâu zav tuôx trâu têx nhuôs nhoz no. Têx suôv qơư li no, tsênhv yuôr ntâu txov nhêv, chênhr viv li jiês no gra tuôx tsi txâuk mak lưv jiês mav tror tuôx đuô”.

             Cưk kriê Nguyễn Thị Huyền Trang, thơưx seiz car tsêr cơưv cxênhx nhuôs zâu Sùng Đô heik pâuz: Tsêr cơưv muôx 300 ntâu lênhx shux xênhz, puôr lênhx zos heir nênhs Hmôngz, luz nênhx tsênhv lok six txov nhêv, hâur co zuôr xar 70 lênhx nhuôv nhiv no tsênhv cơưv hâur têx jêx jok zos: Giàng Pằng thiêz Làng Mảnh, kuôk đêz tsênhv qơư 10 tơưv cêik cêr. Têx hnuz ntux yar mak cheix tâu yêz meir muk txos chor qơư cơưv co, taz sik zos lok nas mak mul tơư xưz tưz cheix tsi tâu yêz hlo. Nhoz no, chor nhuôs shux xênhz tsênhv yuôr ntâu zav muôx tsi txâuk phưx vưv cơưv ntơưr thiêz xênhz huôx. Têx đoanx uô hâux lưv siêz jông tuôx muôz huv puz li heik sâuv tưz paz tsêr cơưv muôx cxix cxuô đuô têx chuôz zênhx phưx vưv kriê cơưv txux thiêz tsoz phưz chor nhuôs.

               “Chor nhuôv ntơưv no, nhoz hâur tsêr cux li tuôx tsêr cơưv tsênhv yuôr ntâu txov nhêv, viv li tsêr cơưv thâuv tưs cux hu lơưk cxuô tsưr tsix, nênhs siêz jông tuôx paz max tsêr cơưv têx chuôz zênhx zuôr trâul txos chiê chor nhuôs muôx txâuk chuôz zênhx phưx vưv cơưv ntâuz ntơưr. Tsêr cơưv uô tsâus lok six ntâu”.

                Hâur ntu đhâu, tsêr cơưv cxênhx iz JEAN PIAGET tưz hux jos đros Đeix nta suôz Việt Nam nhoz faz Bắc uô ntâu tsaz yênhx jông siêz paz têx thax tsav qơư hâur faz Tây Bắc.... Hâu nov tsêr cơưv heik pâuz, zuôr tror txuôk đros, vênhv tôngv têx tsưr tsix, nênhs siêz jông chiê fuô uô ntâu dưv anr, tsaz yênhx paz têx thax tsav txov nhêv hâur ntu zuôr txos./.

Tuấn Xuân-Riê Lâux cxeik, nhênhv