Yên Bái sir jos cxiv tsa qơư nhoz yiêz, ngaz tul luz nênhx trâu tsôngv box đhâu jiês ntux nas uô ruôr hiêv

          Đhâu jiês ntux lok nas lox tiv coz nas chuô số 3 nhiv kruôr đhâu, xã Tân Hương, huyện Yên Bình, tỉnh Yên bái muôx 270 ntâu ziv chuôz zis trâus ruôr hiêv hnhar lok vax tsêr, hâur co muôx 30 ziv tsuv txar qơư nhoz yiêz.

          Hli 11 no, ciês thâuv qơư nhoz yiêz tâu choz trâu têx ziv chuôz zis tsôngv box zos chuôz zis tsuv txar qơư nhoz mak tsi chiv chir bax ar nhoz, tix lâuk Nịnh Thanh Nghị chuôz zis nhoz jos Khuôn Giỏ, cux li têx ziv chuôz zis txơưr qir cxiv uô tsêr nhoz yiêz.

          “ Môngr jông tâu têx cấp chính quyênx bax ar nhoz, tsi li mak tsi pâuz uô li chas thiêz. Nhoz no mak tso siêz đuô, tiv iz zos tsi cxơưx muôx tox poz, tsi cxơưx trâus đêx ngaz, tiv oz zos cux nhoz jê qơư kuz, zôngx ziv muk lok uô nox; nhoz no cux jê niêv cêr lox thiêz, lok six jông trâu pêz”

          Niêv lâuk Hầu Thị Luận, Tsar jos Khuôn Giỏ, xã Tân Hương, huyện Yên Bình, tỉnh Yên Bái puz pâuz, txơưv luz nênhx tsênhv yuôr ntâu phêv liv, taz sik tsôngv box cux tso siêz, pox nhuôk hâur jos tsênhv sik côngv tês tror cxiv tsa đuô luz nênhx yiêz.

          “ Jos cux huiz tôngv pox nhuôk chêx chôngk sik paz max chiê txu grês phênhv tưs têx phêv liv. Pox nhuôk hâur jos lok six sik côngv siêz sik đos paz max thâuv muôx ntux nas, nhiv no mak sik paz max cxiv uô tsêr nhoz, thâux gra chuôz zênhx…”

          Coz nas chuô số 3 tưz uô zuôr xar 240 ziv chuôz zis nhoz huyện Yên Bình, tỉnh Yên Bái trâus poz vâu, puôk tsuôx hnhar thiêz njuôs xav trâus đêx cuôr yôngz, tox poz lok vôngz tas; tsi tâu heik txos yênhx cxênhz ziv chuôz zis txơưr trâus zênhr shar, chêx chôngk phênhv ntâu nhoz têx xã Tân Hương, Phúc ninh, Phúc An, Bảo Ái thiêz thị trấn Thác Bà.

          Đhâu jiês ntux nas, đros zuôr xar 100 ziv chuôz zis tsôngv box muôx txâuk theox chênhv chiê tror cxiv uô đuô tsêr nhoz ntơưv qơư nhoz kuz, huyện tưz ciêr chênhr muôz pênhr nhiêx chiê tsôngv box kho đuô, cxiv uô đuô tsêr nhoz ntơưv qơư nhoz kuz. Đros 23 ziv chuôz zis tsôngv box tsuv txar qơư nhoz mak tsi muôx ar nhoz, huyện tưz bax ar ntơưv têx qơư nhoz yiêz. Đros 138 ziv chuôz zis tsi tsuv txar qơư nhoz, taz sik chiv chir bax tâu ar nhoz, huyện tưz paz nhiêx txiêx, njuôs xav, uô tiêr ntâuz ntơưr, paz hlôngr tsưr ziv sir zôngv ar…chiê tsôngv box uô tsêr nhoz.

          Zơưv Lưu Cảnh Thăng nhoz jos Khe Gầy, xã Tân Hương- iz hâur têx ziv chuôz zis tâu bax ar nhoz puz pâuz, luz tsêr yiêz tsênhv tâu uô kuôk luz tsêr kuz trâus poz vâu muôx nhos 300 yiv, nhiv no tưz uô tiêr muôx nhos 60%:

          “ Chor ar têz no chuôz zis krêz phaz txix nzor, nhiv no tâu chính quyênx tiv phaz paz luôv chiê uô tsêr nhoz, uô ntâuz ntơưr mak têx cấp chính quyênx cux tsênhv paz uô ntơưr tso chei sir zôngv ar. Heik cxuô li no mak chuôz zis tưz pov lok six tso siêz chiê jux jus sir jos đuô hâur luz nênhx. Uô tsâus Đảng, têz qơưk, têx cấp chính quyênx thiêz têx lênhx nênhs siêz jông”.

          Đros hâux lưv chêx chôngk têx pênhr jos chiê chox têx ziv chuôz zis tsôngv box muk đhâu thax tsav qơư riêz nênhs, bax qơư nhoz yiêz truôx tul trâu tsôngv box thax tsav trâus coz nas chuô số 3 uô ruôr hiêv, txos nhiv no, 100% ziv chuôz zis tsôngv box nhoz huyện Yên Bình tsuv txar qơư nhoz tưz muôx ar nhoz thiêz qir krêz côngz cxiv uô tsêr nhoz, têx ziv chuôz zis khưx phưx tâu ntơưv qơư mak cux uô tiêr hâux lưv khưx phưx tox poz chiê kho đuô tsêr nhoz. Đros tas nro nhiêx phí muôz xav txos nhiv no zos 9 tỷ đeiv ntâu. Zơưv Lã Tuấn Hưng, Phưv Chủ tịch UB huyện Yên Bình, tỉnh Yên Bái puz pâuz:

          “ Hâux lưv bax qơư nhoz yiêz trâu tsôngv box trâus ruôr hiêv tiv coz nas chuô số 3 tâu huyện xav tênhv zos jênhv vưv tsênhv, ciêr chênhr uô, chêx chôngk lênhs tov, chox kriê thiêz tsưr tsix uô. Đrâuv ciêr chênhr bax tâu ar nhoz trâu têx ziv chuôz zis muôx tsêr trâus poz vâu, đêx cuôr yôngz, huyện tưz sik côngv uô cê tỉnh, trung ương đros mặt trận tổ quốc huyện li têx nhiêx txiêx paz txưv chiê paz cxaz trâu têx ziv chuôz zis ciêr chênhr kho đuô, cxiv tsa tsêr nhoz yiêz”./.

(Trịnh Xuân-Txâur Vax cxeik nhênhv)