Hnuz ntênhs vênhx huôv Hmôngz jiês tiv IV tsưr tsix txix hnuz xiêz 9 txos hnuz 11/10 trâu ntơưv Điện Biên

Lơưr Tsưr ziv, Hnuz ntênhs Vênhx huôv mênhx cxưx Hmôngz jiês tiv IV, shông 2026 tsưr tsix hâur 3 hnuz, txix hnuz xiêz 9 txos hnuz 11/10 ntơưv phường Điện Biên Phủ (tỉnh Điện Biên), đros muôx 11 tỉnh muôx chôngz tsôngv px mênhx cxưx Hmôngz nhoz uô nênhx tuôx cxaz chuôz, co zos: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An thiêz Đắk Lắk. Ntênhs krêz tsưr tsix thâuv 8 six tsâus ntux hnuz xiêz 9/10 ntơưv Quảng trường 7/5.

Hâur Hnuz ntênhs muôx ntâu huôx tôngv vênhx huôv, nghệ thuật jông tâu tsưr tsix li: Heik kriê Kênhx Hmôngz; piêr pâuz, nthuôr uô vênhx huôv chax chês mênhx cxưx Hmôngz; hêik kriê, piêr pâuz hâux lưv chax chês; nthuôr uô cêr lov jêv; hêik kriê tsôngs yo chax chês mênhx cxưx Hmôngz; Carnaval tâus cêr; tsưr tsix qơư ndis shuôk vênhx huôv chax chês, qơư ndis shuôk zav nox chax chês mênhx cxưx Hmôngz; têx huôx tôngv thiv thao thiêz uô si trâur lâuk…

Lơưr Ban tsưr tsix, Hnuz ntênhs tâu tsưr tsix chiê kruôk txos, por hưv thiêz phuôx huiz tsôngv px mênhx cxưx Hmôngz li têx tsiv gri vênhx huôv chax chês jông hâur vênhx huôv Việt Nam, paz phênhv tuôr truôx cêr niêv côngv siêz tas nro mênhx cxưx thiêz phuôx huiz đas jos côngv thôngx cxuô mênhx cxưx Việt Nam hâur ntu têz qơưk huôv tsar; paz phênhv chuôz tsar sik côngv vênhx huôv hâur têx tiv phaz muôx tsôngv box mênhx cxưx Hmôngz nhoz uô nênhx, cxơưz tiês huôv tsar vênhx huôv, ju lix reik đros por hưv tsiv grê vênhx huôv mênhx cxưx.

No cux zos huôx tôngv chiê uô tsênhz mênhx Đảng, têz qơưk li têx tsưr ziv, têx chêi lok côngz xưv mênhx cxưx thiêz huôv tsar vênhx huôv; hâur co, hâux lưv tsênhv zos Ban Bí thư Trung ương Đảng li Chỉ thị sôr 60 hnuz 22/01/2026 lok chuôz tsar côngz xưv thax tsav tsôngv box mênhx cxưx Hmôngz hâur ntu têz qơưs hlôngr yiêz; Bộ Chính trị li Nghị quyết sôr 80 hnuz 07/01/2026 lok huôv tsar vênhx huôv Việt Nam…

Zơưv Nguyễn Minh Phú, Phưv Chủ tịch UBND tỉnh Điện Biên, Tsar Ban tsưr tsix Hnuz ntênhs puz pâuz, tỉnh xav tênhv hâux lưv tsưr tsix Hnuz ntênhs Vênhx huôv mênhx cxưx Hmôngz jiês tiv IV, shông 2026 cê zos kror jông, cê zos txơưx jênhv, thôngx cxix cux zos tỉnh Điện Biên - tiv phaz muôx tsôngv px mênhx cxưx Hmôngz chôngz pir đros ntâu tỉnh hâur thax tsav thiêz tas nro têz qơưk li kror jông siêz. Hnuz ntênhs tsi tiêk zos jiês piêr pâuz, kruôk txos têx vênhx huôv chax chês, mak tsênhv zos jiês piêr pâuz thax tsav qơư, lênhx nênhs Điện Biên txos tsôngv kruô hâur thiêz đrâuv têz qơưk.

Tỉnh Điện Biên cir jênhv chuv tôngv, sik côngv truôx jông đros têx cơ quan hâur Bộ vênhx huôv, thiv thao thiêz ju lix đros têx tiv phaz, chêx chôngk siêz tiv zix trâu têx jênhv vưv tâu choz; taz por Hnuz ntênhs tâu tsưr tsix jông, tsênhv tsênhz, taz por, cxênhx txuôs, phuôx huiz tsôngv px Hmôngz li pưk txux, muôz siêz tsiv gri trâu pêx xênhv thiêz tsôngv kruô nhoz cxuô thax tsav qơư.

Hnuz ntênhs vav tiêk zuôr muôx têx cêr shir phaz. Tsôngv px thiêz tsôngv kruô sđ tsuv ciêr chênhr bax six hơưv, hnuz nhôngs  tuôx trâu Điện Biên, chiê tâu ndis shuôk, nriêr pâuz tsôngv px Hmôngz nhoz Điện Biên li têx cêr vênhx huôv jông./.

                                                                                                           Thu Thùy, VOV Tây Bắc

Điện Biên huôv tsar truôx pêz hêir nênhs Hmôngz têx vênhx huôv jông hâur ntu têz qơưs hlôngr yiêz

Xã Sính Phình, tỉnh Điện Biên, pêz hêir nênhs Hmôngz muôx 99% danh số, 16 cxênhz ntâu lênhx nênhs, nhoz trâu 30 luz jos. Hâur thax tsav qơư co, pêz hêir nênhs Hmôngz tsênhv tuôr tâu truôx zuk hêir nênhs têx txux chi, vênhx huôv jông cxôngx nzor muôx đros đrêiv hâur luz nênhx.

Txix têx nja jêz cxiv thêir iz ndis tsêr, têx tsêr ntông đros trâu têx tsôngk tiêz tsôngk yo jông jav cxôngx nzor cux tsênhv tuôr tâu truôx.

Đhâu hâur iz hnuz muk khưr uô kôngz lông, pos Mảy x Zax nhoz jos Tà Là Cáo cux huôk njôngr six hơưv đros cxuô lênhx hâur qơư ntok ntâuz, ntok tâu têx ntâuz max thiêz muôz chiêz mur cok sâu trâu têx ntâuz ntok tâu co txêix pax jông jav thiêz xơưk tâu têx tsôngk tiêz, tsôngk yo txêix pax jông txơưr tsik siz thôngx.

Hâur ntu têz qơưs hlôngr yiêz nhiv no, hâur ciêz đrôngl muôx ntâu tsôngk tiêz tsôngk yo muôs, taz sik tsôngv pox niêv vir ndâuk Hmôngz nhoz Sính Phình cux tsênhv niêx hnuz xơưk tâu zuk hêir nênhs têx tsôngk tiêz, tsôngk yo jông jav cxôngx nzor chox lok hnar hâur niêx hnuz. Pos Mảy x Zax, zos iz lênhx tsênhv tuôr tâu truôx zuk hêir nênhs luôs hâux lưv ntok ntâuz cxôngx nzor shir phaz lul hêik pâuz:“Zuk hêir nênhs luôs hâux lưv ntok ntâu cxôngx nzor, zuk tsuv tuôr tsês cov tâu truôx tsik chiê pôngz plox. Viv zuk pox côngz, zơưv côngz tsês zuk hêir nênhs têx vênhx huôv jông trâu zuk; txix ntơư, zuk zuôr tsês trâu têx mê nhuôv tov kaz, tsik chiê zuk hêir nênhs têx vênhx huôv jông trâus pôngz plox”

Iz chas huôv tsar truôx zuk hêir nênhs luôs hâux lưv ntok ntâuz cxôngx nzor, tsôngv px Hmôngz hâur thax tsav qơư co cux tsênhv tuôr tâu truôx luôs hâux lưv muôz poz jêz chox lok cxiv uô nja vax thêir ndis tsêr huv đros zuk hêir nênhs luz nênhx nox nhoz muk lok hâur niêx hnuz. Zơưv Kỷ x Zax nhoz jos Tà Dê, xã Sính Phình shir phaz lul hêik pâuz: “Muôz poz jêz chox lok cxiv uô nja vax thêir tsik chiê kêiz, buô, nhux tưv, nhux đas lok hâur tsêr. Chor nja vax poz jêz no, chor lâuk cux zôngv đhâu ntâu tiêv lok thiêz chor chuôz zis nhoz luz jos no, ziv chuôz zis tưs cux muôz poz jêz chox lok cxiv uô nja vax thêir tsêr”

Nhoz cxuô jêx jos thax tsav faz Bắc pêz têz qơưs, hâur têx hnuz kriz ntênhk hội, thâuv tưs cux muôx pêz Hmôngz têx txux chi kênhx, lar hêik zos hâur têx hnuz kriz ntênhk hội côngv thôngx. Trơưk li zơưv Yênhx A Tâu, pêz Hmôngz têx txux chi kênhx, zos iz zav txux chi muôx liv lox hâur pêz Hmôngz luz nênhx. Zơưv Yênhx A Tâu shir phaz lul hêik pâuz: “Kênhx, iz chas yuôz, đhiê uô cêr lov jêv, kênhx cux muôx liv lox trâu pêz Hmôngz luz nênhx. Tưz zos Hmôngz txơưv nhoz trâu thax tsav qơư tưs tsuv muôx kênhx. Lar hêik zos pêz Hmôngz têx txux kênhx tâu zôngv yuôz trâu thâuv muôx iz tus lâuk pur 120 shông tâu tas siv nênhx, tsuv muôz traz kênhx chox lok yuôz chiê xa lênhx nênhs tâu tas siv nênhx co muk thơưx thiêz, muk chuôs pox côngv zơưv côngz”

Huôv tsar truôx pêz Hmôngz têx txux chi kênhx nhoz cxuô jêx jos thax tsav tỉnh Điện Biên cux chênhr zos cxơưz cxiz cxuô hêir nênhs sđ tuôr cov tâu truôx zuk hêir nênhs tsơưs têx txux chi, vênhx huôv jông cxôngx nzor cov muôx đros đrêiv hâur luz nênhx niêx hnuz tsik chiê pôngz plox./.                    

                                                                                            Tsu cxêik nhênhv-Vũ Lợi-Lưu văn bản

Sơn La chuôz tsar pênhr jos chiê huôv tsar vênhx huôv txix ciês ntơưv qơư

Sơn La zos qơư 12 mênhx cxưx sik đros nhoz uô nênhx, hâur iz côngv thôngx nhiês muôx nhiês têx vênhx huôv jông tâu tuôr tsês đhâu luk hêik, ntơưr sâu, ntênhk phêv, cưr cxiêx, đhiê pax vuôs, tsôngk trik yo thiêz têx cêr huôv tsar uô nênhx, nox nhoz muk lok hâur côngv thôngx. Hâur co, têx vênhx ziv nthuôr uô cêr lov jêv ntơưv jêx jok, chênhr zos têx lênhx nênhs tsênhv tsênhz tuôr tsês thiêz choz kriê têx tsiv gri co.  Chiê muôx nzir pênhr jos trâu huôx tôngv vênhx huôv côngv thôngx, HĐND tỉnh Sơn La tưz tso tơưv Nghị quyết sôr 23 hnuz 28/8/2026, cui tênhv phênhv paz huôx tôngv vênhx ziv côngv thôngx sâuv thax tsav tỉnh.

Lơưr co, txix hnuz xiêz 1/1/2027, nhiêx txiêx tỉnh paz 8 tsov đeiv iz shông trâu yênhx jêx jok, tiểu khu, tôv dân phố muôx tsưr tsix huôx tôngv vênhx ziv côngv thôngx. Phênhv paz no tsar ndê 4 jiês pir li cui tênhv nhiv no zos 2 tsov đeiv iz jok iz shông. Pos Quàng Thị Thinh, lênhs nênhs hâur câu lạc bộ vênhx huôv Thái, phường Chiềng Cơi shir phaz heik: “Pêz lok six jông siêz thiêz shir phaz thâuv tỉnh muôz siêz phênhv paz txưv ndê txos 8 tsov đeiv iz shông trâu đoanx vênhx ziv tsôngv px. Kror no zuôr muôz nzir cxuô zav chiê pêz tuôr truôx cơưv shâuv, cxaz nzir tsôngk trik yo, chuôz zênhx, cưr lok, tsưr tsix nthuôr uô cêr lov jêv thiêz kriê vênhx huôv chax chês trâu cxênhx hluôk nênhs.

Pos Hoàng Thị Đôi, Giám đốc Sở Vênhx huôv, Thêv thao thiêz ju lix tỉnh Sơn La xar tiêk, hâux lưv muôz siêz phênhv paz uô ntêx zos yưv pênhr trâu lênhx nênhs thiêz đas jos vênhx huôv txix ciês tiv phaz: “Đros 2.200 ntâu tuêv vênhx ziv tsôngv px tsênhv huôx tôngv ntơưv têx jêx jok, tiểu khu, tuêv dân phố, no zos iz lưx lươngv lok six lox, nhoz ciês hâur pêx xênhv li luz nênhx vênhx huôv. Lơưr tsi taz zos têx lênhx nênhs nthuôr uô vênhx ziv mak tsênhv zos têx lênhx nênhs paz tuôr tsês têx cưr cxiêx, đhiê pax vuôs, tsôngk tril yo, ntênhs phêv, cêr nênhx phôngz cxưx thiêz têx txux chi vênhx huôv côngv thôngx. Viv li, thâuv muôx nzir pênhr jos, tsi taz muôx nzir têx jiês nthuôr uô vênhx ziv, mak tsênhv zos kror paz chiê vênhx huôv tâu uô tsik so thiêz tâu heik kriê txix cxênhx nênhs no trâu cxênhx nênhs tov kaz”

Lơưr pos Hoàng Thị Đôi, ntu zuôr txos, nganhx Vênhx huôv, Thêv thao thiêz Ju lix zuôr sik côngv đros têx tiv phaz, doanh nghiệp thiêz côngv thôngx yax kriê têx tuêv vênhx ziv gra siêz tsơưr lươngv nthuôr uô cêr lov jêv, tsưr ziv sik thav, tsưr tsix tsaz yênhx; cxiv tsa têx jiês nthuôr uô cêr lov jêv huv đros yênhx jiês tos tiêv kruô, thôngx cxix sik côngv têx tuêv vênhx ziv đros qơư ju lix, qơư nhoz so thiêz doanh nghiệp chox kruô muk ndis seiz uô si: “Uô ntêx, tiv phaz li huôx tôngv vênhx ziv zuôr tâu tuôr truôx cơưv shâuv tsik so, cxaz nzir tsôngk tril yo, chuôz zênhx thiêz tsưr tsix kriê trâu chor hluôk. Tiv oz, pêz xar cov têx tuêv vênhx ziv yênhx qơư vênhx huôv hâur côngv thôngx tsôngv pxx. Iz kro lok six coaz tsôngv thiêz zos sik côngv têx huôx tôngv vênhx ziv tsôngv px đros huôv tsar ju lix, tiv zix zos ju lix côngv thôngx”

Đros co, nganhx Vênhx huôv, Thể thao thiêz Du lịch tỉnh Sơn La xav tênhv nghệ nhân, têx lênhx nênhs pâuz lok vênhx huôv thiêz cxênhx hluôk nênhs zos têx lênhx nênhs coaz tsôngv hâur ntu por hưv, phuôx huiz vênhx huôv. Zos nghệ nhân, lênhx nênhs pâuz txos vênhx huôv zos têx lênhx nênhs kriê, mak đoanx vênhx ziv zos qơư chiê vênhx huôv piêr kriê; hok cxênhx hluôk nênhs zos lưx lươngv tuôr tsês, thôngx cxix chox têx tsiv gri cxôngx nzor txos trâu côngv thôngx đhâu têx tsưr ziv yiêz, hâur co muôx nền tảng số.

Thâuv tâu tsưr tsix uô jông, 2.200 ntâu đội vênhx ziv tsôngv px zuôr tsik zos uô jênhv vưv nthuôr uô cêr lov jêv ntơưv jêx jok, tiểu khu, tôv dân phố xưz mak tsênhv zuôr yênhx iz cxix luôk tsưr tsix vênhx huôv nhoz tiv phaz. Txix co, têx tsiv gri vênhx huôv tâu tuôr tsês jông đuô, tsôngv px li luz nênhx vênhx huôv tâu muôz siêz, thôngx cxix muôx cxaz têx xiv huv vênhx huôv - ju lix jông./.

                                                                                                                Thanh Thủy-Riê Lâux cxeik, nhênhv