Thâuv Đảng tsênhv chei uô lơưr hâur luz nênhx nhoz tox siêz Si Pa Phìn

             “Pêz Đảng thâuv tưs tưz xav tinhv zoz zux zos zov chênhr, zos qơư khov chiê huôv tsar têz qơưk sei thiêz truôx. Đros thiêz chor thax tsav ntus đriv, tox siêz đêz đrôngs, zoz zux tsi tiêk gra siêz sơưr đơưk tsưr ziv jênhv pâuz, kriê txux chi trâu lênhx nênhs, tsênhv zos tsưr ziv jông thiêz ntêr chiê tsưx phưv truôx têz qơưk, ntơư zos lênhx nênhs, zos côngv thôngx pêx xênhv muôx đros ar têz, jêx jok, cêr đriv têz, ndêx cxok kuôk ntus đriv. Tsưr ziv yưv pênhr cxiv uô tsêr cơưv phổ thông nội trú 2 cấp ntơưv têx xã ntus đriv zos iz chei huv đros, muôx liv chính trị, xã hội”.

              Txix têx tsưr ziv, tsênhv chei zov chênhr tâu Tổng Bí thư Tô Lâm heik mênhx, muôx têx pov zoz zux ntus đriv tsi zos hâux lưv uô nhiv no, mak tsuv tuôr xav cov ntêr lok huôv tsar lênhx nênhs, truôx tuk pêx xênhv thiêz tsưx phưv jông têz qơưk. Nhoz Si Pa Phìn-xã ntus đriv tsênhv yuôr ntâu txov nhêv hâur tỉnh Điện Biên, Đảng tsênhv chei tưz tâu uô tsênhz mênhx txix hlôngr pâur tsưr ziv yiêz kriê txux chi, fuô uô jông thiêz truôx.

            Tsêr cơưv Phổ thông nội trú 2 cấp Si Pa Phìn nhiv no tưz cxiv uô tâu tiêr, muôx qơư nhoz cơưv ntơưr truôx tuk. Hâur qơư cơưv, tsêr cơưv yiêz co, cxuô lênhx shux xênhz lênhx tưs cux jông siêz, shir phaz thâuv tâu cơưv txux chi hâur iz qơư cơưv muôx cxix cxuô zav đuô ciês sâuv chênhr thax tsav ntus đriv zuk xênhz thiêz hloz lox. Hương Ly Xênhv Vax, shux xênhz tsêr cơưv Phổ thông nội trú 2 cấp Si Pa Phìn heik: “Luz tsêr cơưv kuz thâuv ntêx tsi jông li no. Luz yiêz nhiv no cxiv uô tâu jông đuô, cur lok six shir phaz, jông siêz viv tưz muôx tsêr cơưv yiêz trâu pêz cơưv txux chi. Cur zuôr sir jos cơưv ntơưr chiê tsiv nhos trâu niêv txir thiêz chor cưk kriê ntơưr côngz đas jos tu zus hloz thiêz kriê txux chi, cov tov kaz no cxơưz paz cxiv tsa têz qơưk huôv tsar”.

            Hương Ly cêr jông siêz ntơư cux chênhr zos ntâu lênhx shux xênhz thax tsav ntus đriv Si Pa Phìn cêr shir phaz nhiv no. Txix têx lớp cơưv tsênhv đaz tuôs, muôx tsi txâuk cxuô zav, nhoz tox siêz đêz đrôngs, chor nhuôs shux xênhz nhiv no tưz tâu nhoz thiêz cơưv txux chi hâur iz qơư cơưv jông, truôx tuk, muôx cxix cxuô zav đuô, paz cxơưz đas jos, cêr njênhs njôngr chiê chor cưk kriê ntơưr thiêz shux xênhz sir jos hâur kriê thiêz cơưv txux chi. Cưk kriê ntơưr Bùi Thị Lương, Phưv thơưx seiz car tsêr cơưv Phổ thông nội trú 2 cấp Si Pa Phìn heik: “Tsi tiêk chor cưk kriê ntơưr, têx nhuôs shux xênhz xưz, tsôngv box hâur thax tsav puôr lênhx jông siêz, shir phaz đros, thâuv tso zuk têx mê nhuôv nhoz, cơưv hâur iz luz tsêr cơưv jông, lox đar thiêz hur si li no”.

           Tsêr cơưv Phổ thông nội trú 2 cấp Si Pa Phìn muôx 31 lớp cơưv, đros trâu ntâu qar qơư têx lênhx cưk kriê ntơưr thiêz shux xênhz nhoz uô hâux lưv, nhoz pư, xênhz huôx muk lol. No zos luz tsêr cơưv xuz thơưx hâur tsaz yênhx cxiv uô 248 luz tsêr cơưv phổ thông nội trú 2 cấp ntơưv 248 xã ntus đriv sâuv ar hâur tas nro têz qơưk, tâu fuô uô trơưk Bộ Chính trị tsưr ziv. Fuô uô luôs hâux lưv no tsi tiêk muôx tâu têx tsêr cơưv truôx khor cơưv txux chi, tsênhv paz tsưx phưv tâu truôx shux xênhz tuôx cơưv ntơưr cxix cxuô, paz gra siêz pênhr jos ntơưv qơư thiêz muôz qơư khov jông trâu huôv tsar kinh tế xã hội reik đros tsưx phưv truôx thax tsav ntus đriv têz qơưk. Zơưv Xâur Xênhv Zax, nhoz jok Phi Lĩnh 2, xã Si Pa Phìn shir phaz heik: “Luz tsêr cơưv no, thâuv cxiv uô mak hâur jok cux muôx ntâu tus muk đros paz lơưr uô hur si. Tsôngv box lok six tso siêz thâuv tso têx mê nhuôv nhoz, cơưv ntơưv no thiêz cur cux xa luk uô tsâus ntâu txos Đảng, têz qơưk tưz moz siêz txos pêz tsôngv pêx xênhv”.

          Đhâu 96 shông yênhx lix thiêz huôv tsar, pêz Đảng thâuv tưs tưz tuôr truôx iz tsưr ziv chox kriê: Zuôr lênhx nênhs uô qơư chênhr, zoz zux uô qơư khov chiê huôv tsar truôx têz qơưk.

Nhiv no, nhoz thax tsav ntus đriv tsênhv yuôr ntâu txov nhêv; tsưr ziv, tsênhv chei ntơư tưz uô tsênhz mênhx txix paz cxiv uô têx luz tsêr cơưv jông, truôx khor. Thâuv Đảng tsưr ziv chox kriê huv đros pêx xênhv, têx tsênhv chei puôr lênhx zok nriêr tâu qơư sơưr truôx hâur tsênhv tsênhz thiêz nthuôr đêz đar têx jông, muôx liv txos trâu ntâu thax tsav, suôv qơư, chôngz lênhx ntâu tus./.

Vũ Lợi-Riê Lâux cxeik, nhênhv

Ntux yiêz sor so nhoz tox siêz Co Mạ

             Shông no, ntâu ziv chuôz zis nhoz chor jêx jok tox siêz Co Mạ, Sơn La nox Tsiêz lov jêv, shir phaz đuô khov uô nox tâu jông đuô. Chuôz zis tưs cux bax tâu kêiz, buô chiê nox Tsiêz. Chor pos, chor niêv cux tưz bax txâuk têx tsôngk yo trâu chor tuz nhuôs hnar muk uô si tsiêz. Chôngz lênhx tuz hluôk mak tưz bax tâu trâu zuk têx luz vix vôngs lok zos tux luz yiêz jông thiêz têx traz hnênhr ndax, muôx jos chiê chor muk sik tưr ntâuk tux luz, sik tưr tuôx hnênhs hâur têx hnuz lov jêv zos jok thiêz xar tsưr tsix.

            Tix lâus Đồng Xênhv Vax, nhoz jok Co Mạ, xar Co Mạ shir phaz hêik pâuz: Txix chor koz tsoz tưz paz trâu tix lâus chuôz zis sâu tâu nhiêx siêz. Xar muôx 2 héc ta chos, iz shông, tix lâus chuôz zis sâu tâu muôx 50 ntâu tấn kok tsơưz. Gri muôs 4000 đêiv ntâu iz cir, tix lâus chuôz zis sâu tâu lok muôx 200 triệu đêiv ntâu, zos phênhv sâu tâu tsik tsơưs thiêz siêz đuô lok six ntâu pir li chos blêx thiêz poz cưk li thâuv ntêx no. Shông no, kriz đar nzir thax tsav chos, txơưv tsênhv tsik tâu sâu taz sik cux zuôr tror paz trâu chuôz zis muôx nzir phênhv sâu chiê tror huôv star kinh têr hâur shông yiêz no thiêz têx shông zuôr txos.

           Niêv tix Kâiz Xênhv Vax, nhoz jok Pha Khoang, xar Co Mạ ho xêir tsov huôv tsar kinh têr ziv chuôz zis txix tu zus tsiêx cxu. Hâur shông niêv tix chuôz zis tưz muôx oz jiês nhux, paz sâu tâu xar muôx 150 triệu đêiv. Nhiv no, niêv tix chuôz zis chor nhux yuôr muôx 15 tuk, hâur co muôx 7 tuk mâuv zus chiê sha mê nhuôv, chor buô muôx 20 ntâu tuk, tâu muôs tsik so cux paz trâu niêv tix muôx nzir phênhv sâu. Niêv tix chuôz zis tsênhv cxiv tsa tsêr trọ trâu chor shux xênhz vax tsêr đêz tsêr cơưv ntiêr nhoz gri kik chiê cơưv ntơưr thiêz. Niêv tix Kêiz Xênhv vax hêik pâuz.

             Đhâu chiê lok uô cê thiêz uô lơưr chinhr quyền oz cấp, xar Co Mạ muôx 33 jêx jok, zuôr xar 2.900 ziv chuôz zis, xar muôx 15.000 lênhx nênhs zos 4 mênhx cxưx sik đros uô nênhx nhoz, hâur co mênhx cxưx Hmôngz chôngz đuô 90%. Pêx xênhv nhoz tox siêz Co Mạ luz nênhx phênhv ntâu zos khov trâu uô kôngz nuv, kinh doanh dịch vuv zâu. Đros tsêx trung hlôngr yiêz tsoz chos, tsiêx tu zus, hêik pêx xênhv sir jos phuôx huiz têx kror liv muôx ntơưv qơư, shông 2025, Co mạ tưz txo grêk tsơưs tâu 198 ziv chuôz zis pluôs, bâuv 6,8%. Shông 2026, xar tror chox kriê sir jos phuôx huiz têx kror liv zênhx muôs, tsêx trung chos nzir chor zav tsoz chos chênhr ntơưv thax tsav qơư, huôv tsar tu zus tsiêx cxu, chos nzir chor zav tsoz chos yiêz li Cà phê, ntông nox txir, kok tsơưz, jâuz tâuv, sir jos txo grêk tsơưs chor chuôz zis pluôs txix 5-10% pir li shông 2025.

            Zơưv Cuôv Xênhv Thox, Phưv Chủ tịch Ủy ban xar Co mạ puz pâuz: đros sir jos “tsik chiê lênhx tưs trâus tso tsês tov kaz:, xar Co Mạ kriz uô jông hâur lưv paz, sêiz nus khơưk muoz huv puz trâu chor ziv chuôz zis tâu têz qơưk paz, nênhs muôx côngz, ziv chuôz zis pluôs, zuôr xar pluôs sâuv thax tsav xar. Đrâuv têx phênhv paz lơưr cui tênhv, xar cux bax têx hax huv muôx tsiv gri zos têx chuôz zênhx sir zôngv, zav nox chênhr chir paz trâu chor chuôz zis tâu têz qơưk paz, chuôz zis pluôs thiêz chor chuôz zis muôx luz nênhx txov nhêv, cov sơưr đơưk puôr lênhx muôx tâu iz luz tsiêzz nox sor so, lov jêv, shir phaz, ngaz tuk thiêz cxênhx txuôs: “Xar tưz chox kriê Phòng Vênhx huôv, Xar hôiv qênhz shuôk chor nênhs muôx luz nênhx txov nhêv  zuôr nox tsik tâu tsiêz chiê hêik pâuz thor têx phênhv paz, chox kriê chor jêx jok tsưr tsix Tsiêz tsuv tuôr tsês tau zuk mênhx cxưx têx phongx cxưx, cêr nênhx jông. Tsưr tsix Tsiêz tsuv sor so, ngaz tuk, cxênhx txuôs thiêz muôx tsiv gri tiv zix trâu pox nhuôs”.

           Iz chêix ntux yiêz tưz tror lok txos thax tsav tox siêz Co Mạ. Nhoz ntơưv no, pox nhuôs tsênhv sik côngv đros chinhr quyền sir jos uô côngz xưv txos grêk yêiz pluôs, hlôngr yiêz luz nênhx chir paz muôx tâu iz chêix ntux yiêz tsâu sor đuô./.

Lik Thox cxiv sâu thiêz cxêik nhênhv

Kênhx Hmôngz-Zav chuôz zênhx paz tuôr tsês chiê mênhx cxưx têx cêr nênhx vênhx huôv jông

          Chiê uô tâu iz traz kênhx trơưk li siêz nhiêv mak tsuv uô jông xêir tsov têx shôngz ntông chox lok uô. Ntông uô tâuz kênhx tsuv zos chor ntông chiêz mak uô tâu thiêx siz thiêz jông gâux. Ntông txiêr tâu lok mak muôz fuô uô yênhx đêiv ntêr muôx 4 đok, tuôz muôx iz đok ntâu, jiêz cov kruôr. Zôngv triêv max mav tưk cov jông li luz tâuz kênhx thiêz muôz fuô uô oz saz, lơưr co muôz zar đrav kaz khi khor uô cê thiêz tror max mav tưk, max mav joz cov yênhx ciêz luz tâuz kênhx.

           Thâuv yênhx luz tâuz kênhx lơưv mak zuôr tâu muôz đuô uô oz saz chiê tho kror hâur luz tâuz thiêz zar car tâuz kênhx. Thâuv ntêx tsôngv box tsuôk zôngv têk xuôk traz câuk chiê max mav câuk xưz, taz sik nhiv no mak zôngv mêir paz câuk lơưv viv li kror hâux lưv no cux tâu uô sêiz thiêz câuk tâu huv đros, jông gâux đuô. Thâuv câuk kror tas mak tror muôz oz saz tâuz kênhx co siz puô uô cê thiêz zôngv têx hluô car thênhx lok siktêx hluô tơưr khor uô câux jov cov oz saz tâuz kênhx co siz puôr uô cê tsik khênhr điv pa. Chor car kênhx mak zôngv têx shôngz kênhs chiê uô, zos tsik muôx shôngz kênhx mak zôngv chor shông yil uô car kênhx, muôx 6 tuk car. Thâuv chor car shông co tâu txiêr lok txos tsêr mak muôz hâu cov tsik tơưs, đhâu co muôz kra sâuv nthaz lok sik jiêz yar ntux cov kruôr mav li muôz lok njuôk uô car kênhx. Tix lâus Yênhx Xênhv Muôk, lênhx nênhs pâuz uô kênhx nhoz xar Xím Vàng, tỉnh Sơn La hêik pâuz: Lax uô yax thâuv uô kênhx zos ntâuk chor tôngx chiê uô blêiv kênhx, iz hnuz sir jos mak tsuôk ntâuk tâu oz đêiv tôngx xưz.

          Hmôngz muôx oz zav kênhx, iz zav zos kênhx las, iz zav zos kênhx sênh. Chor kênhx sênh mak tâu tsôngv box Hmôngz lênhk, Hmôngz siz, Hmôngz đuz yuôz ntâu đuô viv huv trâu lơưr têx suôz kênhx. Hok chor kênhx las mak tâu tsôngv box Hmôngz đơưz yuôz ntâu đuô. Taz sik, trơưk chor nênhs pâuz kênhx mak oz zav kênhx no puôr lênhx jông iz zav thiêz yuôz tâu chor jax kênhx hur si, tsuôk zos muôx iz, oz ntir mak siz txơưr mê njil.

             Kênhx zos zav chuôz zênhx muôx đros đrêiv tsôngv box Hmôngz luz nênhx.

            Kênhx tâu zôngv ntâu hâur tsôngv box Hmôngz têx cêr đaz cêr kruô thâuv muôx iz lênhx nênhs pur iz puô nênhk gâuv shông, tâu tas siv nênhx. Taz sik, kênhx cux tâu sir zôngv xưk li ntâu zav chuôz zênhx sênhr suôz txơưr li: trax blêiv, trax njiê, trax gâux nos lok zos gâux lâus ndak… chiê yuôz thâuv muôx nthuôr uô cêr lov jêv, têx hnuz tsiêz, chor hluôk tuz, hluôk nxêik yuôz hêik txos cêr gâux cêr đrâus… đuô li, trơưk cxênhx nênhs lâul hêik mak thâuv ntêx cux muôx suôz kênhx nox yôngz hâuk co, kênhx tok nhaz hur si, đros co hâur têx hnuz ntênhk, tsiêz, đrâuv zôngv chiê yuôz mak kênhx cux tâu zôngv chiê đhiê thiêz nthuôr uô cêr lov jêv trâu sơưr đơưk tâu sêiz. Zơưv Vax Txôngr Xênhv Muôk, nhoz jok Fênhx Hôx, xar Xím Vàng, tỉnh Sơn La puz pâuz.

           Cux li ntâu jêx jok tsôngv box Hmôngz txơưr đuô, xar Xím Vàng, tỉnh Sơn La nhiv no cux tsik yuôr chôngz nênhs pâuz uô têx kênhx lơưv. Chiê hâux lưv uô kênhx tsik trâus pôngz plox, đhâu tsaz yênhx “Ntênhk hôiv lok sêiz shuôk thax tsav poz jêz lâul cxôngx nzor xar Har Tsor, huyện Bắc Yên (kuz)” tâu tsưr tsix jiês xuz thơưx ciês thâuv hâur shôngk shông 2025, xar tưz hêik chor nênhs pâuz uô kênhx, yuôz kênhx tuôx trâu ntơưv tsênhv qơư xar chiê uô kênhx thiêz yuôx kênhx trâu tsôngv kruô nhoz đêz jê tâu sêiz mnôngs, nriêr pâuz. Tiv zix zos cxênhx hluôk, chor nênhs xar cơưv uô kênhx njiê pov, pâuz tâu chiê cơưv shâuv thiêz uô, paz tuôr tsês tâu zuk mênhx cxưx li kror hâux lưv uô kênhx no. Zơưv Đruôk Xênhv Hơưx, Phưv Chủ tịch Ủy ban xar Xím Vàng, tỉnh Sơn La puz pâuz.

          Tuôx trâu têx jêx jok tsôngv box Hmôngz hâur chêix ntux yiêz, suôz kênhx đros chor hluôk tuz hluôk nxêik tsôngv box Hmôngz chor tsôngk yo yiêz jông jav xưk li uô trâu thax tsav tox siêz, têx jêx jok tsôngv box Hmôngz hax zav jông jav đuô thiêz muôx tâu luz nênhx shir phaz đuô./.

Lik Thox cxiv sâu thiêz cxêik nhênhv