Shir phaz lul hâur têx tsêr yiêz chêix ntux yiêz nhoz Laox Cai

          Zơưv Khoa x Shôngx chuôz zis nhoz jos Sơn Lềnh, xã Văn Chấn, tỉnh Lào Cai, zos iz hâur têx chuôz zis pluôs, muôx luz nênhx txov nhêv thiêz hâur ntâu shông đhâu, zơưv Khoa chuôz zis uô nênhx nhoz têx tsêr kâus kiz jik.

        Shông 2025 đhâu, zơưv Khoa chuôz zis tâu têz qơưs muôz 60 triệu nhiêx đros trâu chuôz zis 30 triệu khưr tsês tâu hâur ntâu shông đhâu, chox lok cxiv uô tâu iz luz tsêr truôx khor nhoz. Cxuô lênhx hâur chuôz zis shir phaz lul: Zơưv Khoa hêik pâuz:  Hâur ntu đrav ntêx, chuôz zis uô nênhx txov nhêv njuôr, tsêr kâus kiz jik, thâuv ntux lok nas, cxuô qơư hâur tsêr ntuz njuôr. Nhiv no tâu Chính phủ, têz qơưs muôz nhiêx paz cxiv uô tâu tsêr truôx khor nhoz; cur chuôz zis shir phaz lul nox tsiêz”

        Đros nhoz uô cê jos Sơn Lềnh, Zơưv Gia x Shôngx, niêv thiêz txir tâu tas siv nênhx thâuv nzor, uô njuôs thâuv tsênhv zâu, thâuv hloz lox tiêr nênhx, zuôr pox niêv cxiv tsa chuôz zis, cux uô luz nênhx txov nhêv njuôr. Viv ar têz tsêz chos kôngz lôngk tsơưs, tsuôk chos mê njik poz cưk thiêz vơưs kok ntông, hâur yênhx shông, chuôz zis cux trâus njiz cêr yêiz. Thiêz luôs hâux lưv muk khưr uô jos cux tsik muôx txâuk nhiêx chox lok cxiv uô tsêr truôx nhoz. Thiêz hâur chêix ntux yar, ntux nas uô nênhx txov nhêv njuôr.

        Taz sik, hâur shông 2025, tâu Đảng, têz qơưs thiêz têx cưr tix nênhx tsa hâur jos moz siêz paz max txos, zơưv Gia x Shôngx chuôz zis tưz muôx tsêr truôx khor nhoz uô nênhx. "Nhiv no muôx tsêr nhoz lơưv, cur chuôz zis jông siêz cơưs. Muôx tsêr yiêz, cur chuôz zis zuôr sir jos khưr uô nox cov muôx luz nênhx tsâu sor”

          Trơưk li Tênhv x Shôngx, Bí thư Chi bộ jos Sơn Lềnh, xã Văn Chấn, tỉnh Lào Cai, hur si jos muôx 102 chuôz zis, phênhv ntâu zos pêz hêir nênhs Hmôngz.

          Hâur têx shông đhâu, txơưv tsôngv px sđ sir jos khưr huôv tsar uô nox, taz sik thax tsav qơư co tox nxaz, cưx ha toz, ar tsêz chos kôngz lôngk tsơưs, cêr muk lok phiv liv. Chênhr zos li hêik ntơư, xav txos trâu nhiv no, hur si jos tsênhv yuôr 34 hộ pluôs.

            Txơưv luz nênhx tsênhv yuôr ntâu txov nhêv, taz sik tsôngv px jos Sơn Lềnh cux muôx cêr côngv siêz jông, siz hluz, siz paz huôv tsar uô nênhx thiêz txos shông 2025 đhâu, Đảng, têz qơưs, cxuô tsưr tsix, têx lênhx nênhs siêz jông tưz siz chos côngv paz nhiêx cxiv uô tâu 17 luz tsêr truôx khor trâu px, iz thênhv jux juk muôx luz nênhx tsâu sor: “Chor chuôz zis tâu têz qơưs muôx nhiêx paz uô tsêr nhoz cux jông siêz cơưs thiêz tso siêz khưr uô nox cov iz thênhv jux juk muox luz nênhx tsâu sor”

           Shir phaz lul hâur têx tsêr yiêz-chêix ntux yiêz nhoz Laox Cai, cux chênhr zos qơư truôx khor cxơưz cxiz tâu tsôngv px khưr huôv tsar uô nox, iz thênhv jux juk hla đhâu yêiz pluôs muôx luz nênhx tsâu sor./.

                                            Tsu cxêik nhênhv-Thừa Xuân

Lênhx nênhs tsưx phưv truôx cêr sik thôngx siêz nhoz ntus đriv Sin Suối Hồ

             Tsênhv tsênhz cxiv tsa tuz lênhv, pêx xênhv sik thôngx siêz tso pov, thax tsav tưs chi bộ truôx, lênhx nênhs sơưr thơưx moz siêz txos pêx xênhv, uô hâux lưv viv pêx xênhv, mak thax tsav qơư co truôx, luz nênhx jux juk hlôngr yiêz, huôv tsar. Thax tsav jok Mấn 1, xã Sin Suối Hồ, tỉnh Lai Châu zos iz qơư li heik sâuv. Chiê jêx jok truôx tuk, huôv tsar li nhiv no, zos iz lênhx bí thư chi bộ, tsar jok, zơưv Lừu Văn Thân tưz sir jos lês uô jông têx hâux lưv zok muôz. Zơưv tsi heik ntâu, mak khênhr txix têx hâux lưv uô tsênhv tsênhz. Chiê têx chei tso tơưv huv đros, nghị quyết tso tơưv uô lơưr hâur luz nênhx, têx jiês xênhz huôx chi bộ, zơưv thâuv tưs tưz choz hâux lưv tsênhz mênhx trâu yênhx lênhx nênhs. Khov li co, têx jiês cơưv chi bộ jok tưz yênhx qơư seiz lax, đơưk têx phiv liv, cuz nxor, mnôngs pêx xênhv heik lơưr tsưr ziv, siêz xar. Đại úy Sì Mạnh Huân, Chính trị viên Phưv Zênhx Pênhz phax Sin Suối Hồ heik pâuz: “Hâur ntu đhâu, Lừu Văn Thân, Bí thư chi bộ, tsar jok Mấn 1 tưz bax tsưr ziv, lês uô jông têx luôs hâux lưv zok muôz. Zơưv tưz chox kriê chor nênhs uô hâux lưv tsưx phưv jêx jok, seiz car hâur thax tsav đros tsưx phưv truôx ntus điv têz qơưk. Zơưv Thân lok six moz siêz lês uô têx hâux lưv, lar heik zos hâur têx phôngz yaox tas nro tsôngv box sik đros tsưx phưv thax tsav qơư nhoz, ntus đriv têz qơưk”.

           Tsi tiêk tsưx phưv truôx thax tsav, Bí thư chi bộ, tsar jok Lừu Văn Thân tâu sơưr đơưk kruôs txos zos vênhv tôngv tsôngv pêx xênhv tso tsês têx cêr nênhx pôngz kaz. Zos iz jok tox siêz, tsôngv niêv txir cưr tix nênhx tsa sơưr đơưk tsi yuô tâu muôx txux chi tsưr ziv jênhv pâuz, chênhr viv li max mav heik, kriê chiê pêx xênhv pâuz tsênhz, pêx xênhv njênhs, pêx xênhv uô trơưk. Zơưv Lừu Văn Thân heik: “Tsôngv niêv txir lax pêx xênhv hâur jok tsi yuô tâu muôx txux chi tsưr ziv jênhv pâuz, chênhr zos li heik co, iz jiês cơưv chi bộ cur puôr lênhx fuô kriê chiê đảng viên thiêz pêx xênhv pâuz mênhx lok Đảng, têz qơưk têx tsưr ziv, tsênhv chei. Thâuv ntêx, iz cxiê heir nênhs uô ntâu chei đaz kruôs, muôx iz tus nênhs pôngz khênhr tsês ntêr hnuz. Pov uô li ntơư tsi huv đros, cur fuô kriê têx chỉ thị, nghị quyết. Txos nhiv no tsôngv pêx xênhv tưz pâuz tsênhz, cux jux juk txo grêk tsơưs têx cêr nênhx pôngz kaz lơưv”.

             Têx tsưr ziv, hâux lưv uô jông thiêz muôx liv ntơư tưz jux juk hlôngr yiêz sơưr đơưk tsưr ziv, siêz xar. Cêr nênhx pôngz kaz tâu tso tsês, luz nênhx vênhx huôv côngv thôngx ziv hnuz ziv hlôngr yiêz, jêx jok muôx nzir cêr thôngx siêz, truôx tuk. Lok sâuv huôv tsar kinh tế, zơưv Thân thâuv tưs tưz uô ntêx nyuôs vênhv tôngv pêx xênhv hlôngz pâur zuz nôngz tsoz chos, tsiêx tu zus, uô lơưr têx tsưr ziv yiêz hâur huôv tsar uô nox uô hâuk. Khov li co, ntâu chuôz zis tưz hla đhâu yeiz pluôs. “Zơưv Lừu Văn Thân uô ntêx nyuôs hâur cxuô luôs hâux lưv, xar tơưv têx tsưr ziv jông, vênhv tôngv pêx xênhv huôv tsar kinh tế chuôz zis li: Chos kok tsư ha, chos tsơưz, tu zus tsiêx cxu. Tsôngv niêv txir lax pêx xênhv njênhs njôngr trâu bí thư chi bộ. Ntâu shông zơưv puôr lênhx uô tiêr tâu jông têx hâux lưv zok muôz”.

           Khov muôx têx lênhx nênhs moz siêz lês uô jông hâux lưv viv pêx xênhv li zơưv Lừu Văn Thân, jok Mấn 1 nhiv no tưz hlôngr yiêz lok six ntâu. Tas nro jok muôx 110 chuôz zis pêx xênhv, tsuôk yuôr 16 chuôz zis pluôs; 95% chuôz zis tâu côngk nhav chuôz zis vênhx huôv niêx shông. Tsi tiêk tâu tsôngv pêx xênhv seiz hloz, njênhs njôngr thiêz tâu cấp ủy, hâu nov xã, huyện kuz muôz ntâu ntơưr kruôs; nhiv kruôr đhâu, zơưv Lừu Văn Thân tsênhv hmôngr jông tâu côngk nhav zos lênhx Bí thư chi bộ jok ntus đriv uô tâu hâux lưv jông hâur tỉnh Lai Châu shông 2025, zos Tỉnh ủy Lai Châu kruôs txos./.

Khắc Kiên-Riê Lâux cxeik, nhênhv