Viv chor tsêr sor siêz truôx đrênhk trâu pêx xênhv nhoz tox siêz Trạm Tấu

Pos Sá Xênhv Hav, muôx 97 shông, nhoz jok Mù Thấp, xar Bản Mù, huyện Trạm Tấu, zos chuôz zis pluôs nhoz iz lênhs. Tiv hnuz nhôngs siêz, tsik muôx jos ho nhoz iz lênhs, viv li ntâu shông đhâu pos Sá tsuv nhoz hâur luz tsêr tưz kuz đaz tuôs tas. Pâuz tiêk tsik ngaz tuk txos thâuv muôx nas chuô lok, taz sik pos cux tsik pâuz uô li chak tsuôk pâuz khov trâu ntux paz xưz. Shông 2025, thâuv muôx đề anr kho đuô chor tsêr đaz tuôs lav nhoz tâu kriz uô ntơưv thax tsav qơư, pos Sá luz tsêr tưz tâu muôz nhiêx paz chiê cxuv uô đuô. Đros Têz qơưk li têx nhiêx paz, chinhr quyền xar hêik chor tsưr tsix, đoanx thêv, pox nhuôs hâur jok đros paz uô, txix thâuv piz uô txos trâu thâuv uô tiêr thiêz choz zok tsêr. Pos Sá hêik: “Cur nhoz iz lênhs xưz, tsik muôx mê nhuôv viv li uô tsik tâu tsêr nhoz. Nhiv no tâu pox nhuôs thiêz chinhr quyền cxuô cấp paz uô tâu iz luz tsêr lox, khor jông chiê nhoz, cur shir phaz thiêz uô tsâus ntâu hênhr”.

Tix lâus Zax Xênhv Shôngx ziv chuôz zis, zos iz hâur chor chuôz zis pluôs nhoz jok Cống Dua, xar Túc Đán, huyện Trạm Tấu, tỉnh Yên Bái, cêr muk txos ntơưv kror qơư uô tsêr lok six đaz tuôs. Viv li, tas nro cxuô zav chiê uô tsêr li shôngz ntông, suôz jêz, xi măng, vuôk vor tsêr… puôr lênhx zos zôngv lênhx nênhs đas jos chiê êr, cưr lok trâu ntơưv kror qơư uô tsêr xưz. Khov muôx chor tsưr tsix đoanx thêv đros paz, tix lâus Zax chuôz zis tưz bax tâu txâuk têx chuôz lov chiê cxiv uô tsêr: “Cur lok uô tsâus têz qơưk tưz paz uô tsêr trâu cur chuôz zis, uô tsâus chor canr bôv, sơưr đơưk tưz đros xa têx suôz jêz, xi măng tuôx trâu ntơưv jok thiêz paz cxiv uô tsêr. Cur uô chor canr bôv thiêz sơưr đơưk tsâus ntâu hênhr”.

Uô lơưr Tỉnh ủy thiêz Ủy ban tỉnh Yên Bái li chox kriê, huyện Trạm Tấu tưz sir jos kriz uô tsaz yênhx kho đuô chor tsêr đaz tuôs lav nhoz. Chor phòng, ban, đoanx thêv thiêz chinhr quyền ntơưv qơư sêi đrơưv kriz uô. Têx hâux lưv mak tưz tsik zos cxiv tsa xưz, tsênhv piz txix ntu qênhz shuôk cov paz huv zos lênhx nênhs, muôz chor pênhr nhiêx cov siz bâus thiêz huiz tôngv pêx xênhv nhoz ntơưv qơư sir jos đros uô.

Hâur shông no huyện Trạm Tấu sir jos cov kho đuô tâu 253 luz tsêr đaz tuôs lav nhoz. Đros thax tsav trâus cêv kuôk ntâu, chiê muk txos trâu ntâu luz xar mak tsuv muk đhâu huyện Văn Chấn lok sik thị xar Nghĩa Lộ, hâux lưv kriz uô njiz lok six ntâu phiv liv. Chiê uô tâu trơưk tsưr ziv, huyện tưz yênhx lix chor tôv côngz xưv kho đuô chor tsêr đaz tuôs lav nhoz, choz trâu nênhs sơưr thơưx chor cơ quan, taz viv uô Tôv tsar. Đrâuv chox kriê, chor tôv no tsênhv sik côngv đros chor xar huiz tôngv lưx lươngv muk paz uô chor tsêr lơưr tsưr ziv huv đros trâu tsênhv tsênhz ntơưv yênhx ziv chuôz zis. Yênhx hnuz, chor tsưr tsix muôx vax huôv hêik pâuz hâux lưv kriz uô, têx phiv liv njiz trâus trâu hâu nov huyện thiêz Ban Thường vụ Huyện ủy pâuz chiê muôx tsưr ziv đơưk kho. Zơưv Vưx Xênhv Zax, Bí thư Huyện ủy Trạm Tấu, tỉnh Yên Bái puz pâuz: “Chiê paz trâu chor xar, huyện tưz tso tơưv oz jiês sik tưr: jiês xuz thơưx zos sik tưr kriz uô nzor, jiês tiv 2 zos sik tưr uô cov tiêr nzor. Đhâu jiês 1, pêz tưz tsưr tsix khơưk kruôk trâu 8 hâur 12 xar, thị trấn. Thâuv tsưr tsix khơưk kruôk ntơưv jiês cơưv chor canr bôv chênhr thiêz tso tơưv jiês sik tưr tiv oz, chor xar puôr lênhx shir phaz đros cơưv hur si”.

Đros têx tsưr ziv uô txơưx xar tơưv, huv đros tsênhv tsênhz ntơưv huyện tox siêz, xav txos hnuz 15/4, 100% chor tsêr đaz tuôs, lav nhoz tsuv tâu cxiv uô, kho đuô hâur shông no ntơưv huyện Trạm Tấu tưz tâu kriz uô. Hâur co, 127 luz tsêr tưz uô tiêr thiêz choz zok trâu pêx xênhv lok nhoz. Chor tsênhv yuôr, huyện Trạm Tấu zuôr sir jos uô cov tiêr uô ntêx hnuz 30/5 zuôr txos./.                                 

Thịnh Xuân-Lik Thox cxêik nhênhv