Pêx xênhv Sơn La gra siêz tsơưr lươngv kôngz nuv txix qơư chos

Têx hnuz no, tix lâus Nguyễn Minh Hiếu ziv chuôz zis nhoz xar Mường Sang, huyện Mộc Châu, tỉnh Sơn La tsênhv taz tov lêix, ndơưk ar piz chos tsoz chos txir jâuz caz tây.

Tix lâus Hiếu hêik, shông 2020, chuôz zis tưz yưv pênhr muôx 2 tiv đêiv chiê chos tsoz chos jâuz caz tây txuôk đros qơư ndis uô si, sêiz shuôk têz qơưs. Khov uô lơưr tsưr ziv hữu cơ, huv đros thax tsav qơư co tưz paz trâu tsoz chos jâuz caz tây huôv tsar jông, txir lox jông gâux, kaz jiz, tâu chôngz nênhs nhiêv zuôr. Grê muôs txix 150 cxênhz đêiv txos 300 cxênhz đêiv iz cir, xav iz chiv, vax tsoz chos jâuz caz tây no paz trâu chuôz zis sâu tâu xar muôx 4 tiv đêiv. Chêix chiv shông no, chuôz zis tsik kriz đar nzir thax tsav chos jâuz caz tây, tsêx trung  huôv tsar uô cov gra siêz tsơưr lươngv hax huv txix uô đuô tsơưr lươngv têx ar têz chos, đêx zưs; kriz uô truôx jông têx tsưr ziv lok uô kôngz nuv ngaz tuk: “Vax jâuz caz tây muôx têx kror txơưr đuô têx vax txơưr, zos tsik chos lơưr tsưr ziv chos cxôngx nzor, mak zos chos lơưr Organic, zos huv zos lơưr hữu cơ sâuv ntiêx têz; phênhv ntâu zos chiê chuôz ndê tsơưr lươngv tsoz chos thiêz uô lơưr hax huv hur chiê muôx tâu têx hax huv jông tiv zix, zos tsôngv kruô tâu nox mak zuôr ndo njôngr txos têx hax huv kaz jông muôx nhoz qơư ndis uô si Mộc Châu”.

Tsik so hlôngr yiêz tsưr ziv uô nox, txix xêir tsov zuz nôngz, hlôngr yiêz tsưr ziv uô huv đros thax tsav qơư, txos trâu kriz uô lơưr tsưr ziv uô hur, ngaz tuk lơưr VietGAP, GlobalGAP… chor ziv chuôz zis, hợp tác xã nhoz Sơn La chuôz cxaz sir zôngv khoa học công nghệ huôv tsar uô nox, paz muôx tâu hax huv hur, ngaz tuk, tax tâu trơưk chor nênhs sir zôngv hâur têz qơưk thiêz đrâuv têz qơưk siêz nhiêv.

Zơưv Hà Văn Sơn, Giám đốc hợp tác xã Kôngz nuv ngaz tuk Chiềng Hặc, huyện Yên Châu, tỉnh Sơn La puz pâuz, hợp tác xã nhiv no muôx zuôr xar 15 héc ta txir mo môngk uô lơưr VietGAP thiêz cungz mã sôr thax tsav chos chiê muôs tơưv saz đrâuv têz qơưk; đuô li tsênhv côngv đros 30 ziv chuôz zis chos txir mo môngk thax tsav đar muôx 25 héc ta. Hợp tác xã têx hax huv txir ntông tưz tâu muôs tơưv trâu saz đrâuv têz qơưk zos muôx chor nênhs uô co tưz sir jos hlôngr yiêz hâur tsiv uô: “Chiê uô cov tâu jông chor txir ntông jông huv đros muôs tơưv saz đrâuv têz qơưk, hợp tác xã tưz tso tơưv luôs hâux lưv uô txix ciês thâuv hâur shôngk shông zuôr uô lơưr têx tsưr ziv lơưr VietGAP thiêz muôz mã sôr thax tsav chos chiê muôs tơưv saz đrâuv têz qơưk; gra siêz tsơưr lươngv têx hax huv zos hợp tác xã li tsưr ziv uô chiê muôs tơưv saz đrâuv têz qơưk”.

Shông 2024, tas nro tỉnh Sơn La têx hax huv kôngz nuv njuôk xav sâu tâu xar muôx 2,5 triệu tấn, hâur co chor hax huv txir ntông njuôk xav sâu tâu xar muôx 400.000 tấn. Hur si tỉnh tror sir jos huôv tsar uô cov muôx txâuk cxuô zav txir ntông muôs trâu têx tsêr mêir lox li: Doveco Sơn La, ICFood Vân Hồ, NaFoods Tây Bắc…

Trơưk li zơưv Nguyễn Thành Công, Phưv Chủ tịch Ủy ban tỉnh Sơn La, thax tsav qơư tsênhv tror zir jos chox kriê, paz trâu chor ziv chuôz zis, doanh nghiệp, hợp tác xã sir zôngv têx tsưr ziv kỹ thuật yiêz, côngz nghệ jông lok uô chiê paz gra siêz tsơưr lươngv têx hax huv kôngz nuv. Đros co, tsuv uô truôx jông  hâux lưv qênhz yuôx tsơưr lươngv hax huv, txix chos, sâu đê txos tsês chiê, kriz uô, tsik chiê têx qơưk chos uô phiv liv txos tsơưr lươngv têx hax huv: “Sơn La zuôr sir jos uô kôngz nuv hữu cơ, paz muôx tâu têx hax huv jông tiv zix chiê nênhs sir zôngv xêir tsov zuôr Sơn La têx hax huv. Chiê uô cov tâu li hêik co, tsuv uô cov tsơưr lươngv jông, viv lênhx nênhs sir zôngv zuôr ntâu, têx qơư muôs thiêx muôs tâu, zos chor nênhs sir zôngv tsik zuôr, cux muôs tsik tâu trâu lênhx tưs”.

Kôngz nuv Sơn La tưz khav tênhv tâu côngz bê, kriz đar qơư muôs; chor ziv chuôz zis, doanh nghiệp, hợp tác xã tưz sir jos uô jông lok tsơưr lươngv hax huv thiêz piêr pâuz lok têx hax huv jông. Co zos iz hâur têx kror zov chênhr, paz trâu kôngz nuv Sơn La tror tâu muôs trâu ntâu luz têz qơưk, thax tsav, paz trâu pêx xênhv huôv tsar uô bluôx nux ciês sâuv zuk thax tsav qơư nhoz./.

Trấn Long-Lik Thox cxêik nhênhv

Zak zưr vuôz tsuôz uô ruôr hiêv li chas txos lênhx nênhs luz nênhx xênhz huôx

Zak zưr uô vuôz tsuôz zos tênhx qơư trâul ruôr hiêv viv têx xiv huv, têik hưx zak zưr lưx tsi tâuk hâur tênhx qơư. Hâur co, ntâu đuô hur si têx hưx zak zưr, hnaz tax, têik zak zưr. Têx xiv huv tsiv uô txix zak zưr đhâu sir zôngv muôz por tsês ntơưv têx, hlôngr viv tâu sâu, khơưk tsês trâu hâur têx thôngz trâu zak zưr thiêz chox muk hlơưr, jov uô lưv zav lơưr cui tinhv zuôr ntâu jux juk ntơưv têx, uô vuôz tsuôz, kiêk nênhs tênhx qơư, chiv xênhz đrox tsuôs. Têx li heik co zuôr uô tsi jông, ruôr hiêv txos tênhx qơư, lênhx nênhs đas jos. Zak zưr vuôz tsuôz, kiêk nênhs uô tsi jông li chas txos lênhx nênhs đas jos, tênhx qơư nox nhoz?

Uô ruôr hiêv txos lênhx nênhs đas jos: Têx pluô plar zak zưr pâus cxuô zav nox, đêx hâuk: Têx li heik sâuv muôx têx pâus zav nox thôngz đhâu shuôz njêl nox tâu, cux li đêx hâuk. Nhênhz chơưv tso pov, têx pluô plar co muôx têx uô ruôr hiêv txos lênhx nênhs đas jos thâuv muôx ntâu jux juk nhoz hâur đros chêr. Têx tsi jông heik sâuv zuôr ruôr hiêv txos lênhx nênhs cêr hloz lox thiêz uô muôx têx moz gênhk li: Moz trưx phax, moz lênhs plơưr, muôx tsi tâuk mê nhuôv.

Uô ruôr hiêv txos tênhx qơư nox nhoz: Tênhx qơư trâul vuôz tsuôz, kiêk nênhs thâuv hlơưr têx zak zưr uô tsư nxiêz, tsư kiêk hâur thax tsav qơư nox nhoz thiêz uô ruôr hiêv txos cêr uô pa, côngv thôngx đas jos. Tsi tas li, zak zưr tsênhv uô vuôz tsuôz, kiêk nênhs hâur đêx, uô têx đêx hâuk kiêk nênhs, đêx phưx vưv uô kôngz tsi hur, uô tuôr xuôv tas ntâu Chính phủ têx nhiêx txiêx lês uô têx hâux lưv xưv lik vuôz tsuôz, kiêk nênhs; uô ruôr hiêv, tsi jông txos ju lix viv têx ntus đêx hiêr thiêz qơư ju lix muôx ntâu zak zưr, khâuz nhaz uô vuôz tsuôz, kiêk nênhs, kruô tsi xar muk lol ndis seiz têx qơư uô si, uô tsi jông txos ngênhx ju lix thiêz kinh tế ntơưv qơư.

Uô ruôr hiêv, tsi hur txos zav nox thiêz kôngz nuv: Đêx ar trâul vuôz tsuôz, kiêk nênhs uô trâu têx tsoz chos, kôngz lôngk hloz lox tsi tâuk. Zak zưr uô kiêk nênhs, vuôz tsuôz têx đêx , tsi jông txos tsoz chos, xiv huv kôngz nuv.

Uô ruôr hiêv txos côngv thôngx thiêz xã hội: Khâuz nhaz, zak zưr uô tsi hur tênhx qơư, ruôr hiêv txos sơưr đơưk đas jos, luz nênhx xênhz huôx, nox nhoz muk lol. Uô phiv liv txos ngênhx y tế.

Uô ruôr hiêv ntêr txos tênhx qơư thiêz lênhx nênhs: Muôx ntâu êx zak zưr vuôz tsuôz, kiêk nênhs zuôr uô tsi jông txos qơư nox nhoz, ntux txơưr txar, uô tsik jông txos tsôngv px sđ cêr khưr huôv tsar uô nox. Uô ruôr hiêv txos têx shôngz ntông, đêx, ar, đrox tsuôs....

Têx li heik sâuv tso pov, sơưr đơưk tsuv sik đros seiz car chiê txo grêk tsơưs têx zak zưr vuôz tsuôz, kiêk nênhs, tsưx phưv tênhx qơư hur jông, lênhx nênhs tsi trâul muôx moz gênhk.

Pêz sơưr đơưk tsuv đros hâu nov ntơưv qơư, cxuô cấp, ngênhx hâur thax tsav phax tar tsi chiê zak zưr vuôz tsuôz, kiêk nênhs tênhx qơư, tsưx phưv truôx tuk sđ li đas jos./.

Bích Thủy-Riê  Lâux cxeik, nhênhv