Qơư khov truôx trâu chor nênhs đhâu nhoz cêr cxâuv tror lok

Nhoz cêr cxâuv 15 shông 10 luz hlik, zơưv Cà Văn Hoàng, nhoz xã Chiềng Ơn, huyện Quỳnh Nhai, tỉnh Sơn La tưz txax muôs, tsi xar nhoz đros luôs lưv tus thiêz cxơưx thâuv tror lok tsêr. Têx tsưr ziv, siêz xar co iz hnuz plox jux juk thâuv zơưv tâu côngv thôngx, têx cưr tix nênhx tsa moz siêz txos, hluz thiêz paz max:“Thâuv ntêx cur tưz muôx jiês trâul cxâuv, muk nhoz tsêr tux, tâu têz qơưk paz, moz siêz txos cur tâu tror lok tsêr, đros chuôz zis khưr huôv tsar uô nox uô hâuk. Thâuv muk nhoz cêr cxâuv tror lok, têx cưr tix nênhx sơưr đơưk hâur jok cux tôngv zênhx, chuôz zis, ntơưv qơư thiêz công an paz max, cur tưz sir jos huôv tsar uô nox thiêz tror lok đros sơưr đơưk siz tưr uô nox uô hnar. Txix no tror zar muk, cur zuôr sir jos uô luz nênhx jông, tsiv txiêx”.

Têx lênhx nênhs tưz muôx jiês trâul cxâuv li heik sâuv tsưr ziv tưz uô tâu trơưk siêz xar, khov muôx hâu nov ntơưv qơư, cxuô cấp, cxuô ngênhx paz txix têx nuv uô tsênhv tsênhz. Qir uô đuô luz nênhx txix tsi muôx iz zav đaz tsi hlo, tix lâus Lò Văn Quỳnh, nhoz jok Đồng Tâm, xã Chiềng Ơn, huyện Quỳnh Nhai nhiv no tưz tso siêz viv muôx tsưr ziv huôv tsar uô nox chiê hla đhâu cêr txov:“Thâuv ntêx cur muk nhoz cêr cxâuv, tror lok tsêr đros luôs lưv tus huôv tsar uô nox uô hâuk, cur tâu chor canr bôv huyện, xã paz max, lơưr tuôx ciês ntơưv tsêr paz cur, muôz iz gơưv nôngz yis puz chiê tu zus huôv tsar kinh tế, luz nênhx truôx tuk. Cur uô tsâus lok six ntâu, zuôr sir jos tu zus cov jông chiê yis hloz lox, vav ntâu jux juk tuôx, tso tsês tsi đros luôs lưv tus uô têx cêr cxâuv li uz li no”.

Xã Chiềng Ơn zos thax tsav qơư tâu xeir tsov uô siv huyện Quỳnh Nhai, tỉnh Sơn La trâur nuv “Truôx tuk tsôngv pêx xênhv, paz têx lênhx tưz muôx jiês trâul nhoz cêr cxâuv tror lok đros côngv thôngx sơưr đơưk nhoz uô nênhx, sik tưr huôv tsar uô nox uô hâuk” txix hli 5/2023. Đhâu thâuv mnôngs chor nênhs trâul nhoz cêr cxâuv li heik sâuv tror lol hâur thax tsav xã têx tsưr ziv, siêz xar Ủy ban huyện Quỳnh Nhai thiêz Ủy ban xã Chiềng Ơn li tổ côngz xưv tưz piêr kriê, heik têx lênhx nênhs co đas cir cơưv têx lớp kriê txux chi tsưr ziv huôv tsar uô nox, tu zus tsiêx cxu thiêz vênhv tônhv chor nênhs siêz jông muôz puz iz lênhs iz gơưv nôngz yis chiê huôv tsar kinh tế. Zơưv Lò Văn Thiên, Chủ tịch Ủy ban xã Chiềng Ơn, huyện Quỳnh Nhai, Sơn La heik pâuz:“Xã muôx 03 lênhx nênhs muk nhoz cêr cxâuv tas tror lok tsêr. Nhiv no, đhâu thâuv choz nôngz yis tas trâu lơưr, têx yis tưz tâu tu zus, hloz lox jông. Xã cux tsi so tso canr bôv muk seiz, qênhz shuôs têx tsiêx. Nhiv no têx lênhx pêx xênhv co tưz lok đros côngv thôngx sik tưr huôv tsar uô nox thiêz tưz tâu tsôngv cưr tix nênhx tsa sơưr đơưk hâur jok moz siêz, cxơưz paz”.

Txơưv tsênhv njiz trâul têx phiv liv, cêr txov li: Lênhx nênhs tâu zoz zux, paz max ntơư xuz thơưx tsi tâu muôx tsưr ziv huôv tsar uô nox, thax tsav Quỳnh Nhai tsi muôx ntâu doanh nghiệp, tsưr tsix yưv pênhr chiê muôz hâux lưv uô trâu têx lênhx nênhs co đhâu thâuv lơưr tror lok tsêr.... Taz sik đros thiêz sơưr đơưk têx cêr siz hluz siz paz, sik đros huôv tsar chiê muôx luz nênhx vav mênhx, tsâu sor, Quỳnh Nhai heik taz, tỉnh Sơn La heik cxuô zuôr lênhk txeik tâu nzir têx pênhr jos cxơưz paz trâu chor nênhs heik sâuv chiê lơưr truôx siêz đros côngv thôngx siz tưr khưr uô nox uô hnar, yênhx lênhx nênhs muôx liv trâu xã hội./.

                                                  Lê Hạnh-Riê Lâux cxeik, nhênhv

Têx lênhx cưk kriê sir jos uô luôs hâux lưv kriê ntơưr trâu tsôngv box hâur têx jêx jok

7 six 30 phênhz tsâuk ntux , tix lâus Đào Văn Giang, nhoz jok 6, xã Quảng Tâm, huyện ntus đriv Tuy Đức, tỉnh Đắk Nông, zênhx max tuôx muk đros sơưr đơưk cơưv ntơưr. Zos lênhx uô thơưx seiz car iz hâur 2 lớp cơưv hâur pâuk ntơưr ntơưv tsêr cơưv cxênhx iz thiêz cxênhx 2 Nguyễn Du, xã Quảng Tâm, txơưv tsi khôngv thiêz max bâuv tưs, tix lâus thâuv tưs cux sir jos tuôx cơưv cxix cxuô trơưk six hơưv, cui tinhv. Lớp cơưv muôx 30 ntâu lênhx nênhs, xav kror đruôz đraz hnuz nhôngs txix 40-50 shông, têx lênhx hnuz nhôngs siêz yax tưz muôx 71 shông, puôr lênhx zos tsôngv box nhoz têx jok hâur xã. Nhiv no tsênhv zos cheix max uô, sâu têx kôngz taz sik phênhv ntâu sơưr đơưk puôr lênhx sir jos tuôx cơưv cxix cxuô. Tsưr ziv, siêz xar njôngr cov đros luôs lưv tus pâuz ntơưr thiêz chor cưk kriê têx sir jos tưz uô têx lênhx cơưv hâur pâuk ntơưr muôx hnuz nhôngs li tix lâus Giang ziv moz siêz, sir jos tuôx cơưv đuô:“Thâuv ntêx zuk nhoz tox siêz đêz đrôngs, tsi tâu muk cơưv ntơưr. Nhiv no têz qơưk krêz lớp kriê hâur pâuk ntơưr, pêz zuôr sir jos muk cơưv. Chor cưk kriê lơưr siêz lok six jông, pêz tâu cơưv cux tsi pâuz heik li chas, uô tsâus lok six ntâu têx lênhx cưk kriê xưz”.

Tưz 40 ntâu shông thiêx pâuz nhênhv, pâuz sâu uô niêv lâul Thị Nương, heir nênhs M’Nông, nhoz jok Bu Nơr, xã Quảng Tâm lok sir jông siêz: Niêv lâul Nương heik, pâuz ntơưr lơưv muôx liv thiêz paz tâu lok six ntâu hâur luz nênhx, xuz thơưx zos niêv lâul zuôr muk cơưv thik ntơưr tsar yêz chiê cheix yêz muk lol tâus cêr thiêx zôngx ziv. Pâuz ntơưr cux paz niêv lâul xar txos tsưr ziv, hâur ntu zuôr txos zuôr đas cir zuôr muôs chuôz zis têx nôngz txir mắc ca đhâu sâuv mạng xã hội đros luôs lưv tus trâu luôs 2 chas thax tsav, têx ciêz đrôngs:“Tâu muk cơưv ntơưr li no cur lok six shir phaz thiêz jông siêz. Cur cux tsênhv sir jos cơưv cov tâu jông, chiê pâuz nhênhv, pâuz sâu”.

Cưk kriê Hoàng Văn Trường, uô hâux lưv hâur tsêr cơưv cxênhx iz thiêz cxênhx 2 Nguyễn Du, xã tox siêz Quảng Tâm tưz uô hâux lưv kriê ntơưr trâu cxênhx iz hâur huyện ntus đriv tox siêz Tuy Đức txix têx shông 1990 lok. Lơưr cưk kriê Trường, thâuv ntêx, viv tsênhv yuôr ntâu txov nhêv, phiv liv muk lol, ntâu lênhx nênhs nhoz tox siêz  đêz đrôngs tsi tâu muk cơưv ntâuz ntơưr li luôs lưv tus, thiêx tsi pâuz ntơưr. Taz sik têx shông jê lok no, luz nênhx phênhv ntâu tưz truôx tuk, xã hội ziv hnuz ziv huôv tsar, vav mênhx, ntâu lênhx nênhs xar cov đros luôs pâuz ntâuz pâuz ntơưr. Cux chênhr zos li heik co, thâuv tsêr cơưv, chor cưk kriê ntơưr tuôx hâur jok vênhv tôngv, heik sơưr đơưk cơưv hâur pâuk ntơưr, chôngz lênhx tưz siz zâuv đas cir muk cơưv. Cưk kriê Trường heik pâuz:“Xuz thơưx zos tsuv pâuz tâu chor nênhs cơưv lớp hâur pâuk ntơưr co têx tsưr ziv, siêz xar, iz chas cơưv ntơưr, lơưr tsênhv muk uô hâux lưv uz no thiêz. Txix têx pâuz tâu, lơưr zuôr kênhz đuô, têk tơưk cxar đuô pir li têx nhuôs zâu, chor cưk kriê tưz tsuv sir jos, moz siêz kriê iz kro jux juk chiê sơưr đơưk pâuz nhênhv, pâuz sâu”.

Cưk kriê Nguyễn Thị Phượng, uô hâux lưv hâur tsêr cơưv cxênhx iz thiêz cxênhx 2 Nguyễn Du heik, nưk tsêr cux nhoz hâur jok, muôx six hơưv, hnuz nhôngs siz njiz, sik thav, pâuz tâu lok tsôngv box luz nênhx niêx hnuz. Têx hâux lưv uô co lok six zôngx ziv chiê cưk kriê Phượng vênhv tôngv tsôngv box, lar heik zos têx lênhx pox niêv muk cơưv. Lớp cơưv hâur pâuk ntơưr cưk kriê Phượng tsênhv taz tov kriê nhiv no phênhv ntâu zos chor pox niêv, vir ndâuk. Têx thâuv shênhx, hnuz so kaz ciêz, chor pox niêv vir ndâuk sơưr đơưk cux muôx têx tuôx tâu ntơưv cưk kriê Phượng tsêr chiê cơưv nzir. Thiêz thâuv seiz pov têx lênhx nênhs lâul hnuz nhôngs txix 40, 50 shông co lơưr pâuz nhênhv, pâuz sâu, pâuz sir zôngv xor tôngx sâu ntơưr xa trâu luôs lưv tus, pâuz krêz seiz têx mông jông, muôx liv, uô lơưr hâur luz nênhx niêx hnuz, têx lênhx uô hâux lưv kriê txux chi li cưk kriê Phượng lok six shir phaz:“Kriê txux chi trâu tsôngv box sơưr đơưk hâur jok, paz têx lênhx tsi pâuz ntơưr muôx txux chi, tsưr ziv huôv tsar uô nox, thâuv kriê tâu trâu sơưr đơưk pâuz ntâuz ntơưr lơưv, cur lok six jông siêz. Co cux zos iz kro cxơưz paz chiê pêz sir jos uô jông luôs hâux lưv kriê txux chi”.

Đruôz hnuz mak muk uô hâux lưv kriê txux chi trâu têx nhuôs shux xênhz; hmo ntux ho muk yênhx ntuk cêr đêz chiê kriê hâur pâuk ntơưr trâu tsôngv box têx jêx jok, taz sik chor cưk kriê ntơưr nhoz thax tsav tox siêz đêz đrôngs tỉnh Đắk Nông cux shir phaz lus, sir jos uô jông hâux lưv zok muôz. Têx lênhx cưk kriê ntơưr tsênhv niêx hnuz sir jos uô luôs hâux lưv kriê txux chi trâu sơưr đơưk hâur cxuô jêx jok, paz tsôngv box đros luôs lưv tus pâuz ntâuz ntơưr, muôx tsưr ziv huôv tsar uô nox uô hnar, cxơưz gra luz nênhx huôv tsar, vav mênhx, lơưr chuôs luôs 2 chas thax tsav./.

                                                               VOVTN-Riê Lâux cxeik, nhênhv