Uô truôx jông hâux lưv xêir têx lênhx canr bôv hluôk heir nênhs tsơưs nhoz tox siêz Trạm Tấu uô hâux lưv trâu têx cơ quan hâur thax tsav

Đhâu thâuv uô tâu tiêr hâux lưv zok muôz zos lênhx Bí thư huyện đoanx, lok hli 5 shông 2023, tix lâus Ntax Xênhv Zax tâu Ban thường vụ Huyện ủy Trạm Tấu tso lok nhoz hâur BCH Đảng bộ xã Hát Lừu thiêz tâu bâux xeir uô Bí thư Đảng bộ xã, six cxiv 2020-2025.

Zos lênhx canr bôv hluôk nênhs Hmôngz tâu tso muk uô hâux lưv hâur iz xã muôx zuôr xar 100% zos tsôngv box Poz Ziz, chênhr viv li, hâur lês uô cxuô luôs hâux lưv, tix lâus Ntax Xênhv Zax thâuv tưs tưz moz siêz, lês uô jông hâux lưv zok muôz, seiz lok têx tsênhv tsênhz, zuôr canr bôv, đảng viên thiêz pêx xênhv cêr jông siêz, thôngx ziv uô qơư khov chiê fuô uô Đảng, têz qơưk têx chei huv đros luz nênhx. Tix lâus Ntax Xênhv Zax cux tsi so tsês six hơưv, hnuz nhôngs muk yênhx jêx jok chiê mnôngs pêx xênhv heik têx tsưr ziv, siêz xar txix ntơư zênhx max đros đơưk têx phiv liv, uô tsi tâu tsi tiêr; muôz cêr njênhs njôngr, chiê siêz, cxiz tsôngv lax pêx xênhv sir jos huôv tsar kinh tế, gra siêz phênhv sâu tâu, cxơưz luz nênhx hlôngr yiêz, hla đhâu cêr pluôs truôx. Pos Hoàng Thị Pọm, nhoz jok Hát 1, xã Hát Lừu, huyện Trạm Tấu heik: “Cur pov canr bôv Ntax lok six siêz jông, zos lênhx nênhss sir jos lês uô jông hâux lưv viv pêx xênhv, thâuv tưs tưz zok nriêr cxuô faz tsưr ziv chiê paz tsôngv niêv txir lax pêx xênhv; tsôngv box lênhx tưs cux nhiêv thiêz kruôs nxiês canr bôv Ntax”.

Zos lênhx canr bôv hluôk, hloz lox yênhx nênhs txix ntơưv qơư, tix lâus Sáy Xênhv Zax, Chủ tịch Ủy ban xã Xà Hồ pâuz tsênhz txos tsôngv box luz nênhx xênhz huôx, nox nhoz cux li kinh tế, xã hội hâur thax tsav. Tix lâus tưz sir jos đros cxuô ngênhx muôx vax huôv fuô uô ntâu dưv anr, lar heik zos têx dưv anr lok sâuv huôv tsar cêr uô nox, tu zus tsiêx cxu, uô trơưk tsưr ziv yiêz chiê têx kôngz uz no muôs tâu gri..... Hâur co tsuv heik txos huôv tsar chos têx kok tsư ha, tsêz chos chor nôngz blêx jông, muôx grik kinh tế siêz. Tix lâus Sáy Xênhv Zax heik: “Yax kriê trâu pêx xênhv, xar cov pêx xênhv pâuz, pêx xênhv mnôngs thiêz uô trơưk mak xuz thơưx canr bôv tsuv zos nênhs jông, tsiv txiêx, uô ntêx nyuôs hâur cxuô luôs hâux lưv, uô jông lơưr Đảng, têz qơưk chei fuô kriê”.

Iz hâur têx lênhx canr bôv hluôk, lês uô tâu jông cxuô cêr nuv nhoz huyện Trạm Tấu ntơư, tsuv heik txos niêv lâul Lử Xênhv Shôngx, Chủ tịch Hội liên hiệp pox niêv xã Bản Công-Lênhx tsi so muk yênhx jêx jok chiê hu zâuv, heik chor pox niêv vir ndâuk đros cxaz chuôz têx phôngz yaox “tuôr têk, tơư kriê cêr huôv tsar uô nox”.

Niêv lâul Phấn Xênhv Zax nhoz jok Bản Công, xã Bản Công heik pâuz: “Khov muôx niêv lâul Lử yax kriê, paz max pêz chor pox niêv vir ndâuk Hmôngz tưz tsi xênhz zus ntâu mê nhuôv li thâuv ntêx lơưv; têx tuz nhuôs lok tsuv txâuk shông li tâu zuôr txir zuôr pox niêv; tsi siz zuôr nzor, siz zuôr cxênhz jê. Niêv lâul Lử tsênhv hu zâuv, heik chor pox niêv vir ndâuk đros nhoz hâur hội pox niêv chiê siz kriê huôv tsar uô nox, cxuz cêr pluôs”.

Zơưv Trịnh Văn Xuê, Phưv Bí thư Thường trực Huyện ủy Trạm Tấu, tỉnh Yên Bái heik pâuz: Cxiv tsa chor canr bôv hluôk, muôx txux chi tsưr ziv jông, tâu choz uô têx nuv đhâu tsênhv tsênhz chênhr zos chiê cxiv tsa hâu nov, canr bôv lês uô têx hâux lưv lox trâu ntu zuôr txos: “Hâur têx shông đhâu, Ban thường vụ Huyện ủy Trạm Tấu cux tưz tso ntâu lênhx zos canr bôv hluôk muk Bí thư, Phưv Bí Đảng ủy têx xã, thị trấn; Chủ tịch, Phưv Chủ tịch Ủy ban iz cxiê xã, thị trấn thiêz txos nhiv no trơưk li Ban Thường vụ Huyện ủy Trạm Tấu ntâuk grê, phênhv ntâu chor canr bôv hluôk tâu choz lês uô têx hâux lưv heik sâuv tưz uô tâu jông Ban Thường vụ Huyện ủy hâux lưv zok muôz”.

Txix têx sir jos tso canr bôv hluôk heir nênhs tsơưs muk lês uô Đảng bộ huyện têx hâux lưv lox, txos nhiv no chor canr bôv hluôk nhoz huyện tox siêz Trạm Tấu tưz hloz tiêr siêz, lês uô tâu jông cxuô cêr nuv zok muôz trơưk tsưr ziv xar, paz cxơưz uô tâu tiêr hâux lưv chox car, chox kriê cxiv tsa Đảng, huôv tsar kinh tế, xã hội, tsưx phưv truôx tuk thax tsav qơư./.

Đinh Tuấn-Riê Lâux cxeik, nhênhv

Công an têx hâux lưv uô jông paz trâu pêx xênhv trâus đêx ngaz cuôr nhoz Sơn La

 “Muôx têx chuôz zis jâuv sâuv trur tsêr, tsa têk, hêik cov chơưv paz, taz sik tiv đêx ngaz pur siêz sêi hênhr, tsik muôx chuôz zênhx chiê muk hâur têx qơưk đêx ngaz toz, viv li chor canr bôv chiên sĩ cux tsuôk txiêr shôngz, txiêr tsơưz đros muôz têx cak trâu đêx lok khi uô cê chiê chêix muk lok sâuv têx đêx…”.

Thiếu tá Lèo Văn Hoán, canr bôv Công an xar Tông Cọ, huyện Thuận Châu, Sơn La li phêiz kênh cux zos chôngz lênhx canr bôv, chiến sĩ cxaz chuôz chơưv paz hâur jiês đêx ngaz cuôr lịch sử muôx yưv thâuv zar kaz hli 7 nhiv kruôr đhâu li xar thiêz ndo njôngr txos.

Hâur chor hnuz muôx đêx ngaz pur siêz, txos thâuv đêx grêk, chor canr bôv, chiến sĩ công an cux tsik so sir jos đros chơưv paz lênhx nênhs,tir nas nyêis yêv têx chuôz zênhx chuôz tav, thoz huk têx cuô ar, paz pox nhuôs nzor hla đhâu têx phiv liv… zos kror muôx đrêiv nhoz xar Tông Cọ. Thượng úy Dương Quốc Bình, canr bôv Công an xar Tông Cọ phêiz kênh: “Pêz cux xav zuk jông xưk li pox nhuôs chiê muôx txơưx jênhv đuô sir jos paz trâu pox nhuôs cov hla đhâu têx phiv liv nzor truôx tuk luz nênhx”.

Cux hâur jiês đêx ngaz cuôr ar poz lịch sử tiv coz chuô sôr 2, tưz tsik zos ntơưv têx qơư muôx đêx ngaz cuôr, mak ntơưv têx jêx jok muôx ar, shôngz ntông poz vâu lok thêir, ruôr hiêv trâus cêv kuôk… cux muôx trơưr chor canr bôv, chiến sĩ công an tuôx đros paz trâu pox nhuôs. Tix lâus Dếnh Xênhv Zax, jok Hua Pư, xar Chiềng Nơi, huyện Mai Sơn hêik pâuz: “Zos tsik muôx cxuô cấp đros paz mak pêz têx hâux lưv chơưv paz cux zuôr lax uô tâu. Lok six uô tsâus ntâu txos chor công an tưz paz trâu pêz thiêz paz đros zok nriêr nênhs”.

Chiê muk tâu txos trâu kror qơư trâus đêx nas chuô, ar poz ruôr hiêv Hua Pư, xar Chiềng Nơi, huyện Mai Sơn, Sơn La-qơư muôx 5 lênhx nênhs trâus chor ar poz lok cxuz, canr bôv, chiến sĩ tưz tsuv muk tơưv đhâu têx har jôngr, têx đêx xar muôx 10 six hơưv, tsuv muk đhâu ntâu qơư muôx ar poz lok six phiv liv. Taz sik, xar txos pox nhuôs tsênhv tok njôngr tâu paz, lơưr tưz sir jos muk đros muôx txơưx jênhv siêz. Trung tá Nguyễn Văn Vỹ, Phưv Tiểu đoàn trưởng Tiểu đoàn Cảnh sát cơ động sôr 2, Trung đoàn Cảnh sát cơ động Tây Bắc, Bôv Công an puz pâuz: “Ntu cêr pêz tuôx mak lok six lax muk, pêz muk đhâu ntâu qơư ar poz. Tsuv hêik chor canr bôv, chiến sĩ sir jos muk cov txos qơư sêi tiv zix, sik côngv đros jêx jok, chinhr quyền zok nriêr, uô hâux lưv chơưv paz”.

Nhiv kruôr no, hnuz 10/8, txuz ar xưz poz phiv liv ntơưv xar Tà Xùa, huyện Bắc Yên, Sơn La tưz uô hiêv txos lênhx nênhs thiêz chuôz zênhx chuôz tav, yênhx châuv ziv chuôz zis tsuv txar qơư nhoz sêi đrơưv. Đhâu ntâu hnuz lok nas, kror qơư no pov muôx têx caz xưz ntâu qơư zôngx ziv tror poz lok. Đros cxuô cấp, cxuô nganhx kriz uô côngz xưv khưx phưx, lưx lươngv công an tưz sêiz jor yênhx hnuz hmo ntơưv xar Tà Xùa, cê paz cov ngaz tuk, cê yax kriê, paz pox nhuôs txar tơưv muk đhâu têx qơư zôngx ziv muôx ar poz, cov tsik njiz trâus têx phiv liv pôngz siêz. Zơưv Nguyễn Thành Công, Phưv Chủ tịch Ủy ban tỉnh Sơn La ntâuk gri: “Lưx lươngv công an huyện, xar, tôv an ninh tưz uô lok six jông têx hâux lưv. Muôx tir thêir, muôx qênhz yuôx tsik so, hmo ntux muk qênhz yuôx thiêz chox hur si chor ziv chuôz zis muk cov đhâu têx qơư phiv liv no. Thiêz nhiv no pêx xênhv tưz tâu txar tas lơưv, vax tsêr, cxuô zav zuôr tâu txar sêi thiêz sir jos cov truôx tuk pêx xênhv luz nênhx hâur ntu zuôr txos”.

Njuôk xav txix chor jiês đêx ngaz cuôr, ar poz thâuv kaz hli 7 txos nhiv no ntơưv Sơn La, tưz uô 13 lênhx nênhs tuôs, chôngz lênhx nênhs trâus saz, 2.800 ntâu luz tsêr, 32 tsêr cơưv ntơưr trâus phiv liv, muôx yênhx cxênhz txuz ar poz nhoz têx cêr…. Chênhr muôx chor lưx lươngv thiêz pêx xênhv ntơưv qơư li sik côngv siêz, txơưx jênhv, sik phêiz kênh, sik paz tưz paz trâu pox nhuôs hâur têx qơư trâus đêx ngaz cuôr, ar poz ruôr hiêv co txo grêk tsơưs têx cêr pôngz siêz chiê nzor truôx tuk luz nênhx…/.

Thùy Hạnh-Lik Thox cxêik nhênhv