Hlôngr yiêz tsưr ziv, huôv tsar uô nhoz ntus đriv Si Pa Phìn

Nhoz tox siêz Si Pa Phìn, luz tsêr cơưv yiêz shux xênhz nox nhoz hâur tsêr cơưv 2 cấp cxênhx iz thiêz cxênhx 2 Si Pa Phìn tâu cxiv uô đar xar muôx 7 ha, 31 qar tsêr cơưv, 14 qar tsêr uô hâux lưv, shux xênhz nhoz hâur tsêr cơưv thiêz têx côngz trênhx uz no. Luz tsêr cơưv no txâuk chiê iz cxênhz ntâu lênhx shux xênhz phênhv ntâu zos tsôngv box heir nênhs nhoz thax tsav ntus đriv têx tuz nhuôs nhoz cơưv txux chi, xênhz huôx.

Têx lớp cơưv tin học, cơưv hu gâux.....tsênhv jux juk yênhx hâux lưv cơưv txux sưv đros chor shux xênhz tsêr cơưv Phổ thông nội trú 2 cấp cxênhx iz thiêz cxênhx 2 Si Pa Phìn. Chor shux xênhz tâu sir zôngv meir tính, đros cơưv shâuv ntâuk meir hlôngr viv cơưv li thâuv ntêx. Đros thiêz tsêr cơưv muôx cxix cxuô zav li: Qơư nhoz cơưv ntơưr, chuôz zênhx phưx vưv cơưv txux, qơư xênhz huôx, chor shux xênhz muôx têx cơưv tâu txux chi jông đuô. Lò Thị Long Nhi, shux xênhz lớp 8A1 shir phaz heik:

“Thâuv tâu nho cơưv hâur tsêr cơưv yiêz truôx khor, hur si, muôx ntâu zav chuôz zênhx jông li no, cur lok six shir phaz thiêz jông siêz hênhr. Muôx qơư jông nhoz cơưv txux chi li no mak cur zuôr sir jos cơưv cov tưr thik tâu muk cơưv hâur tsêr cơưv nội trú tỉnh, tov kaz no muôx têx muk cơưv đại học, yênhx lênhx pox niêv cảnh sát. Thâuv cơưv tiêr, cur zuôr tror lok hâur thax tsav qơư chiê paz Si Pa Phìn ziv hnuz ziv huôv tsar jông đuô”.

Tsi tiêk shux xênhz, chor cưk kriê ntơưr hâur tsêr cơưv cux muôx jông qơư, jông chuô zênhx phưx vưv kriê txux chi. Uô hâux lưv tâu zuôr xar 20 shông nhoz tox siêz, cưk kriê ntơưr Vũ Thị Lương heik pâuz, thâuv ntêx luôs hâux lưv kriê ntơưr njiz trâus lok six ntâu phiv liv, viv muôx tsi txâuk chuôz zênhx thiêz qơư trâu shux xênhz cơưv ntơưr, njiz phiv liv lok hlôngr yiêz tsưr ziv kriê txux chi. Nhiv no, muôx qơư nhoz, cơưv ntơưr đar pho, cxix cxuô têx chuôz zênhx, cưk kriê ntơưr muôx têx sir zôngv tâu ntâu faz tsưr ziv kriê txux chi chiê paz shux xênhz cơưv tâu ntơưr jông đuô:

“Cur tuôx no uô hâux lưv xav txos nhiv no tưz zos shông tiv 20 lơưv. Pir li thâuv ntêx mak nhiv no qơư kriê txux chi jông đuô lok six ntâu. Lar heik lok sâuv jax lịch sử thiêz Địa lý, thâuv ntêx tsêr cơưv kuz muôx tsi txâuk têx chuôz zênhx phưx vưv kriê thiêz cơưv ntơưr. Thâuv uô tâu tsêr cơưv yiêz tưz muôx txâuk cxuô zav li: Tivi, meir cxeik đuôz, têx chuôz zênhx txơưr đuô phưx vưv trâu kriê thiêz cơưv txux chi lok six jông”.

Đros trâu cxuô jax cơưv chênhr, Tsêr cơưv Phổ thông nội trú 2 cấp cxênhx iz thiêz cxênhx 2 Si Pa Phìn cux tsênhv jux juk muôz têx tsênhv njiêz yiêz kriê trâu shux xênhz. Lok sâuv cơưv shâuv, uô trơưk, shux xênhz tâu cơưv nzir txux chi tsưr ziv uô hâux lưv, tsưr ziv đơưk uô têx hâux lưv zuôr trâus txos hâur cêr cơưv txux thiêz luz nênhx.

Cưk kriê Nguyễn Văn Dúp, thơưx seiz car Tsêr cơưv Phổ thông nội trú 2 cấp cxênhx iz thiêz cxênhx 2 si Pa Phìn heik pâuz, txix muôx cxix cxuô zav chuôz zênhx jông, tsêr cơưv xav tinhv tsênhz mênhx luôs hâux lưv gra siêz tsơưr lươngv zoz zux, moz siêz hur si txos txux chi thiêz tsưr ziv trâu shux xênhz hâur ntu zuôr txos:

“Lok sâuv qar cơưv ntơưr, chor shux xênhz zuôr tâu buôk ti cơưv pêv lớp, tsi thôngx li thâuv ntêx phênhv ntâu cơưv hâur ntâuz ntơưr thiêz nhiv no shux xênhz zuôr tâu cơưv têx txux chi đros trâu shâuv uô trơưk ciês têx tưz kriê đhâu ntơư. Txix co, tsêr cơưv vav chiê siêz hâur ntu zuôr txos, zuôr jux juk gra siêz tsơưr lươngv zoz zux chiê shux xênhz heir nênhs tsơưs nhoz tox siêz tâu buôk ti txos têx txux chi, tsênhv njiêz yiêz hâur cêr cơưv txux, jux juk bax tsưr ziv trâu têx nhuôs cêr uô nênhx jông đuô”.

Txix muôx qơư truôx khor nhoz cơưv ntơưr, luôs hâux lưv kriê thiêz cơưv ntơưr zuôr jux juk truôx tuk, shux xênhz tox siêz tâu cơưv têx txux chi yiêz, chuôz zênhx jông phưx vưv cơưv ntơưr.....tsơưr lươngv zoz zux nhoz Si Pa Phìn tâu vav chiê siêz zuôr muôx têx hlôngr yiêz, muôz pênhr jos trâu hâu nov ntơưv qơư hâur ntu zuôr txos./.

Vũ Lợi-Riê Lâux cxeik, nhênhv