Oz luz tsêr cơưv oz cấp nhoz thax tsav ntus đriv Sơn La tâu uô tiêr

Nhoz thax tsav ntus đriv Sơn La muôx iz luz tsêr cơưv lox, jông tưz tâu uô tiêr.

30 lớp cơưv, muôx 12 lớp cxênhx iz thiêz 18 lớp cxênhx oz; chor qar cơưv bộ môn, qar thực hành tâu yưv pênhr uô cxix cxuô, muôx txâuk têx chuôz zênhx cơưv ntơưr jông. Đros co zos qơư shux xênhz nhoz, tsêr uô jâuz mor nox, qơư uô si, pak đêx đa… tax tâu trâu 1.000 ntâu lênhx shux xênhz zos têx tuz nhuôs tsôngv box cxuô mênhx cxưx li hâux lưv cơưv ntơưr thiêz xênhz huôx.

Đros cưk kriê ntơưr Trần Văn Lâm, Hiệu trưởng Tsêr cơưv Phôv thông nội trú Cxênhx iz thiêz CXênhx oz xar Yên Sơn, no zos iz kror shir phaz lox mak thâuv ntêx no zuôr xar tsik txos hlo: “Lok six shir phaz, no zos kror shir phaz tsik tâu muôx hlo, thiêz cux tsik tau xar tiêk sâuv thax tsav xar Yên Sơn zuôr muôx tâu iz luz tsêr cơưv lox jông li no, muôx tâu iz kror qơư jông chiê txoz cxơưx trâu cxênhx nênhs zuôr txos. Tiv zix zos kruôz kriê trâu chor shux xênhz, paz muôx tâu pênhr jos trâu thax tsav qơư…”

Cêr shir phaz co cux tsênhv muôx ntơưv Lóng Phiêng-xar ntus đriv kuôk tsik đêz thax tsav ntus đriv Việt Nam-Lào. Txix thâuv sơưr nzor, yênhx puô lênhx shux xênhz đros chuôz zis tưz tuôx trâu ntơưv luz tsêr cơưv yiêz no chiê dưv jiês tsưr tsix uô tiêr luz tsêr cơưv no.

Đros chor nhuôv nhoz tox siêz Yên Sơn, Lóng Phiêng, têx kror lok six sưv đros nhoz têx tsêr cơưv qơư kik li iz lớp cơưv lox jông, thư viện, qar cơưv thực hành, yar tiêx uô si, pak đêx đa lok sik iz qơư trâu shux xênhz nhoz muôx txâuk cxuô kror-nhiv no tưz zos iz kror lok six jông, muôx cxix cuô. Tưz tsik zos tâu cơưv ntơưr hâur têx qơư cơưv jông đuô, chor nhuôv tsênhv tâu uô nênhx, xênhz huôx thiêz yênhx nênhs hâur iz qơư zoz zux tsêx trung, truôx jông đuô. Viv li, chor nhuôv cux lok six shir phaz hâur hnuz luz tsêr cơưv yiêz tâu uô tiêr. Vì Thị Châu, shux xênhz lớp 9, Tsêr cơưv Phôv thông nội trú Cxênhx iz thiêz Cxênhx oz Yên Sơn hêik pâuz: “Cur luz tsêr nhoz kuôk tsêr cơưv ntơưr 15 cêik cêr, cur tâu nhoz nội trú hâur tsêr cơưv. Hnuz no tuôx dưv jiês uô tiêr cur shir phaz hênhr, pov luz tsêr cơưv lox jông, muôx qơư nhoz trâu shux xênhz yiêz jông. Luz tsêr cơưv yiêz muôx ntâu qar cơưv thực hành, thư viện, ntâu qơư chiê uô si, têx co zuôr paz trâu pêz cơưv ntơưr tâu jông đuô”.

Oz luz tsêr cơưv nội trú oz cấp Yên Sơn thiêz Lóng Phiêng tâu uô tiêr, tưz tsik zos paz muôx tâu iz kror yiêz trâu zoz zux thax tsav ntus đriv, mak tsênhv paz trâu chor nhuôv nhoz ntơưv no tâu cơưv ntơưr, txoz cxơưx thiêz huôv tsar cxix cxuô đuô ciês ntơưv zuk qơư nhoz.

Hêik ntơưv jiês tsưr tsix uô tiêr Tsêr cơưv Phôv thông nội trú Cxênhx iz thiêz Cxênhx oz xar Yên Sơn, zơưv Nguyễn Đình Việt, Chủ tịch Ủy ban tỉnh Sơn La, puz pâuz: Uô lơưr Đảng, Têz qơưk tsưr ziv, hâur shông 2026, tỉnh Sơn La sik đros kriz uô 13 côngz trinhx tsêr cơưv nội trú ntơưv 13 xar ntus đriv. No zos têx hâux lưv uô ntâu hâur iz ntu lur, ntơưv thax tsav tox siêz, muôx ntux yar ntux nas phiv liv. Taz sik, muôx tas nro cxiv luôs chinhr triv đros uô, chor côngz trinhx tưz tâu paz pênhr jos, sir jos uô sêi, uô cov tâu jông lok tsơưr lươngv: “Txix iz chủ trương lox, txix tas nro cxiv luôs chinhr triv li sir jos thiêz muôx pêx xênhv thôngx ziv đros, chor tsêr cơưv yiêz tưz thiêz tsênhv tâu uô tiêr ntơưv thax tsav ntus đriv Sơn La; txoz cxơưx tâu jông tiv zix trâu chor shux xênhz thiêz paz trâu cxênhx hluôk muôx nzir txux chi, sir jos, muôx txơưx jênhv paz trâu têz qơưk. Cur njênhs tiêk, chor tsêr cơưv nội trú ntơưv tỉnh têx xar ntus đriv zuôr zos yênhx têx qơư paz tâu jông trâu zoz zux, paz gra siêz tsơưr lươngv pênhr jos, uô tâu jông sik côngv siêz cxuô mênhx cxưx, cxiv tsa thax tsav ntus đriv huôv tsar thiêz truôx tuk đuô”.

Oz luz tsêr cơưv Yên Sơn thiêz Lóng Phiêng tưz tâu uô tiêr nzor thiêz kriê siv ntơưr txix hnuz 22/8. 11 luz tsêr cơưv nội trú txơưr ntơưv tỉnh Sơn La chor xar ntus đriv cux tsênhv sir jos tâu uô cov tiêr, tsưr tsix uô siv qơư nhoz nội trú, tsêr uô jâuz mor nox thiêz kriê ntơưr uô ntêx hnuz kriz cơưv shông cơưv yiêz./.

VOVTB-Lik Thox cxêik nhênhv

Lào Cai sir jos uô luôs hâux lưv phax tar nas chuô

Têx hnuz no, hâur thax tsav tỉnh Lào Cai lok nas lox, yênhx châuv xã, phường zôngx ziv trâus đêx nas cuôr yôngz, tox xưz poz. Chor canr bôv jok tsênhv sir jos yax kriê tsôngv pêx xênhv sơưr đơưk chênhr phax, bax yêik txar qơư nhoz zos lok nas hloz, đêx huôv lox. Zơưv Tùng Xênhv Zax, tsar jok Kang Đề, xã Púng Luông, tỉnh Lào Cai heik pâuz: “Đêx nas lox, hâur thax tsav jok cux muôx kênh qơư zôngx ziv trâus xưz poz. Zos muôx yưv têx tsi jông li heik sâuv mak cur cux tưz heik trâu sâuv loa nta suôz trâu tsôngv niêv txir lax pêx xênhv hur si lơưv. Pêz cux buôk ti nhoz trơưr ntơưv qơư hâur yênhx hnuz hmo, vênhv tôngv thiêz yêik txar têx chuôz zis nhoz thax tsav riêz nênhs muk trâu qơư truôx tuk”.

Txix hâur shôngk shông 2026 txos nhiv no, tas nro tỉnh Lào Cai muôx 22 coz nas  lox, uô 15 lênhx nênhs trâus saz, zuôr xar 8 cxênhz luz tsêr trâus puôk tsuôx, xav têx trâus ruôr hiêv tas muôx 242 tyv đeiv. Txix ntux txơưr txar ziv hnuz ziv phiv liv, hâur ntu đhâu, cxuô thax tsav qơư hâur tas nro tỉnh Lào Cai tưz qênhz shuôs 3 cxênhz ntâu qơư zôngx ziv tsi truôx tuk, uô ruôr hiêv txos 23 cxênhz ntâu chuôz zis pêx xênhv chiê cxiv tsa tsưr ziv yêik txar qơư nhoz thâuv muôx yưv tsi jông, riêz nênhs.

Zơưv Quốc Hưng Xênhv Zax, Phưv Chủ tịch Ủy ban tỉnh Lào Cai heik pâuz: Tỉnh heik cxuô thax tsav qơư qênhz shuôs đuô hur si têx tsưr ziv, hâux lưv lơưr tsưr ziv 4 ntơưv qơư, cxiv tsa, fuô kriê tsênhz mênhx txos yênhx jêx jok, yênhx chuôz zis pêx xênhv nhoz thax tsav riêz nênhs, zôngx zivtrâus đêx nas ngaz, cuôr yôngz thiêz xưz poz. Iz qơư li heik sâuv nhiêk tsuv muôx nhiêk tsưr ziv phax tar, tsi tâu cxiv uô xưk iz zav. Lar heik, tỉnh Lào Cai tưz muôz têx luôs hâux lưv uô tâu lok phax tar đêx nas hloz chiê ntâuk grê canr bôv. Hâur jiês ntâuk grê nhiv kruôr đhâu, muôx 14 lênhx hâu nov cấp xã uô tsi tiêr têx hâux lưv zok muôz, hâur co cux cik txos tiv tsik sir jos, tsi cxiv uô jông tsưr ziv phax tar đêx nas cuôr yôngz. Phưv Chủ tịch Ủy ban tỉnh Lào Cai heik pâuz: Hâur ntu zuôr txos, cxuô thax tsav qơư tsi moz siêz, tsi cxiv uô jông tsưr ziv phax tir thêir đêx nas chuô, lok sik chiê muôx yưv têx tsi jông, riêz nênhs mak zuôr trâus kiểm điểm, ntâuk grê uô tsik tiêr hâux lưv zok muôz: “Pêz sđ tsuv sir jos uô cov tiêr cxuô luôs hâux lưv tso tơưv, txơưv nhiv no sơưr đơưk lok six ntâu nuv. Taz sik pêz phênhz côngz, choz hâux lưv, pêz muôx tsưr tsix đoanx thêv, muôx lênhx nênhs muk txos yênhx jêx jok. Zuôr txos no, chor canr bôv hâur jok ho tâu choz nzir hâux lưv, muôz nzir nhiêx hli mak tsuv sir jos lês uô jông hâux lưv phax tar nas chuô, co zos hâux lưv chính trị zov chênhr viv cik txos lênhx nênhs txox siê, chuôz zênhx chuôz tav”.

Nhiv kruôr đhâu, tưz muk qênhz yuôx ntơưv tỉnh Lào Cai, zơưv Phạm Đức Luận, Cục tsar Cục seiz car đêx thiêz phax tar nas chuô (Bộ Kôngz nuv thiêz tênhx qơư) cux heik Ban seiz car phax tar têx tsi jông tỉnh Lào Cai zênhx max qênhz shuôs hur si cxuô tsưr ziv phax tir thêir ntux txơưr txar, đêx nas hloz; iz chas ntơư chox kriê cxuô xã uô tiêr tsưr ziv fuô kriê txos yênhx jêx jok, yênhx thax tsav zôngx ziv trâus đêx nas cuôr yôngz, tu xưz, đêx ngaz huv đros tsênhv tsênhz. Iz tsưr ziv tsuv cui tinhv tsênhz mênhx chor lưv lươngv, lênhx nênhs hâux lưv zok muôz chiê Chủ tịch Ủy ban cấp xã muôx qơư choz hâux lưv. Thâuv zok muôz hâux lưv mênhx li ntơư, zuôr bax tâu cxuô faz tsưr ziv, muôx cêr thôngx siêz truôx chiê lês uô tâu jông cxuô luôs hâux lưv: “Tsưr ziv phax tar tsuv huv đros tsênhv tsênhz thiêz mênhx lênhx nênhs, tsênhz hâux lưv. Choz trâu lênhx tưs, tsưr tsix tưs, Chủ tịch Ủy ban xã txix quyết định cir tso tơưv tsưr ziv phax tar têx tsi jông ntơư choz trâu yênhx lênhx nênhs mak tus co thiêx moz siêz, sir jos lês uô. Iz zav li choz trâu Phongx Kinh tế tsuv bax jông cxuô zav ntơưv qơư mak Phongx kinh tế sir jos bax uô cov tâu trơưk tsưr ziv tso tơưv; lok sik lưv lươngv ntơưv qơư choz trâu Công an, tuz lênhv mak Công an, tuz lênhv tsuv bax uô”.

Chiê luôs hâux lưv phax tar nas chuô uô tâu jông đuô, nhiv kruôr đhâu, Ủy ban tỉnh Lào Cai tso tơưv quyết định cui tinhv phênhv paz zênhx max trâu pêx xênhv hâur thax tsav tỉnh tsuv sei đrơưv yêik txar muk nhoz qơư truôx tuk. Đros trâu têx li heik co, chuôz zis, lênhx nênhs tsuv yêik txar zênhx max đhâu thax tsav riêz nênhs mak tâu paz 250 cxênhz đeiv iz lênhx nênhs iz hnuz./.

Đinh Tuấn-Riê Lâux cxeik, nhênhv