Huôv tsar kinh tế jôngr ntông nhoz Yên Bái

Niêx shông, tỉnh Yên Bái chos yiêz 15 cxênhz ntâu ha jôngr ntông cxuô zav, têx shôngz ntông njuôz nzôngr tox trôngz câuv har txix 62% shông 2015 tsar ndê 63% lok shông 2022, sơưr tiv 4 hâur tas nro têz qơưk. Tỉnh tsưr ziv tso tơưv zos txos shông 2025, têx shôngz ntông njuôz vor tox trôngz câuv har tax 65%, têx ntông lox jông ntor cơư hâur niêx shông tax 500 cxênhz yiv đruôz, ndar txos yênhx tsênhv qơư tsiv uô ntâu ntông thiêz jông.

Pos Lý Thị Mỹ nhoz jok 10, thị trấn Mậu An, huyện Văn Yên chuôz zis muôx 02 qơư tsiv uô têx zuz ntông đros thiêz 2 tsov tsoz zuz ntông ciêv fix. Khov tu tsưx phưv jông, têx zuz ntông hloz lox jông trơưk li tsôngv pêx xênhv hâur thax tsav huyện tsưr ziv, siêz xar. Iz shông yưx tas têx nhiêx txiêx ntiêr nênhs đros uô, tu têx zuz ntông, pos Mỹ chuôz zis sâu tâu xar muôx 150 tsov đeiv:

“Uô jux juk, xuz thơưx pêz tsuôk uô tsơưs xưz, iz shông uô ntâu mê njik nzir 2, 3 châuv vạn tsoz. Ciêv fix chos tâu mak muôx phênhv sâu tâu trâu zuk”.

Uô đreiv luôs hâux lưv chos jôngr ntông zuôr xar 30 shông, tsi muôx iz jiês tưs pos Nguyễn Thị Nguyệt nhoz jok Hơn, xã Thịnh Hưng, huyện Yên Bình pov ntông muôs tâu grê li oz pêz shông jê lok no. Pos Nguyệt heik, thâuv ntêx pêx xênhv ntơưv qơư cor cav cơư ntor têx ntông chos tsuv muôx 6-7 shông, taz sik jê lok no mak têx ntông muôx 10 ntâu shông li ntor cơư, viv li cux tâu gri đuô pir li ntor cơư têx ntông mok. Hâur xuz jôngr, têx ziv chuôz zis tsênhv huôv tsar tu zus mur, zus keiz ok chiê muôx nzir phênhv sâu tâu:

“Chos, tu ntâu têx jôngr ntông chiê taz por muôx phênhv sâu tâu ntêr, viv iz zav li 7 shông zuk muôs mak iz ha muôx têx tâu nhos 60-70 tsov taz sik zos chiê 12 shông mav muôs têx ntông mak tâu puô tsov đeiv, thâuv co tsi tas yưv pênhr lơưv thiêz cux zus tâu mur hâur têx xuz jôngr hur si”.

Hâur ntu đhâu, chiê gra siêz tsơưr lươngv, tsiv gri têx jôngr ntông chos, tỉnh Yên Bái tưz chox kriê cxuô thax tsav qơư chos têx ntông muôs lơưr tsưr ziv tsưx phưv jông têx shôngz ntông. Txos nhiv no, tas nro tỉnh muôx zuôr xar 12 cxênhz ha jôngr chos tâu muôz ntơưr côngk nhav, tsưx phưv li heik sâuv. Tiến sĩ Đỗ Đà Giang, Phongx cxiz kôngz, chos jôngr, Tsênhv qơư cxiz kôngz têz qơưk jênhv tinhv:

“Têx jôngr ntông chos muôz ntơưr côngk nhav tsưx phưv li heik co zos trơưk ntơưr côngk nhav ntiêx têz, chor jôngr ntông no txix thâuv zuz txos thâuv chos, tu thiêz tsưx phưv puôr lênhx trơưk tsưr ziv ntiêx têz. Uô li co mak pêz têx xiv huv ntông muôx têx muôs tâu trâu chor ciêz đrôngs lox sâuv ntiêx têz txix châu Âu, châu Mỹ, Nhật Bản, Trung Quốc…. Nhiêx txiêx cux tâu ntâu đuô lok six ntâu pir li pêz chos thâuv ntêx”.

Tas nro tỉnh nhiv no muôx 500 ntâu qơư tsiv uô ntông, hâur co muôx zuôr xar 100 doanh nghiệp thiêz HTX, yuôr đuô li zos têx ziv chuôz zis. Iz chas ntơư, tỉnh Yên Bái tsênhv muôx têx doanh nghiệp zuôr ntông tsiv uô ntơưr phưx vưv uô lưv zav hâux lưv uz no….thiêz. Txix co muôz hâux lưv uô trâu 3 cxênhz ntâu lênhx lox tôngv, paz tsi tsơưs trâu tỉnh li phênhv sâu nhiêx txiêx.

Đros thiêz têx jôngr ntông, ar njuôk hov chos jôngr zuôr xar 479 cxênhz ha, Yên Bái zos qơư muôx ntâu têx ntông lox hâur thax tsav chor tỉnh tox siêz faz Bắc, iz shông muôx têx ntor cơư zuôr xar 700 cxênhz yiv đruôz ntông cxuô zav thiêz 150 cxênhz ntâu tênhr têx shôngz. Têx muôx liv co tưz thiêz tsênhv tâu chor doanh nghiệp hâur thax tsav nzaz nzơưv chiê uô nox, tsar ndê phênhv sâu tâu, paz kinh tế ntơưv qơư huôv tsar./.

                            (Đinh Tuấn-Riê Lâux cxeik, nhênhv)