Hâur đêx ntơưv Sơn La trâus vuôz tsuôz kêik nênhs: Qir tiv zos têx chuôz zis tu zus nhux cuô mik

Hnuz 17/4, Sở Kôngz nuv thiêz Tênhx qơư Đoanx côngz xưv zos zơưv Nguyễn Mạnh Hùng-Phưv Giám đốc Sở uô thơưx chox đoanx tưz muôx jiês uô hâux lưv đros Ủy ban phường Thảo Nguyên, Công ty nôngz nhux cuô mik Mộc Châu thiêz têx chuôz zis pêx xênhv cik txos chiê heik trâu sơưr đơưk pâuz lok têx đhâu qênhz yuôx vuôz tsuôz, kiêk nênhs tênhx qơư ntơưv jok Chè Đen 2, phường Thảo Nguyên (Sơn La).

Đros trâu têx li heik co, qir tiv vuôz tsuôz, kiêk nênhs tâu xav zos viv 14 chuôz zis tu zus zuôr xar iz cxênhz tus nhux nhoz jê iz ndis thax tsav tsi muôx qơư trâu, xưv lik têx kiêk nênhs, vuôz tsuôz. Chor chuôz zis tu zus nhux phênhv ntâu tsuôk muôx qơư trâu hur si têx đêx thiêz qir uô cê, yuôx tso cov têx đêx, qir co tsi yuô tsư nxiêz xưz (tsi muôx qơư xưv lik chor đêx kiêk nênhs, vuôz tsuôz ntơư); đhâu co têx đêx kiêk nênhs, vuôz tsuôz tâu sir zôngv chiê zưs trâu chor đrox, tâux nhoz jê iz ndis. Li ntơư, tsi jông chiê zưs trâu tsoz chos lok sik tso cxênhv hâur ar, uô tsi hur têx hâur đêx hâur thax tsav qơư. Tsi tas li, hâur đêx kiêk nênhs cux tâu xav tinhv muôx têx zos iz cxiê zav vuôz tsuôz, kiêk nênhs, cêr huôv tsar uô nox, xênhz huôx nhoz jê iz ndis uô ruôr hiêv txos. Zơưv Nguyễn Mạnh Hùng, Phưv Giám đốc sở Kôngz nuv thiêz Tênhx qơư tỉnh Sơn la heik mênhx: Chor nhux cuô mik ntâu, muôx txos yênhx châuv cxênhz tus, tu zus tsi uô cê, tsi muôx qơư trâu, xưv lik têx vuôz tsuôz, kiêk nênhs trơưk cui tinhv zos iz phiv liv lox trâu luôs hâux lưv por hưv tênhx qơư thiêz xưv lik têx kiêk nênhs, vuôz tsuôz hâur đêx:“Nhiv no luôs hâux lưv por hưv tênhx qơư hâur tu zus nhux cuô mik tưz tâu moz siêz fuô uô. Taz sik, tiv tu zus tsi uô cê, iz chuôz zis tsuôk zus txix 20-100 tus, chênhr viv li yưv pênhr uô qơư xưv lik vuôz tsuôz, kiêk nênhs tsênhv fuô uô tsi tâu tâu. Têx đêx kiêk nênhs thiêz qir phênhv ntâu tâu tso hur si trâu iz kro qơư, muôx nzir yuôx tso trâu cov tsi yuô tsư nxiêz, tsư kiêk; đhâu ntơư tâu zôngv zưs trâu têx jâuz tâux, đrox tsuôs, nưk cxênhv nưk hâur ar, uô tsi hur txos hâur đêx”.

Đros thiêz luôs hâux lưv đơưk tu têx vuôz tsuôz, kiêk nênhs hâur đêx ntơưv phường Thảo Nguyên, xuz thơưx Sở Kôngz nuv thiêz Tênhx qơư tưz uô hâux lưv đros hâu nov ntơưv qơư thiêz chor taz viv chiê côngz đêx xênhz huôx trâu  tsôngv pêx xênhv nhoz iz cxiê thax tsav trâus vuôz tsuôz, kiêk nênhs. Iz chas ntơư, heik têx phường Thảo Nguyên, Vân Sơn tror qênhz shuôs, ntâuk grê zoz  qơưx sir zôngv đêx xênhz huôx thiêz fuô uô cxuô faz tsưr ziv côngz đêx chiê muôx txâuk đêx hur trâu pêx xênhv sir zôngv. Heik txos hâu nov ntơưv qơư thiêz Công ty nôngz nhux cuô mik Mộc Châu txơưx jênhv lok taz por muôx qơư trâu tu zus nhux cuô mik truôx tuk thiêz hur jông, zơưv Nguyễn Mạnh Hùng heik pâuz:“Pêz tưz heik phường Thảo Nguyên thiêz phường Vân Sơn zuôr qênhz yuôx, seiz kaz têx chuôz zis tu zus chiê đas cir por hưv tênhx qơư trơưk Chei por hưv tênhx qơư cui tinhv. Txix đas cir li co, têx chuôz zis tsuv taz por qơư trâu, xưv lik hur jông têx kiêk nênhs, vuôz tsuôz, đhâu ntơư zuôr xưv lik tâu têx tsi hur trâu tênhx qơư. No zos tsưr ziv pêz tưz heik trâu têx phường thiêz hur si Công ty nôngz nhux cuô mik thâuv hux thôngx sik đros uô luôs hâux lưv heik sâuv mak chor chuôz zis tu zus tsuv uô trơưk cui tinhv li ntơư”.

Shông 2023, tỉnh Sơn La tưz tso tơưv nghị quyết lok cui tinhv thax tsav tsi tâu huôv tsar tu zus thiêz tsênhv chei paz thâuv yêik txar qơư tu zus, hâur co muôx tu zus cuô mik. Taz sik viv tỉnh pênhr nhiêx tsơưs, tsênhv chei tsi tâu fuô uô cxix cxuô, huv đros. Nhiv no Đêx anr yêik txar qơư tu zus nhux cuô mik muk trâu lưv thax tsav tsênhv tâu tỉnh thiêz cxuô ngênhx, ntơưv qơư sir jos fuô uô, hâux lưv tso tơưv txos shông 2030 zuôr uô tiêr./.

                                                                                                                   Thu Thùy-Riê Lâux cxeik, nhênhv

Tso zax zênhz tsês, tror cxiv kho đuô luz nênhx yiêz nhoz tox siêz Lào Cai

          Hâur luz tsêr mê nhoz phường Văn Phú, tỉnh Lào Cai, tix lâuk Vũ Văn Thanh nhiv no tưz muôx hâux lưv uô truôx, luz nênhx jux jus tâu truôx tul. Taz sik muôx tsi ntâu lênhx nênhs pâuz tiêk, kuôk nor 2-3 shôngv tov ntêx, lênhx txir nênhx no muôx ntu muôx zênhs zax zênhz thiêz trâus cơưx tux. Thâuv tror lok tiv phaz, tix lâuk lok six txax muôs thiêz nyei jêx jos heik li uz li no. Muôx têx thâuv, tix lâuk xar tiêk zuk zuôr tror tsi tâu uô luz nênhx jông lơưv, taz sik, chênhr viv muôx chuôz zis li tôngv vênhx, muôx côngv thôngx sik đros paz max, tix lâuk ziv muôx cxaz đas jos sir jos đuô hâur luz nênhx. Tix lâuk Thanh pheiz kênh:“Thâuv nhiv kruôr chiv zênhs zênhz tâu tror lok tsêr mak phêv liv ntâu hênhr. Phênhv ntâu zos zuk txax muôk đros jêx jos, taz sik khov tâu chuôz zis, fôngx zưs thiêz chính quyênx, pox nhuôk tôngv vênhx, heik kriê zuk thiêx pâuz tâu. Nhoz xã phường, tuêv jênh phố cux njênhs njôngr, paz txeik pênhr txix zênhx hanhx chính sách chiê huôv tsar uô nox, luz nênhx cux jux jus truôx tul đuô”.

          Ntơưv xã Khao Mang, zơưv Mùa A Cớ, mênhx cxưx Hmôngz cux muôx ntu muôx zênhs zax zênhz. Têx shôngk co, luz nênhx yeiz pluôk, tsêr fênhz jaz fênhz juôr, their tsi tâu ntux nyar ntux nas. Taz sik nhiv no, ciês sâuv thax tsav qơư kuz, iz luz tsêr yiêz đar jông muôx 60 yiv ndis tưz tâu cxiv uô. Đros zơưv Cớ chuôz zis, co tsi taz zos qơư nhoz mak tsênhv zos tso pov têx hlôngr yiêz jông hâur luz nênhx.

          Zơưv Cớ piêr kriê, tưz ntâu jiês zơưv chiv chir chiv zênhs zax zênhz taz sik tsi yênhx côngz. Iz phênhv viv txax muôs, iz phênhv zos viv tsi truôx siêz. Tsuôk thâuv lưx lươngv công an chính quy lok xã yax six tuôx tôngv vênhx, paz nôngz tsiêx tu zus; chính quyênx tiv phaz thâuv tưs cux sik côngv uô, zơưv thiêx njênhs njôngr, truôx siêz chiê tso zax zênhz tsês:“Cur uô tsâus ntâu. Zos tsi muôx têx paz txưv li co mak zuôr chiv zênhs zênhz tsi tâu, tso tsês tsi tâu zax zênhz”.

          Nhoz tox siêz Lào Cai nhiv no, têx lênhx nênhs li tix lâuk Thanh lok sik zơưv Cớ muôx tsi tsơưs lơưv. Ntâu lênhx muôx ntu muôx zênhs zax zênhz, nhiv no tưz chiv zênhs zênhz yênhx côngz thiêz tâu tror lok đros côngv thôngx uô nênhx. Lok têx cán bộ công an tiv phaz, côngv thôngx sđ mak thâuv tưs cux sik côngv đros nênhs muôx zênhs zênhz li nênhx cxênhz jê chiê tôngv vênhx, paz max lơưr tso zax zênhz tsês.

          Thượng ý Hoàng Văn Duy, Công an phường Văn Phú, tỉnh Lào Cai puz pâuz, đros nênhs chiv zênhs zênhz tâu, kror lax tiv zix tsi zos txiêr zênhs zênhz mak lơưr tsênhv tsuv tror sir jos tror lok đros côngv thôngx nhoz uô nênhx. Viv li, lưx lươngv công an tiv phaz tsi taz uô jông côngz xưv seiz car nghiệp vụ, mak tsênhv yax six njiz, đros sik thav chiê pâuz tâu lơưr li têx siêz xar njôngr, paz txưv txeik pênhr chiê huôv tsar uô nox:“Đrâuv uô jông côngz xưv seiz car lênhx nênhs, Công an phường tưz sik côngv jông đros têx ban, nganhx, đoanx thêv thiêz chính quyênx tiv phaz chiê pâuz tâu tsôngv px li siêz xar njongr, txix co tôngv vênhx, zaoz zux thiêz ciêr chênhr paz txưv. Thôngx cxix sik côngv paz hâux lưv uô, paz txeik pênhr chiê huôv tsar uô nox, paz nênhs muôx ntu muôx zênhs zênhz muôx tâu phênhv sâu truôx, yênhx trus tso zax zênhz tsês”.

Têx hlôngr yiêz co pov muôx tsênhv tsênhz nhoz ntâu tiv phaz hâur tỉnh Lào Cai. Têx qơư cuz nxor lok zax zênhz yênhx trus tâu txu grês. Ntâu jêx jos thâuv ntêx yax six muôx tuz saz tuz nhiês, txiv ngaz tsi taz por mak nhiv no tưz taz por truôx tul đuô.

Chêx cuk co zos khov muôx tas nro cxix luôk chính trị li sir jos hâur ntâu shông đhâu, tiv zix zos lưx lươngv công an hâur uô Ban thường vụ Tỉnh ủy Lào Cai li Nghị quyết 51 lok cxiv tsa “xã, phường tsi muôx zax zênhz”. Xav txix jiês sơưr tơưv txênhz ntês cxov nênhs phamv cxâuv lok zax zênhz txix kaz hli 3/2026 txos nhiv no, lưx lươngv muôx txơưx jênhv tưz pov, ntês tâu 150 txuz đros 260 lênhx nênhs cik txos zax zênhz, chuôz ndê pir đros tov ntêx. Tsi taz yơưz phơưz yênhx côngz têx txuz án lox, lưx lươngv muôx txơưx jênhv tsênhv chêx chongk cxuôv por tsês têx qơư muôv muôs zax zênhz mê, qơư chêx chôngk cuz nxor txix ciês ntơưv tiv phaz./.

                                                                                                 Trịnh Xuân-Txâur Vax cxeik nhênhv