Lào Cai truôx siêz trâu jiês thik xeir zuôr cơưv lớp 10 shông cơưv 2026-2027

Thik ntơưr mak lênhx tưs cux cxơưx, tiv zix zos thâuv chuôz zis, cưk kriê thiêz fôngx zưs njênhs njôngr ntâu txos nênhs thik. Taz sik, hlôngr viv cxơưx ntâu uô zênhr shar txos hâux lưv cơưv ntơưr, ntâu lênhx shux xênhz tưz chuv tôngv muôx tsưr ziv nox so, tuôr jông đas jos chiê muôx chinhz yênhx thik jông tiv zix. Shux xênhz Trịnh San San, Tsêr cơưv cxênhx oz Quang Trung, phường Yên Bái pheiz kênh:“Cur tsênhv chêx chôngk cơưv cxaz chiê shưv đros six hơưv, jax thik thiêz shâuv cxaz pênhr xưv thik. Txơưv muôx têx thâuv cux pov lok six cxơưx, taz sik cur cux sir jos tuôr jông đas jos, nhoz so huv đros chiê muôx chinhz yênhx jông tiv zix bax trâu jiês thik. Cur thâuv tưs cux chiv chir tôngv vênhx zuk tiêk tsuv sir tas đas jos chiê muôx tâu chêx cuk jông, tsiv nhos đros zuk li têx sir jos hâur ntu đhâu”.

          Đros têx lênhx uô niêv uô txir muôx mê nhuôk zuôr thik ntơưr hâur jiês no, cux muôx ntâu lênhx cxơưx trâu zuk mê nhuôk. Taz sik, hlôngr viv heik mê nhuôk tsuv thik tâu điểm siêz, ntâu chuôz zis xeir sik côngv thiêz tôngv vênhx mê nhuôk tsi cxoz cxơưx thiêz thâuv tưs cux đros đreiv mê nhuôk hâur ntu no. Niêv lâuk Nguyễn Phương Thảo, nhoz phường Yên Bái, tỉnh Lào Cai- muôx mê nhuôk shông no thik xeir zuôr cơưv cxênhx 3 pheiz kênh: “Shông no chuôz zis muôx mê nhuôk thik xeir zuôr cơuv lớp 10 viv li cur cux lok six cxơưx thiêz xar cov mê nhuôk tax tâu siêz xar njôngr tưz xeir tsov. Chuôz zis cux tôngv vênhx paz cxuô zav jông tiv zix chiê taz por đas jos trâu mê nhuôk, thâuv tưs cux truôx siêz bo chiê uô jax thik tax chêx cuk siêz tiv zix”.

          Lơưr cui tênhv, shux xênhz dưv thik chiê cơưv lớp 10 shông cơưv 2026-2027 ntơưv Lào Cai zuôr đăng cir txix hnuz 14 txos hnuz 21/5 ntơưv têx tsêr cơưv cxênhx 3 công lập, tsêr cơưv chuyên thiêz tsêr cơưv phổ thôngz mênhx cxưx nội trú. Njuôs xav tas nro tỉnh zuôr yênhx lix muôx nhos 80 Hội đồng seiz thik, đros qơư tsov txos xeir zuôr muôx nhos 25 cxênhz lênhx shux xênhz, taz por 85% ntâu shux xênhz cơưv tiêr cxênhx 2 tror tâu cơưv cxênhx 3 thiêz zaoz zux yax six.        No zos shông xuz thơưx Lào Cai tsưr tsix xeir zuôr shux xênhz sâuv thax tsav tỉnh đhâu thâuv sik côngv thiêz uô trâur nuv chính quyênx 2 cấp. Thôngx cxix, lơưr Bộ zaoz zux li cui tênhv, hâux lưv xeir zuôr shux xênhz cơưv cxênhx 3 shông no tâu krêz uô tsi lơưr thax tsav hành chính, đhâu co paz shux xênhz muôx cxaz theox chênhv xeir đăng cir dưv thik lok cơưv hâur têx tsêr cơưv zuk nhiêv txos. Tiv zix, shông no cux zos shông xuz thơưx shux xênhz đăng cir dưv thik txix phần mềm trực tuyến. Tsưr ziv no tâu njênhs njôngr zuôr txu grês ntâuz ntơưr, jông đuô trâu shux xênhz li niêv txir thiêz shux xênhz, uô tsênhz mênhx đuô hâur côngz xưv xeir zuôr shux xênhz. Zơưv Luyện Hữu Chung, Giáo đốc Sở zaoz zux tỉnh Lào cai, tsar ban chox kriê jiês thik xeir zuôr shux xênhz cơưv cxênhx 3 puz pâuz, Sở tưz uô tiêr têx tsưr ziv tsưr tsix jiês thik:“Đros jiês xeir zuôr shux xênhz cơưv cxênhx 3 shông 2026, Sở zaoz zux tưz heik trâu Ub tỉnh yênhx lix Ban chox kriê jiês thik; Sở cux tưz tsưr tsix kriê cxaz nghiệp vụ côngz xưv thik trâu têx taz viv tsêr cơưv; chox kriê têx tsêr cơưv chuôz tsar cơưv cxaz, kriê cxaz trâu shux xênhz. Txos nhiv no, côngz xưv bax trau jiês thik tâu krêz uô jông, taz por trơưk zoz qơưx”./.

Thừa Xuân-Txâur Vax cxêik nhênhv

Têx phiv liv đhâu chor nênhs fêv luk nziêk đas

Jok Thào, xã Pắc Ta, tỉnh Lai Châu, Lâux Xênhv Zax nhiv no muôx 14 shông  thiêz zos lênhx nhuôv tiv 2 hâur chuôz zis muôx 4 lênhx cưr tix nuk muôs. Tiv chuôz zis txov nhêv, viv li cơưv tas ntơưr lớp 7 Lâux tsuv tso ntơưr tsês chiê muk uô jos muôx nhiêx paz niêv thiêz txir, txoz cxơưx trâu chor zâu. Taz sik tsênhv tsik tâu muk jos, Lâux tưz trâus chor nênhs fêv zuôr muôs lênhx nênhs nziêk đas:“Lơưr nziêk tiêk cov muk trâu đriv têz, lơưr zok nriêr txir jông đrâul saz Trung Quốc trâu cur zuôr, viv li cur tưz njênhs thiêz mnôngs trơưk chor nênhs fêv heik. Đhâu co lơưr muôz nhiêx trâu cur niêv chiê zuôr cxur nox, zuôr cxuô zav, cur tưz jông siêz đros chor nênhs fêv co muk”.

Lơưr cơ quan qênhz yuôx, chor nênhs fêv tưz liv zôngv têx lênhx nênhs thiêz chuôz zis zôngx ziv njênhs, tsi muôx txux chi tsưr ziv jênhv pâuz, lơưr nziêk đas đros uô fôngx zưs sâuv mạng xã hội, chos luk paz zok nriêr txir Trung Quốc trâu zuôr thiêz muôz nhiêx uô ntêx chiê uô qơư njênhs, đhâu ntơư nênhs fêv chox lênhx nênhs co muk đhâu thax tsav qơư nhoz hâur hmo ntux tsik chiê lênhx nênhs tưs pâuz.

Ntơưv iz qơư ntiêr nhoz hâur Lào Cai, Lâux tưz trâus nênhs fêv chox muk cơư trâu hâur iz luz tsêr, tsi puz tơưv saz đrâuv jôngr. Thâuv co, lênhx nhuôv nxeik 14 shông no thiêx pâuz tiêk, zuk trâus nênhs fêv nziêk đas lênhx nênhs muôs. Thâuv ntơư Lâux thiêx ndo nyei thiêz sâu mông hâur máy hu xor tôngx trâu công an thor đros paz. Đhâu hlo txeik tâu mông, sir jos yơưz phơưz, qênhz yuôx hâur 18 luz six hơưv, lưv lươngv công an tỉnh Lai Châu tưz đros Công an tỉnh Lào Cai chơưv paz tâu Lâux tror lok trâu chuôz zis.

“Thâuv nhoz jê đriv têz, cur xar tiêk zos jiês no chor công an paz tsi tâu cur tror lok mak cur muk jâuv no zuôr tsi muôx txox hmông tror lok pov cur niêv lơưv. Jiês no cur pâuz tsênhz chor nênhs fêv nziêk đas, lưv jiês cur tsi muk nzir li ntơư lơưv. Nhiv no tâu đros niêv nhoz, cur tsênhv xar cur zuôr muk uô jos cov muôx nhiêx paz cur niêv txoz cxơưx trâu chor zâu”.

Nhoz xã Pắc Ta, lar heik zos thax tsav tsôngv box heir nênhs Hmôngz hâur xã Hố Mít kuz, luz nênhx tsênhv yuôr ntâu txov nhêv. Co cux zos têx zôngx ziv trâus chor  nênhs fêv nziêk đas. Lơưr tsi tuôx đrông ntưk, yênhx paz mak tuôx xưk li nênhs cxênhz jê, siz pâuz siz sưv, xưk nênhs piêr kriê zok nriêr hâux lưv uô. Muôx kênh jiês zos hâuz zâuv muk uô jos, têx jiês zos chos luk “uô hâux lưv siz sâu tâu nhiêx hli siêz”, lok sik nziêk đas muk zuôr txir saz têz qơưk đrâuv, luz nênhx tâu jông.

Trơưk li Ban chox kriê phax tar nênhs fêv, nênhs uô cxâuv chei têz qơưk thiêz cxiv tsa phôngz yaox tas nro tsôngv box tsưx phưv têz qơưk tỉnh Lai Châu heik pâuz, tsaz yênhx phax tar zuôr muôs lênhx nênhs ntu 2021-2025, hâur 5 shông đhâu, lưv lươngv muôx vax huôv ntơưv qơư qênhz  yuôx, đơưk tu 3 txuz, ntêk cxov tâu 3 lênhx nênhs fêv, chơưv paz tâu 9 lênhx nênhs trâus nziêk đas. Pir li ntu 2016-2020, chor nênhs trâus nziêk đas tưz txo grêk tsơưs. Thượng tá Nguyễn Mạnh Tân, Phưv Chánh văn phòng Cơ quan Cảnh sát qênhz yuôx, Công an tỉnh Lai Châu hêik pâuz:“Hâur ntu đhâu, chor nênhs fêv nziêk đas, nhiês zuôr muôs lênhx nênhs tưz txo grêk tsơưs pir li ntâu shông đhâu. Taz sik, hâur ntu têz qơưk huôv tsar li nhiv no, chor nênhs fêv muôx ntâu faz tsưr ziv nziêk đas. Chênhr viv li, chor nênhs fêv tưz tso tơưv ntâu faz tsưr ziv yiêz tsi chiê cơ quan muôx vax huôv qênhz pov, cux li uô trâu pêx xênhv zôngx ziv njênhs. Chiê tror phax tir thêir têx nênhs fêv no, iz chas sir jos yax kriê, pêz cux zuôr nzor uô cov tiêr hâux lưv qênhz yuôx thiêz muôz chor nênhs fêv tik cêr cxâuv cov txos qơư zos đreiv chei têz qơưk tso tơưv”.

Phax tar zuôr muôs lênhx nênhs nhiv no tưz tsik tiêk zos chor lưx lươngv công an hâux lưv xưz, mak tsênhv tsuv muôx tas nro sơưr đơưk đros uô, yax kriê txix tsôngv box têx luk hêik lok têx tsưr ziv uô nox, sêiz car, gra siêz txux chi hâur tsêr cơưv ntơưr. Chiê chor tuz nhuôs nhoz tox siêz pâuz tâu tiêk, đhâu chor luk chos, nziêk đas zuôr muôx tâu iz luz nênhx jông, zuôr zos têx phiv liv, muk zuôr tror lok tsik tâu./.

                                                                                                                 Khắc Kiên-Riê Lâux cxeik, nhênhv