Tir tar chor nênhs fêv muk lok đhâu ntus đriv tsik trơưk chêi

Thâuv 5 six zuôr tsâuk ntux hnuz 15 hli 1 shông 2026. Ntơưv thax tsav ntus đêx liêz, phươngx Lào Cai, tỉnh Lào Cai, muôx iz luz yêz ô tô nhiv kruôr lok đrêk. Muôx pêz lênhx nênhs saz đrâuv têz qơưk grêk hâur yêz lok, sêi đrơưv ndê muk chêix ciês iz luz yêz taxi đrêk tok ntơưv no. Ciês thâuv co, chor lưx lươngv Pênhz phax tưz thêir ciês. Chor nênhs fêv no cu trâus cxov tas nro. Bùi Đức Tùng - nênhs tsar yêz hêik pâuz: Tsuôk đhâu oz pêz chor tin nhắn sâuv mạng đros iz lênhx nênhs pâuz tsik tsênhz bê, Tùng tưz tsar yêz yênhx châuv jiês, thâux xa 50 lênhx nênhs saz đrâuv têz qơưk lok trâu hâur têz qơưk Việt Nam. Thâux xa iz jiês tâu 5 triệu đêiv. Thâux xa kruô li no zos uô cxâuv chêi têz qơưs:“Cur pâuz chor nênhs no thâux xa muk trâu Lào cai chiê choz zok trâu iz lênhx nênhs txơưr chox muk trâu saz Trung Quốc tsik zos chêi. Tiv lơưr muôz nhiêx ntâu, viv li cur tưz nhav thâux txix Hà Nội lok. Cur pâuz tiêk zuk hâux lưv uô no zos cxâuv chêi têz qơưk”.

Bùi Đức Tùng tsuôk zos iz hâur chôngz lênhx nênhs nhiês thâux xa chor nênhs fêv muk lok li no. Txix chuyên anr no, tas nro ntus đriv Lào Cai, muk lok đhâu ntus đriv tsik zos chêi nhiv no tưz pov muôx yưv ntâu. Chor nênhs fêv co phêiz muk đhâu ntâu txox cêr, hlôngr ntâu luz yêz chêix muk lok. Chor nênhs fêv uô têx hâux lưv no cux tsik siz pâuz njêx muôs, tsuôk zos siz tênhv đhâu sâuv mạng xã hội. Lar hêik, xav txix hâur shôngk shông txos nhiv no, Zênhx Pênhz phax Trôngx đriv Ntiêx têz Lào Cai tưz cxov tâu 7 txuz  nênhs fêv muk lok đhâu ntus đriv tsik trơưk chêi. Trung tá Vũ Trần Minh Đạt, Zênhx tsar Zênhx Pênhz phax Trôngx đriv Ntiêx têz Lào Cai hêik pâuz: Txix chor nênhs fêv têx tsưr ziv nziêk đas muk lok đhâu ntus đriv tsik zos chêi nhiv no, cux zos iz kro phiv liv: “Pir li thâuv ntêx, nhiv no chor nênhs uô cxâuv chêi muk lok đhâu ntus đriv ziv hnuz ziv muôx yưv ntâu txuz. Thiêz nhiv no chor nênhs fêv thôngz têz qơưk nziêk đas zuôr muôs lênhx nênhs đhâu mạng xã hội, nziêk đas thâux xa têx hax huv tsik zos chêi. Côngz xưv tir tar chor nênhs fêv no cux njiz ntâu phiv liv thiêz tas ntâu six hơưv đuô”.

Thax tsav ntus đriv phiv liv, muôx đêx cêv kuôk. Chor nênhs fêv cux pâuz tsênhz txos têx phiv liv no. Chor nênhs fêv liv zôngv tsôngv box mênhx cxưx tsơưs nênhs tox siêz tsưr ziv, txux chi kik,  muôz nhiêx nziêk đas px, hâuz zâuv px chox cêr muk lok đhâu ntus đriv. Chênhr viv li, Bôv đôiv Pênhz phax tưz sir tas ntâu đas jos tsưr ziv zok nriêr ntêk cxov chor nênhs fêv nhiês cêr muk lok đhâu ntus đriv.

Pâuz tsênhz txos chor nênhs fêv têx tsưr ziv nziêk đas, cơ quan muôx vax huôv tsênhv sir jos fuô uô cxuô faz tsưr ziv phax tar. Taz sik, đhâu iz txuz anr zos iz luôs hâux lưv ziv phiv liv đuô:

Lar hêik, thâuv luz nênhx txov nhêv yêiz pluôs, chor nênhs fêv co tưz muôz nhiêx hâuz nziêk đas tsôngv px, zôngx ziv uô trâu px njênhs uô cxâuv chêi têz qơưs. Chênhr zos li hêik ntơư, xar tir tar cov tâu chor nênhs fêv co, tsuv sir jos yax kriê px hlôngr yiêz tsưr ziv khưr uô nox cov iz thênhv jux juk px muôx luz nênhx tsâu sor, tso tsês têx cêr nênhx kror pôngz kaz. Sir jos sêiz truôx thax tsav, uô jông trơưk têx têz qơưs têx tsênhv chêi paz; đros px nox, đros px nhoz, đros px uô, đros hêik px luk - zos iz luôs hâux lưv tsuv cov tâu truôx. Đại tá Nguyễn Phi Khanh, tsar Bôv đôiv Pênhz phax tỉnh Lào Cai hêik pâuz:“Pêz sir jos đros pêx xênhv, pâuz tâu pêx xênhv siêz xar, sưv jê đros pêx xênhv. Uô jông chor tsaz yênhx, tiv zix zos paz trâu pêx xênhv huôv tsar kinh têr xar hôiv, txo grêk yêiz pluôs, tsik chiê lênhx tưs trâus pôngz kaz. Hla trâu ntu huôv tsar yiêz, lưx lươngv Pênhz phax đros pêx xênhv nhoz thax tsav ntus đriv zuôr sir jos uô jông trơưk Đảng têz qơưs têx tsênhv chêi paz trâu yênhx thax tsav, yênhx zênhx pênhz phax”.

Sêiz car ntux đriv zos luôs hâux lưv tsưx phưv truôx têz qơưs, cxiv tsa cêr sik côngv siêz truôx jông đros pêx xênhv. Thâuv px  jêx jok muôx luz nênhx vav mênhx, pêx xênhv pâuz tsênhz kror tưs zos, kror tưs tsik zos, thâuv co yênhx lênhx pêx xênhv zos iz lênhx nênhs paz đros tsưx phưv truôx tuk thax tsav qơư nhoz ntus đriv. Co thiêx zos luôs hâux lưv uô paz tir tar tâu chor nênhs fêv, tsưx phưv truôx ntus đriv pêz têz qơưk, px muôx luz nênhx tsâu sor./.

Chor nênhs muk lok đhâu trôngx đriv tsik trơưk chêi tsuv trâus bluô nhiêx

Uô cxâuv chêi tsuv trâus bluô nhiêx: Chor uô cxâuv chêi tsuv trâus bluô nhiêx, zos uô cxâuv chêi jiês xuz thươx lok sik tsik tâu txâuk tik cêr cxâuv (trơưk li Nghị định 282/2025/NĐ-CP):

Trâus bluô nhiêx txix 3.000.000 txos 5.000.000 đêiv: Zos chor nênhs muk lok đhâu trôngx đriv tsik muôx ntâuz ntơưr trơưk cui tênhv.

Trâus bluô nhiêx txix 10.000.000 txos 15.000.000 đêiv: zos chor nênhs oz chas têz qơưs muk lok hâur têz qơưs VN tsik tâu cơ quan muôx vax huov tso chêi.

Trâus bluô nhiêx txix 30.000.000  txos 40.000.000 đêiv: zos chor nênhs uô ntâuz ntơưr chuôr muk lok đhâu trôngx đriv trâu oz chas têz qơưs sâuv ntiêx têz

Trâus bluô cxaz nzir nhiêx thiêz kho đuô têx uô cxâuv: Sâu tsês cxuô zav ntâuz ntơưr, chuôz zênhx uô cxâuv chêi, tsuv muôz têx nhiêx sâu tâu tsik trơưk chêi tror trâu têz qơưs thiêz trơưk lênhx nênhs nhoz têz qơưs đrâu tơưv đhâu têz qơưs.

Trâus tik cêr cxâuv:

Trơưk li grê 347 chêi têz qơưs, lênhx nênhs muk lok đhâu trôngx đriv trâu oz chas têz qơưs tsik trơưk chêi lok sik lênhx nênhs oz chas têz qơưs tuôx nhoz têz qơưs VN tsik trơưk chêi tưz trâus bluô nhiêx, taz sik cux tsênhv tror uô cxâuv chêi zuôr trâus bluô nhiêx txix 5.000.000 txos 50.000.000 đêiv lok sik trâus tik cêr cxâuv nhoz 6 luz hli txos 3 shông tsêr tux. 

Tsưr tsix, hêik kriê thiêz chox lênhx muk lok đhâu trôngx đriv tsik trơưk chêi: Lênhx nênhs uô cxâuv chêi chox đuô tus muk lok đhâu trôngx đriv, muôx têx jiês trâus tik cêr cxâuv nhoz tux txix 1 shông txos 15 shông tsêr tux thiêz trâus bluô nhiêx txix 20.000.000 txos 200.000.000 đêiv./.

                                                          Tsu Vưx cxêik nhênhv